بەسە، با گۆمەکە
بشلەقێ!
فریاد هیرانی
ئەگەر راپەڕینی ساڵی 1991 رروداوێکی
مێژووی بوو و دەسەڵاتی بەعسی داگیرکەری لە کوردستان راماڵی و بۆ یەکەم
جار کورد ئازادی و نیمچە سەربەخۆییەکی بەخۆوە بینی، بەڵام هەر لە
گەرمەی راپەڕین بووین دەیان دیاردەی ناشیرین و دزێو حەماسی خەڵکی
ساردکردەوە، هەر لە تاڵانکردنی دامودەزگاکانی دەوڵەتەوە بگرە تا
ئاودیوکردنی دەیان و سەدان کارگە و ئامێرو شۆڤڵ و ئۆتۆمبێل و...هتد
ئەگەر هەڵبژاردنی پەرلەمان بۆ یەکەم جار لەساڵی 1992لە
مێژووی کورد دەسکەوتێکی گرنگ و وەرچەخانێکی چۆنایەتی بوو، بەڵام
دەرەنجامەکەی فیفتی فیفتیەکی هێندە خراپی لێکەوتەوە، کەبووە هۆکاری
شەڕێکی ناوخۆی قوڕس و چەندین ساڵ درێژەی کێشا و بە هەزاران گەنج و
مندالً وپیری ئەم میللەتەشی خەڵتانی خوێن کرد و کوردستانی بە کردەوە
کردە دووپارچە!
بەڵام پێم وایە هەڵبژاردنی ئەمجارەی پەلەمانی کوردستان لە
25ی تەمووز تێپەڕینی قۆناغێکی گرنگە،
وەرچەرخانێکی مێژووییە، بازدانێکی دیموکراسیانە و پێشکەوتووخوازانەیە،
ئەگەر لە رابردوودا و بەهۆی شەڕ و ململانێ و توند و تیژییەوە وێنەیەکی
خراپمان پیشانی جیهانی دەرەوە دابێت، ئەوا لەم هەڵبژاردنەی تەمووزدا
دەتوانین وێنە تەلخ و ناشیرینەکان جوان بکەینەوە، وێنەیەکی بریقەداری
ئازادی و دیموکراسی نیشانی دونیا بدەین .لە تەمووزی داهاتوودا پێم وایە
خەڵک بە حەماسێکی گەرمتر لە گەرمی تەمووز رووەو سندوقەکانی دەنگدان
دەچن و بەشدارییەکی لە رادەبەدەر و چاوەڕوان نەکراو دەکەن، چونکە
ململانێیەکی جدی و کێبڕکێیەکی جدی لە ئارادایە.
هەڵبژاردنی ئەمجارە لەبەر ئەوەی دەیان لیست هەیە و ململانێ لەسەر کورسی
بە کورسی پەرلەمان دەکەن و، واش پێدەچێ کەشوهەوایەکی ئازاد و ژینگەیەکی
ئارام هەبێ بۆ دەنگدەران، پەرلەمانی داهاتوومان دەبێتە پەرلەمانێکی
ئەکتیڤ و بە هەق پەرلەمانی ئیرادەی خەڵکی کوردستان، ئەوەی لای من گرنگە
چۆن وا بکرێت هەڵبژاردنەکە بە پاکی و بەبێ کێشە بەڕێوە بچێت، چونکە
ئەمە زۆر لەوە گرنگترە کە کامە لیست کەمتر یان زیاتر دەهێنێ، یان
لەناخی خۆمان و لە ویژدانی خۆمانەوە دەنگ بەکێ دەدەین، ئەوەی کە
دەسکەوتێکی هەمە لایەنە و دەسکەوت و سەرکەوتنی هەموو لیستەکان و
حزبەکانە بە هەردوو حزبی دەسەڵاتداریشەوە، ئەنجامدانی هەڵبژاردنەکەیە
بێ گرفت و کێشە و بەشێوەیەکی پاک و بێگەرد.
دوای هەژدەساڵ دەبینین گۆمی (هاوکێشەکە) بشلەقێ و لە ئەنجامی
هەڵبژاردندا گۆڕان بەسەر هەرسێ دەسەڵاتی هەریم دابێت، کە باس لە
شلەقانی گۆمەکە ئەکرێ مەبەست ئەوە نیە کت و مت دژی هەردوو حزبی
دەسەڵاتداربێت، نەخیر شلەقانەکە تەنیا ئەوەیە دەنگی تر و رەنگی تر و
ئیرادەی تریش دەچن بۆ هاوبەشەبوون لە دەسەڵاتی یاسادانان و
جێبەجێکردندا، کە دەڵێین گۆمەکە با بشلەقێ مانای ئەوەیە کورد قۆناغێکی
نوێ دەست پێدەکا بۆ راهاتن لەسەر هەڵبژاردنی ئازادانە و گەڕانەوە بۆ
ئیرادەی خەڵک و گۆڕینی دەسەڵات بەشێوازی ئاشتیانە و پێشکەوتووخوازانە،
نابێ ئەوەمان بیربچێتەوە لەگەڵ ئەوەی رەخنە و گلەیی و نارەزایی خەڵک
زۆرە، بەڵام بەسەرکەووتوویی ئەم هەڵبژاردنە و تێپەڕاندنی ئەم قۆناغە،
چەندە دەستکەوت و سەرکەوتنە بۆ لایەنی ئۆپۆزسیۆن و خەڵک، بە قەد هێندەش
دەستکەوتە بۆ پارتی و یەکێتی، ئەگەر بێ کێشەی گەورە(دیارە لێرەولەوێ
کێشەی بچوک هەر روودەدا) هەڵبژاردنەکە بەڕێوە بچێ، فەزڵێکی بۆ هەردوو
لایەنی دەسەڵاتدار دەگەڕێتەوە، چونکە تا ئێستاش دامەزراوەکانی
پێشمەرگەیی و ئەمنی و دارایی بە دەست ئەوانەوەیە، هەر ئەوانیش بەرپرس
دەبن لە سەرکەوتن یان فەشەل هێنانی هەڵبژاردنەکە، بەرپرس دەبن لە
بەڕێوەچوونی هەڵبژاردنەکە بە پاکی و بەبێ تەزویر و فرت و فێلڕ، هەروەها
بەرپرسیش دەبن لەوەی ئەم دیاردە ناشیرین و ناشارستانیانەی تیا بکرێ،
بەرپرسیاریەتی یەکەمیان دەبێتە دەسکەوتێکی گرنگ بۆیان و هی دووەمیشیان
خراپ لەسەریان دەکەوێتەوە!
ئەوەی لەم کورتە نووسینە ماومە بیڵێم ئەوەیە میدیا و کەناڵەکان بە
تایبەتیش ئەوانەی خۆیان وەکو کەناڵی ئەهلی و ئازاد ناساندووە، نەکەونە
ژێر کاریگەری ریکلام و کەفوکوڵی هەڵبژاردن، هەموو رووداوەکان چ رابردوو
بێت یان ئێستا یان داهاتوو وەک خۆی بۆ خەڵک بگوازنەوە و بڕیاری
لایەنگریکردن یان دەنگدان بۆ ئەم لیست یان ئەو لیست بۆ خەڵک لێگەڕێن،
ئیشی رۆژنامەنووس و کەناڵەکانی راگەیاندن ئەوەیە بەرچاوی خەڵک
روونبکەنەوە لە راستیەکان و، بڕیاریش بۆ هاوڵاتیان بەجێبێڵن، ئیشی
رۆژنامەنووس و کەناڵەکان ئەوەیە هەر کەس و لایەنێک پێشێلکارییەکی کرد و
ویستی رووی هەڵبژاردنەکە ناشیرین بکا پەنجەی لەسەر دابنێن و لەسەری
بکەنە هەڵا! رۆژنامەنووسان و کەناڵەکان دەتوانن رۆڵێکی کاریگەر بگێڕن
لە شلەقانی گۆمەکە بەبێ هیچ زەرەر و زیانێک.
Fhirany2009@hotmail.com
|