دروشمەکانتان پڕە لە وەهم، ئامانجەکانتان پڕە لە فێڵ.

 25/7 خەڵکى کوردستان تاقیتان دەکاتەوە.

پێشڕەو حەمید 

دواى ( 18 ) ساڵ لەخۆبەڕێوەبردن و ئەو هەمو نەهامەتییەى لەلایەن حیزبەکانەوە بەسەر خەڵکى کوردستاندا هێنایان، دەکرێ لەئێستا تەنها بۆبیرهێنانەوە چەند پرسێاریِک ئاراستەبکرێن ، بەمەبەستى ئەوەى لەدواى 25/7 جارێکى دى ئەو پرسیارانە دوبارە نەبنەوە و بەشێوەیکى کۆنکریتى سترایژى کارکردنى دەسەڵاتى ئایندەى کوردستان گوڕانێکى جەوهەریانەى بەسەردابێت و چەمکى ( دیموکراسیەت ) وەک لەو ماوە زۆرەدا بانگەشەى بۆدەکرا لە فۆرمێکى تیۆریی چەق بەستوەوە بگۆڕدرێت و لە فۆرمێکى پراکتیزەیدا خۆى ببینێتەوە و کوردستان بگەیەنینە ئاست وڵاتانى پێشکەوتوە و لە دابینکردنى کەشێکى ئارام بۆفەراهەم کردنى ئازادیەکانى تاک و ئازادى ئابورى و سیاسى و ڕۆشنبیرى و ...تد.

کێ هەیە لەئێمە ئاگرى شەڕى ناوخۆى بەرنەکەوتبێت ؟ کام لەئێمە لەشکست و خیانەتى حیزبەکان ئاگار نەبوە ؟ کێ هەیە لەئێمە ئەو هەموشکستانەى ، لەلایەن حیزبەکانەوە بەدەسکەوتى مێژویى و نیشتمانى پێ نەفرۆشرابێتەوە ؟ کێ هەیەگوێى لە ڕۆژنامەنوسێکى حیزبى نەبوبێت ، تەقەکردنى پۆلیس و ئاسایشى لە خۆپیشاندەرەکان ، بەحیکمەتى حیزب و دەسەڵات لەقەڵم نەدابێت و هەمو خۆپیشاندانێکى بە دەستێک لە قەڵەم نەدابێت ، ئەگەر خۆپیشاندانەکەیش بۆ چارەسەرکردنى کەم ئاوى و دابین کردنى وزوى کارەباش بوبێت ؟ کێ هەیە لەئێمە بۆدابین کردنى پێَداویستى یە سەرەتایەکانى بەشدارى خۆپیشاندانێکى نەکردبێت و زۆر بەتوندى بەرشەقى ئاسایش و جنێو و سوکایەتى پێکردنى پۆلیسەکانى هەرێمى هەردولا نەکەوتبێت ؟ کێ هەیە لەئێمە لەسەر ڕەخنەیەک ، یان لەسەر توڕەبونێک دژ بە کردارە نامۆراڵیى یەکانى دەسەڵات ، لە خوارەوە و لەلایەن ( بەرپرسۆلکە ) یەکەوە هەڕشەى تێهەڵدانى لێنەکرابێت یان سوکایەتى پێنەکرابێت ؟ کەسێک هەیە لەم نیشتیمانەدا فایلى پڕلە خیانەت کردنى چەند بەرپرسێکى حیزبى و پاڵەوانى ناو حیزبە کوردیى یەکانیى لە ڕێگاى ڕۆژنامەکانەوە نە خوێندبێتەوە یان گویێ بیستى نەبوبێت ، ئەى کام لەئێمە لەکاتى دادگــایى کردنى ئەوانەدا ئامادەبوە ؟.

( ئێمە ) واتە میللەت واتە ئەو مرۆڤانەى بەخت یاوەریان نەبووە لە نەبونی و لە نەهامەتى لەم نیشتمانەدا ڕزگاریان بێت ، ئێمە واتە ئەو بونەوەرانەى کە فێر نەکراوین هیچ مەکینەى ماستاو سارد کردنەوەیەک بەدەستەوە بگرین ، ئێمە واتە ئەو مرۆڤانەى کەزمانمان زمانى گوڵەو ڕخنەکانمان بۆ خۆشنودى خۆمانە و خاڵین لەڕق و پڕین لە توڕەبون بەرامبەربە ( ئێوە ) و ئێوە ڕەخنەکانمان بە ( وەڕێنى سەگ لەمانگەشەو) پێناسەدەکەن و بەجاسوس و بەکرێ گیراوى وڵاتان تاونبارمان دەکەن .

ئێوە واتە کاربەدەستە بێ خەمەکان، مەسئولە پاوەنخوازەکانى ئەم نیشتمانە، کە وڵات تان وێران کروە و پڕتان کردوە لە کائینى شەڕانى و گەندەڵ و چەقۆبەدەست ؟! ئێمە دەستێکمان هەیە بۆ بەخشین ( ئێوە ) چیتان هەیە بیى بەخشن بە ئێمە ، جگە لە سوکایەتى کردن نەبێت بە ئیرادەى ئێمە ؟ ئێَمە دلێکمان هەیە پڕە لە خۆشەویستى بۆ نیشتمان ، ئێوە چیتان هەیەتا بە نیشتیمانى ببەخشن ، جگەلەوەى هەمیشە دڵى نیشتمانتان سوتاندووە و دڵەکانى خوتان پڕکردوە لە غەریزەى شەیتانى ؟ ئێمە ڕۆحێکمکان هەیە هەمەیشە لەئاست گەوەرى نیشتماندا ئامادەیە بۆ دەرچوون ، بەڵام ئێوە کەڕۆحتان لێوان لێوە لە هەناسەى تەماوى و ساتێکى پڕ لە شەهوەتى خۆتان و بەزمى سەرمێزەکانتان نا گۆڕنەوە بە گریانەکانى ئێمە ، ئیدى چۆن جورئەت دەکەن بەئێمە بڵێن ( فەوزەوى یەکان ) ؟ ئەگەر هەرکەسێک لەسەر داواکارى یەکانى خۆیى زمان بگرێت و دژى شەڕە بێ تاموو بێ ماناکانى ئێوە هاوار بکات و ئێوە ناوى لێبنێن ( فەوزا ) ئەوا ئێمە خەڵکانێکین تاسەرئیسقان شانازى بە ( فەوزەوێتى خۆمانەوە دەکەین ) و دەڵێن بژى ( فەوزەوێت ).

خەونەکانى ئێمە هەموو خەونى ئیناسنین و ئازادى ئەقڵ و خۆشنودى تەواوى مرۆڤەکان خەونى هەمیشە سەوزمانە ، بەڵام خەونى ئێوە چى یە ؟ جگە لە مۆنۆپۆلکردنى سەرجەم کایە جیاجیاکان نەبێت ؟ خەونى ئێوە بێ دەنگى ئێمە یە لەئاست گەمە ناشرینەکانتاندا ، خەونى ئێوە شکاندنى دەستەکانى ئێمەیە کەهەرکاتێک بمانەوەێت ( پەنجە مان ) درێژبکەین بۆ گەندەڵى یەکانى ئێوە ، ئێمە خەون بەوە وە دەبینین کە باڵندەکان لەسەر لولەى تفەنگەکانتان بنیشنەوە و لەسێ بەرى مرۆڤەکان هەڵ نەیەن ، بەڵام ئێوە بە تفەنگەکانتان دەم کوتمان دەکەن ، کاتێک ئێمە قسە دەکەین و ڕەخنە دەگرین بۆ ئەوەى خۆتان پاک بکەنەوە لە ئەو کارەى کە پێى دەوڵەمەند بوون ، ئێوە بە دوژمون و بە جاسوس و بە خیانەتکارو بە تێک دەرى ئەمن و ئاسایشى وڵات تاوانبارمان دەکەن و خۆتان دەکەنە فریشەتى فریاد ڕەس لەئێمە .

ئەوە 18 ساڵى تەواوە ،ئێمە هاوارتان لێدەکەین و داواى ئازادى دەکەین ، ئێوە بەندمان دەکەن و سوکایەتى بەکەرامەتمانەوەدەکەن ، 18 ساڵە داواى خۆشنودى و سەربەستى دەکەین ، 18 ساڵە هاوار دەکەین ، بەسە گەندەڵى ، بەسە کورسى پەرستى ، بەسە ...تد ، ئێوە گۆمان لێناگرن ، ئێستا ئێوە دەپارێنەوە داواى بەخشین دەکەن ، ئێوە دەپارێنەوەو داواى دەنگ دانمان لێدەکەن ، کەچى لەمەشیاندا ڕاست نافەرمون و دروشمەکانتان پڕە لە وەهم ، ئامانجەکانتان پڕە لەفێڵ و خۆَلڕکردنە چاو ؟! .

لە 25/7 دوبارە خەڵکى کوردستان هەموتان تاقى دەکاتەوە ، لەم سەرى چەپ بۆئەوسەرى ڕاست لە ئیسلامیەکانەوە تا عیلامانیى کان ، تابۆئەوەى بزانن تاچوار ساڵى ئایندە چەند پرسیارى ترى هاوشێوەى ئەم پرسیارانە دووبارەدەبێتەوە و کام لە ئێوە لەگەڵ دروشم و بانگەشەکانى خۆیدا ڕاستگۆیانە بەردەوام دەبێت .