٣٠\٥\٢٠١٢

بۆ ئەنفالکراوان فرمێسک دەبارێنن و بۆ ئەنفالچییانیش پۆست و پارە.

هیواڕەش           

مەگەر دوڕوویى بە قەدەر درۆزنیى ئازارم بدا ، تەنهاپاساو بۆ درۆزن خوێندنەوەى بابەتێکى زانستییانەى ساڵانى هەشتاکانمە لە گۆڤارێکدا بەرچاوم کەوت کە بەم شێوەیە باسى لە = درۆزن -  دەکرد : هەندێ خانەى مێشک لە مرۆڤدا هەن بە هەڵکشانى تەمەن گەشە دەکەن و ئەرکیشیان دەگۆڕێت ، ئەو خانانە لە منداڵیدا سەرقاڵى چنینەوەى شتى خەیاڵى و دوور لە واقیعى و نزیک لە درۆن ، منداڵان بۆ سەرنجڕاکێشان و بە نیازى خۆیان فریودانى دەروربەرەکەیان هان دەدا و قسەى بێسەرەوبەرە و هەڕەمەکى دەهۆننەوە ، بۆ نمونە : منداڵێک پێى بە سکلێتەر و ئستۆپى سەیارەکەى باوکى ڕاناگات کەچى باسى لێخوڕین و تیژڕۆیى دەکات و پاڵەوانێتى خۆى بۆ دەورەبەرەکەى دەگێڕێتەوە کە سەرى بۆ دەلەقێندرێ وا دەزانێ بڕواى پێدەکەن ، ئەمە خەونى ئایندەیەتى و پێشوەخت دەیکاتە بابەتى ڕۆژ ، بۆ ئەوەى ڕوشکێن نەکرێ بە ناچارى سەرى بۆ دەلەقێندرێ ، ئەم خوو -  درۆ -  یە بە تێپەڕبونى ڕۆژگار و گەشەسەندنى خانەکان هێدیهێدى ئەرک و ڕۆڵیان دەگۆڕێ ، بەڵام لە هەندێ منداڵدا ئەو خانانە سستن وەیان گەشەیان دەوەستێ و بە گەورەییش خووەکە لە منداڵەکەدا دەمێنێتەوە و لە ئاکامدا بە گەورەییش بە هەمان نەزمى جاران خەیاڵەکان دەهۆنێتەوە و بۆ خەڵکیى دەریدەبڕێ ، بەڵام ئەگەر ئەوە بۆ منداڵ ئاسایى بێ ئەوا بۆ گەورە دەبێتە پەڵەیەکى نەنگى و نازناوى -  درۆزن -  بە خاوەنەکەیەوە دەلکێنێ ، بۆ نمونە : ناسیاوێکم هەیە بۆ هەر قسەیەکى بۆ ئەوەى بڕواى پێبکەین لە جیاتى سێبەسێ بە هەشتهەزار تەڵاق سوێند دەخوات ، لەم ماوەیەى ڕابردودا هەشتهەزار تەڵاقى فڕێدا و وتى : ئەم هەفتەیە هەلیکۆپتەرێک و شەش ئۆتۆمبیلى وەنەوەشە دەکڕم و خانویەکى شەش نهۆمى دروست دەکەم بە مەرجێک نهۆمى شەشەمى بزێو و خولاوە بێ و بە چواردەورى خۆیدا بخولێتەوە و لە سەربانەکەشیدا چیمەن و گوڵزار دەڕوێنم و ئێواران تیایدا دادەنیشم و دەخۆمەوە و بە دوربین تەماشاى ناو فڕۆکەخانە دەکەم و دیقەت لە تاکەتاکى ئەو کەسانە دەدەم کە دەچنە ناو فڕۆکەوە و بزانم کامیان ناسیاومن ... ئەمەو لە پێش ئەم قسانەیدا بە دووى سەدهەزار دینارى قەرز عەوداڵ بوو ، بڕیاریشى وا دەدا کە لە سێ مانگدا خانووەکە تەواو بکات و بۆ تەواو کردنى پرۆژە درۆیینەکەى پرسیارى خانووى کرێى دەکرد کە گوایە لە سێ مانگدا مەیسەرى دەکا ، خانویەکیان بۆى دۆزییەوە مانگانە بە سێسەدوپەنجا هەزار دینار بەڵام لەو هەموو توانا مادییەى بۆ پرۆژەکە دەریدەبڕى کرێخانووەکەى پێ زۆر بوو و داواى دەکرد بۆى بکرێتە سێسەد هەزار دینار ، منیش بڕیارم دا کرێکەى هەرچەندێک بێت گرفت نیە بیگرمە ئەستۆى خۆم و پارەکەى بۆ بدەم کە دەیکردە ملیۆنێک و پەنجا هەزار دینار ، بەهەرحاڵ ئەمە مشتێکە لە خەرمانى درۆزنە ناسیاوەکەم .

بۆیە لێرەدا دەڵێم ئەو پیاوە درۆزنەم زۆر لە سەرکردە دوڕووەکان لا پەسەندترە ، چونکە ئەو جگە لە زیان بە کەسێتى خۆى بۆ کەسیترى نیە و بگرە خۆشمەجلیسیشە و کە لێمان دور بێ کەلێنێک دروست دەکات ، لێ من سەیرم بە سەرۆک و سەرکردە سیاسییە دوڕووەکانى لەمەڕ خۆمان دێ و نازانم چۆن ئارەقەى شەرم تەوێڵیان تەڕ ناکا ؟ ! دەبێ شەرمیان نەبێ بۆیە شەرمەزاریش نابن ، ئەگینا ناکرێ وەکو دارى قوزەڵقورد لە هەموو بۆنە مەرگاوى و کارەساتبارەکانى گەلەکەمان هەڵتۆقن و ئامادە بن و خۆیان دەکەنە شۆڕەسوارى مەیدانەکە و قسەى بێبنەما و باقوبریق ڕایى دەکەن و وا دەزانن هەرچى دەڵێن ڕاستە و وایە ، ئەمە چ لۆژیکێکە ئەوان لەسەرى دەڕۆن ؟ فرمێسکى تیمساحى و ڕستەى کەڵەکەکراو و وتارى هەنسکاوى ئامادە دەکەن بۆ پێشوازى لە ڕوفاتى ئەنفال و یادى کیمیابارانى هەڵەبجە و شوێنانى دیکە و جینۆسایدى گەلەکەمان کەچى بێمنەتانە داڵدەى ئەنفالچییان و بکوژە خوێڕییەکانى ئەنفال و خڵتەى بەعسییان دەدەن و دەیانپارێزن و کەیسى ئەنفال دیزەبەدەرخۆنە دەکەن ، ئەوەتا دەیان ئەنفالچیى ڕوڕەش و داڵدەدراوى پەناى حیزبەکان بە بەرچاوى کەسوکارى ئەنفالکراوانەوە خاوەن پۆست و پلە و پارە و پێگەن .

بۆ زانینى زیاتر بە پێى یاساى سزادانى عێراقى ، هەر کەسێک داڵدەى تاوانبارێ بدا یان تاوانێک بشارێتەوە هاوبەشى تاوانەکەیە ، بەم پێیە دەبێ سەرۆک و سەرکردەکان بە چەشنى ئەنفالچییان کەیسى تاوانیان بگەیەندرێتە دادگاى باڵاى تاوانەکان و پەلکێشى لێکۆڵینەوە و لێپرسینەوە بکرێن و بە سزاى ڕەواى خۆیان بگەیەندرێن ، نەک ببنە دەمسپى و کۆڵوانەسوورى بەر لەشکرى پێشوازى تەرمى نێچیرانى تاوانى دەستى جەلادە ئەنفالچییە قێزەونەکانى بەعسییە فاشیستەکان کە ئێستا لە حیزبە حەشارگەکانیاندا مۆڵدراون .

بۆ پاراستنى ئاساییشى نەتەوەییمان پێویستە بە زوترین کات ئەنفالچییان بۆ بەردەم یاسا و دادگا پەت بکرێن ، نەک بە پۆست و پارە پاداشت بکرێن ، ئەگەر نا دەبێ سنورێک بۆ دوڕوویى و دوفاقێتى سەرۆک و سەرکردەکان دابنرێ و چیتر ڕێگەیان پێنەدرێ وتەى بێڕەونەق و بێبەها دەرپەڕێنن .

ماڵپه‌ڕی هیوا ره‌ش