٥\٤\٢٠١٦
دەزگا رۆشنبیرییە
تاقانە کوردستانییەکەى کەرکوک و
تۆپی بەرپێی گەرمیان و چەمچەماڵ و سلێمانى.
سەڵاح حەمەئەمین
((دواى ئەوەى بەڕیوبەرایەتى گشتى رۆشنبیرى و هونەر لەسلێمانى سەر بە
وەزارەتى رۆشنبیرى و لاوانى حکومەتى هەرێمى کوردستان بەنووسراوى ژمارە
(١١٨) لە ریکەوتى ٣١/٣/٢٠٠٨ بڕیارێکى سەیروسەمەرەى لەسەر دەزگا تاقانە
رۆشنبیرییە کوردستانیەکەى کەرکوک دەرکرد، لە ژمارە (٢٨٧)ى رێکەوتى
١٢/٧/٢٠٠٨ى رۆژنامەى هەواڵ بابەتێکم لە ژیر ناونیشانى (شارۆچکەى کەرکوک
سەر بە پاریزگاى گەرمیان بڵاوکردەوە. بەهۆى ئەوەى تائەم دەمە ئەو گەمە
مەترسیدارە لە نێوان گەرمیان و چەمچەماڵ و سلێمانى بەو دەزگا تاقانەیە
بەردەوامە) بەباشم زانى جارێکى تر لەسەر ئەو بابەتە بنووسمەوە)).
لە دواى راپەڕینى بەهارى (١٩٩١) و بەهۆى ئەوەى بەهارى ئازادى کەرکوک
دریژەى نەخایاند و ئەو شارە دیرینەى کوردستان لەو قۆناغەدا لە ئامیزى
کوردستان دەرهێنرا . لەو شارو شارەدییانەى کە لەساڵى ١٩٧٤ بەهۆى
سیاسەتى گۆڕینى دیموگرافیاى شارى کەرکوک کە رژێمى لەناوچووى بەعس لەو
شارەدا پەیڕەوى ئەکرد دابڕان حکومەتى هەرێمى کوردستان پاریزگایەکى
بەناوى کەرکوکەوە لە گەرمیان دامەزراند ، دوابەدواى ئەو بڕیارە
وەزارەتى رۆشنبیرى حکومەتى هەرێمى کوردستان ( بەڕێوەبەرێتى رۆشنبیرى
کەرکوک ) ى لە گەرمیان کردەوە.
لەدواى روخاندنى رژێمى لەناوچوى بەعس و ئازادکردنەوەى شارى کەرکوک لە
ساڵى (٢٠٠٣)دا هونەرمەندان و نووسەران و رۆشنبیرانى شارى کەرکوک هەوڵ و
تەقەلایەکى زۆریان دا بەمەبەستى گەڕانەوەى ئەو بەڕێوبەریەتییە بۆ نیو
شارى کەرکوک ، بەڵام بەداخەوە لەو کاتەدا لایەنە پەیوەندیدارەکان بەهۆى
ئەوەى کەرکوک نەگەڕابووەوە ئامیزى کوردستان نەیانتوانى بەو ئەرکە
هەڵسن.
لەساڵانى (٢٠٠٤ و ٢٠٠٥) دواى هەوڵ و تەقەلایەکى زۆرلەلایەن ناوەندى
کەرکوکى یەکێتى هونەرمەندانى کوردستان و چەند رێکخراوو سەندیکایەکى تر
توانرا ژمارەیەک لە هونەرمەندان نووسەران و رۆژنامەنووسانى کەرکوک لە
وەزارەتى رۆشنبیرى حکومەتى هەرێمى کوردستان دابمەزرینن . لە ساڵى
(٢٠٠٧)دا بەمەبەستى برەودان بەبوارەجیاجیاکانى رۆشنبیرى و هونەر لەشارى
کەرکوکدا بڕیارى کردنەوەى (فەرمانگەى رۆشنبیرى کەرکوک) و گواستنەوەى
هەموو ئەو فەرمانبەرانەى کە سەربە وەزارەتى رۆشنبیرى و لاوانى حکومەتى
هەرێمى کوردستانن و نیشتەجێی شارى کەرکوکن بۆ سەر ئەو فەرمانگەیە درا.
دواى کەمتر لە ساڵیک بەسەر کردنەوەى ئەو فەرمانگەیە (بەڕێوەبەرێتى
رۆشنبیرى گەرمیان)ى سەر بە (بەڕێوەبەرایەتى گشتى رۆشنبیرى و هونەر)
لەسلێمانى بە (فەرمانى کارگێڕى) ژمارە (١١٨) لەرێکەوتى ٣١/٣/٢٠٠٨
بڕیاڕێکى سەیرو سەمەرەى سەبارەت بە مامەڵە کردن لەگەڵ شارە دیرینەکەى
کوردستان کەرکوک وەک شارۆچکەو شارەدییەکان دەرکرد ، تێدا هاتبوو
((بڕیاردرا بەکردنەوەى بنکەى رۆشنبیرى لەم شارو شاروچکانەى خوارەوە لە
پەیکەرى رێکخستنى بەڕێوەبەرایەتى گشتى رۆشنبیرى و هونەر لەگەرمیان
(کەرکوک، دووزخورماتوو، کفرى، خانەقین، کەلار) )). بەم شێوەیە لەو
ساڵەدا لەبرى ئەوەى بەڕێوەبەرایەتى گشتى رۆشنبیرى و هونەر لە کەرکوک
بکریتەوە لە گەرمیان کرایەوە و بڕیاردرا لە کەرکوکیش وەک شارو
شارۆچکەکانى گەرمیان ( بنکەى رۆشنبیرى ) تیدا بکریتەوە . بەم شیوەیە
حکومەتى هەرێمى کوردستان ئەو خەونەى توێژى رۆشنبیرى کەرکوکیشى لە
گۆڕنا!؟
پەراویزخستن و بچوک کردنەوەى شارى کەرکوک و نووسەران و هونەرمەندانى
ئەو شارە لەو رادەیەدا نەوەستا ، دواى ماوەیەک و لەوکاتەى خەڵکى شارى
کەرکوک لە چاوەڕوانى ئەوەدا بوون کەئەو شارو شارەدییانەى کە لە ساڵى
(١٩٧٤) لەکەرکوک دابڕینران بگەڕینرینەوە سەر شارى کەرکوک... دواى
ماوەیەک لە لکاندنى (فەرمانگەى رۆشنبیرى کەرکوک) بەگەرمیان ، پەیوەندى
ئیدارى و دارایی ئەو بنکەیە گواسترایەوە سەر چەمچەماڵ. دواى هەوڵ و
تەقەلایەکى زۆر بەفەرمانى وەزارەتى رۆشنبیرى و لاوانى حکومەتى هەرێمى
کوردستان ژمارە (٣٥٩٥) لەریکەوتى ٢/٥/٢٠١١ و فەرمانى کارگیڕى
بەڕێوەبەرایەتى گشتى رۆشنبیرى و هونەرى سلێمانى ژمارە ( ٢١٢٦) لە
رێکەوتى ١٠/٥/٢٠١١ ئەو فەرمانگەیە کرایە (بەڕێوەبەرایەتى رۆشنبیرى و
هونەرى کەرکوک).
لەدوابڕیارى وەزارەتى رۆشنبیرى و لاوانى حکومەتى هەرێمى کوردستان بۆ
رووبەرووبونەوەى قەیرانى دارایی ، بڕیارى کەم کردنەوەو تێکەڵکردنى
دەزگاو بەڕێوبەرایەتیە هونەرى و رۆشنبیرییەکانى سەر بەو وەزارەتەى
دەرکرد ، بەو پییە سەر لەنوێ دەزگا تاقانە رۆشنبیرییە کوردستانیەکەى
کەرکوک ئەبیتەوە بە (بنکە یان فەرمانگە یان....) و ئەبیتەوە بە توپی
بەر پێی گەرمیان و چەمچەماڵ و سلێمانى.
salah1325681@gmail.com
|