دوو هەڵوێستى جیاى دوو موستەشار لە زیندان دا.

هیواڕەش    

بە گێڕانەوەى سەربردەى گرتنەکەم سەرتان نایەشێنم کە چۆن خیانەتکارێک فرۆشتمى ؟ ! بەڵام پێم باشە بۆ مێژوو باس لە هەڵوێستى دوو موستەشارى جاش بکەم کە ئەوانیش کاک سمایل ئاغا و خالیدى خولە سوور بوون .

سمایل ئاغا ، پیاوێکى بە تەمەنى پێم وابێت خەڵکى دەور و بەرى ڕانیە و قەڵادزە بوو ، ئەوەندەى ناسیم هەر دووراودوور بوو هیچ پە یوەندییەکى نزیک لە نێوانمان دروست نەبوو تەنانەت ڕێ نەکەوت پێکەوە قسەش بکەین .

(جناح خاص) ، ئەو شوێنە بەدناوە بوو منیش وەکو سەدان ڕۆڵەى گەلى کورد چوومە خزمەتى ، جێگایەکى هێندە ناخۆش بوو لە باس کردن نایەت بە تایبەتى بۆ من ، چونکە لەبەر ئەوەى پێشمەرگە بووم و بە بریندارى بەردەستیان کەوتبووم لە هەموو مافێکى ئینسانى بێبەشیان کردبووم ، نەشتەرگەرى ( کۆلۆستمى ) کرابووم و لەقەبرغەوە ( لاى ڕاستى سکمەوە ) پیساییم ئەکرد ، لە ژێر ئەشکەنجەش دا کەمم پێ نەکرابوو ، ئەو کاتەى منیان گواستەوە بۆ ئەوێ ( کیسە – کە بۆ پیسایى بۆم دانرابوو ، دیتۆل – کە بۆ پاک کردنەوەى ڕیخۆڵەى دەرچووم لە لا سکمەوە پێم درابوو ، شاش – بۆ سڕینەوەى ڕیخۆڵەم ) ئەمانەم هەموو لێ سەنرابۆوە ، لەو شوێنە وام لێ هاتبوو ڕیخۆڵەم کێم و کەفى ئەچڕى ، بەهەرحاڵ کە گواسترامەوە بۆ ئەوێ پێشتر زانرابوو پێشمەرگەیەکى دیل بەڕێوەیە ( نازانم چۆن زانرابوو ؟ ) بەڵام ئەمەم لە دەمى زیندانییەکانى ترەوە بیستەوە ، هێشتا تازە گەییشتبوومە جێ و کەسیشم نەئەناسى ، هێندەى نەبرد چاودێرى هۆڵەکە کە عەرەبێکى خەڵکى بەغابوو بە ناوى ( عودەى ) پێنج دینار ( سویسرى ) و بوتڵێک شەربەتى بۆ هێنام و ووتى ( ئەوە کاکە سمایل بۆى ناردووى ) ، پێش ئەوەى وەرى بگرم پرسیارى ئەو کاکە سمایلەم کرد ، ئەو زیندانییانەى منیان بردبووە لایان ووتیان : سمایل ئاغا بۆى ناردووى لێ ى وەرگرە ، ووتم سمایل ئاغا کێ یە ؟ ووتیان موستەشارە گیراوە و لێرەیە ، بە تەنازولم ئەزانى دواى ئەو هەمووساڵانى خەباتى پێشمەرگایەتى و بە ڕەنگابوونەوەى زیندان ئێستا سەرشۆڕ کەم بۆ 5 دینار و بوتڵێک شەربەت بۆیە ڕەتم کردەوە و بە عودەیم ووت بۆى ببەرەوە ، برادەرەکانى ئەوێ لەگەڵ ئەوەى زۆر وەسفى سمایل ئاغایان دا لەهەمان کاتیش دا تکایان لێ کردم نەینێرمەوە چونکە بۆ من و بۆ ئەویش جوان نیە ، لەدوایى دا منیش بە قسەیانم کرد . لە دوایى دا بۆم دەرکەوت مام سمایل هەتا بۆى کرابێ لەوێندەرێ ڕۆڵى باوکى گێڕاوە بەرامبەر هەموو زیندانییەکان بە گشتى و کوردەکان بە تایبەتى ، ئەوەندە لە سمایل ئاغا تێگەییشتم کە لەو بار و دۆخە ناهەموارەدا ئەوەى لەدەستى هاتبێت لە پیاوەتى ئەنجامى داوە و منیش نامەوێ لێرەدا پێیدا هەڵ بدەم جگە لەوەى وەکو بیستوومەتەوە کۆچى دوایى کردووە کە بڵێم : ( یادى بەخێر ) .

پێش ئەوەى بمبەنە ئەو جێگا بەدناوە ماوەیەکیش لە ( سجن رقم واحد ) بووم ، لەوێدا خالیدى خولە سوورم بینى ، سەرى بچوایە نوێژى ناچوو ، بەڕماڵێکى پێ بوو حەزى ئەکرد دەورەى بدەن ، خەریکى شى کردنەوەى خەو و خەون بینین بوو ، دیار بوو زانیاریى لەسەر منیش دەستکە‌وتبوو ، لەگەڵ ئەویش دا تێکەڵاوییەکم نەکرد بوو چونکە چۆن سەربارى پیاوەتییەکەى سمایل ئاغا بە نەنگیم زانى شتەکانى وەربگرم ، ئەمیش هەروەها پێم نەنگ بوو دوور و نزیک پەیوەندییەکى لە گەڵ دا ببە ستم لەبەر ئەوەى سەنگەرمان جیا بوو ، لەوەندە بترازێ جارێکیان لێى پرسیم : بە بریندارى گیراوى ، ووتم : بەڵێ ، وامزانى عاتیفە و سۆز هانى داوە ئەو پرسیارە بکات ، بەڵام بە ڕستەى دووەمى دواى پرسیارەکەى ئینجا زانیم چەندە دڵڕەشە کە ووتى : ئینجا عەیب ناکەیت کەوتوویتەتە دواى ئەو هەتیو و مەتیوە ، منیش هەر هێندە وەڵامم دایەوە : خۆ جاش نەبووم .

لە دوایى دا ئەوە ماوە بیڵێم ئەگەر ( کۆمەڵەى پێشمەرگە دێرینەکان ) لە حیزباندن خۆیان پاک نەکەنەوە ئەوا جاشە دێرینەکان جێگە بە پێشمەرگە دێرینەکان لێژ ئەکەن ، تکام وایە هەرچى خائین هەیە با پیرۆزى حیزبەکان بن و مەهێڵن حەرەمى ( شەهیدان و ئەنفال و زیندانى سیاسى و پێشمەرگە و ڕێکخسنە دێرینەکان ) گڵاو بکەن .

تێبینى: نەمویستووە هەموو شتێک بنووسم بۆیە هەرکەسێک تێبینییەکى لە سەر نووسینەکەم هەبێت ناهەقى ناگرم ، منیش ئامادەم ڕوون کردنەوەى زیاتر بدەم لە سەر بار و دۆخى زیندان ، بە تایبەتى بوونى پارە و شەربەت لە (جناح خاص).
 

hewarash1@yahoo.com