په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک

٢٦\٢\٢٠١٢

هەڵسەنگاندنی نامەی وەزیری ئەوقاف و کاروباری ئاینیی بۆ په‌رله‌مانی هەرێم.

 

هێمن


کامل حاجی عه‌لی وەزیری ئەوقاف و کاروباری ئاینئئ لە ڕێکەوتی ١٩\١٠\٢٠١١ نامەیەک بە هاوپێچی پرۆژەیەک کە دەڵێ لەلایەن هاووڵاتیان تەسلیمی کرابوو و سەبارەت بە یاسا و شەریعەتی ئیسلامی له‌ هەرێمی کوردستانە ڕەوانەی په‌رله‌مانی هەرێمی کردوە وە داوای هاوکاریی یەکەیەکی ئەندامانی په‌رله‌مانی ده‌کا بۆ جێبەجێکردنی ئەو پرۆژەیە.


هەرچەند دەقی پڕۆژەکە ئاشکرا نەکراوە، ئایا ئەو پرۆژیە پەیوەندی بە چیەوە بووە، بەڵام بەو حاڵەشەوە بەرلە هەڵسەنگاندنی ئەم نامەیە، جێ خۆیەتی ئەو پرسیارانەی خوارەوەی ئاراستەی جەنابی وەزیر ئەوقاف و کاروباری ئائینی بکرێ.


یەکەم: ئایا جەنابی وەزیر، وەزیری دەوڵەتی شەشەمی هەرێمی کوردستانە یان وەزیری حیزبێکی ئیسلامی بۆ پڕۆپاگەندەکردنی ئاینی ئیسلامی لە هەرێمی کوردستان؟
دووه‌م: ئایا ئەو کەسانەی کە ئەو پێشنیازە یاخود پرۆژەیان پێشکەش بە جەنابی وەزیر کردوە کێن و ڕێژەیان چەند کەسەن؟ ئایا ئەوانە بەشی زۆرینەی خەڵکی کوردستانن یاخود لایه‌نگرانی حیزبەکه‌ین؟
سێیه‌م: ئایا وەزیری ئەوقاف و کاروباری ئاینی لە هەرێمی کوردستان پرسیاری هەموارکردنی کاروباری ئەوقاف واتە حەج و هتد... لە هەرێمە، یان بەرپرسی پێراگەیشتنی وەزاەرەکەیەتی تاکو دەستێوەردانی یاسا و کاروباری په‌رله‌مان و هاندان و ورژاندنی خەڵکانی ئاینیی؟
چوارەم: ئایا ئەو شێوە هەڵوێستگرتنی جەنابی وەزیر دەستێوەردان لە کاروباری کارگێڕیی په‌رله‌مان و هاندان و وەگه‌رخستنی ئاڵۆزیی و ناکۆکی و نانەوەی ئاژاوەی لە هەرێمی کوردستانی لێناکەوێتەوە؟
پێنجه‌م: ئایا وەزیریک بەو جۆرە لێدوان و داواکردنی لە په‌رله‌مان نابێتە هۆی هاندنی خەڵکانی موسڵمانی هەرێم و ئاوا چوارچێوەی بەرپرسیارەتی وەزارەتەکەی نەبەزاندوە؟


ئایا په‌رله‌مان نەدەبووا وەزیری ئەوقاف و سەرۆک وەزیران بۆ روونکردنەوەی ئەو واوتنەی وەزیرەکەی و دەستێوەردان لە دەستووری هەرێم بانهێشتن بۆ په‌رله‌مان بکا؟


سەیر ئەوەیە وەزیری ئەوقاف و کاروباری ئاینیی هەرێم دەڵێ ئەگەر یاسایەک لە هەرێمی کوردستان دەربچێ پێویستە:
"شاراوە نییه‌ لە لاتان خەڵکی ئەم هەرێـمە زۆرینەی موسڵمانە کە یاسایەک دەردەچێت ئەبێت لەگەڵ (ثوابت) ئیسلامی دا پێچەوانەی نەبێت".


لە درێژه‌ی نامەکەدا دەڵێ:
"لە دەستوری عێراقی نوێ دا هاتووە نابێت یاسایەک دەربچێ (مخالف) بێت لەگەڵ (ئەحکام) ە نەگۆرەکانی شەریعەتی ئیسلام هەروەها لە گەڵالەی دەستوری هەریمەکەماندا بەهەمان شێوە دانراوە. نەخوازین سەیرێکی یاسەکە بکرێتەوە وای لێبکرێت کە پێچەوانەی نەسی قورئان و فەرمودەی سه‌حیحی پەیامبەر (محمد) (صلی الله عیلە و سلم) بێت".


جەنابی بەڕێز وەزیر ئەوقاف کامل حاجی عه‌لی پێوایە کە هەنووکە ڕۆژەکانی سەرتای دروستبوونی ئیسلامە، هەرێمی کوردستانیش پێویستە بە پێی شەرع و شه‌ریعەتی نەگۆرەکانی ئیسلام ئیدارە بکرێ.


وشە نەگۆرەکانی شەریعەتی ئیسلامی هەموو رەوەندیک و ڕێبازێکی ئازادایخۆازنەی پێشێل دەکا، جەنابی وەزیر ی ئەوقاف بەو واوتنەی هەموو مافەکانی تاک سنووردار دەکا و هیچ مەودایەک بۆ هەڵسوڕانی ئازادیخوازانەی تاک ناهێڵێتەوە، ئەوەش ئەو سیاسەتەیە کە نیزامی ئیسلامی شیعەی ئێران لە ناوچەکەدا کۆششی بۆ ده‌کا.


بەڕێزیان ئاگاداری ئەوە نیین کە ئەمڕۆ، مروڤ لە تەوەری ئینته‌رنێت، فه‌یسبووک و سکایب، قۆناغێکی پێشکەتنخۆازانەی ئەلکترۆنیکی دا دەژیی، تاک یەکلاکەرەوەی دەستووری بەڕێوەبردن و کارگێڕی لە ڕێبازی نیزامەکانی مەدەنی پێشکەوتنخوازانەیە.


بەڕێزیان وادیارە ئاگاداری هێزی یەکلاکەرەوەی مافی ڕا و بۆچوونی تاک نیین کە لە باوەڕی ساڵەکانی سەرەتایی ئیسلام دا بیردەکەنەوە.


میللەتی کوردیش هەروەکو هەموو میللەتانی تری خەرەی زەوی گەیشتۆتە ئەو بوارە کە پێویستیان بە ڕێنوێنیی مام وەستاکانی ئاینی نییه‌ و ئیتر ناوەێت زەکات بدەنە مەلاکان بۆ چەوساندەنەوە بەلاڕێدابردن و بەرەودواوه‌ هه‌نگاونان.


کورد ئیتر پێویستی بە (سه‌لاحه‌دین ئه‌یوبی)ێکی دیکه‌ نییه‌ کە به‌یداخی عەرەب هەڵگری بۆ تێهەڵسوران وە بڵاوکردنەوە ی ئیسلام لە ڕۆژهەڵاتی ناوەڕاست، ئیتر کورد نایه‌وێت زیاتر لەوە بەبێتە ژێر دەستی ئیسلامی عەرەب و فارس و تورک، ئەوەی کە هەنووکەی لە لایەن حیزبە ئیسلامییه‌کانی هەرێمی کوردستان پرۆپاگەندەی بۆ دەکرێ.


میللەتی کورد زیاتر لە هەموو کاتێک هەنووکە پێویستی بە ڕێکوپێککردنی ناوماڵی خۆی هەیەتی، دەوڵەتی حەوتەم پێویست دەستپێکەری بە ڕێکوپێککردن و بە ئیستیتوشونالیزم کردنی کوردستان بۆ بەربەرەکانی کردنی ئەو جۆره‌ بیربۆچوونانە واتە بیردۆزی کۆنەپەرەستی جەنابی وەزیری ئەوقاف بێ.


کورد بەر لە هەموو شتێک پێویستە بیر لە هەست و سۆزی نەتەوەیی خۆبکاتەوە، ئائینش شتێکی شەخسییە، نە دەستووری وڵاتێک.


بە ئنستیتوشونالیزم کردنی هەرێم، بە واتایەکی تر بە ڕێکوپێککردن و سازماندانی هەرێم بە گشتی و بە تایبەت کەرتەکانی دەوڵەتی ئەرکی هەرەگرنگی دەوڵەتی حەوتەمە، بە داخەوە ئەو مەسەلەیەی لەکاتی دەوڵەتی د. بەرهەم بە هۆی ناکۆکی نێوان یەکێتی و گۆران جێبەجێ نەکرا.


لە د.بەرهەم لانی کەم جێبەجیکردنی ئەرکی سازماندانی دەزگای بەڕێوەبردنی لێ چاوەڕوانی دەکرا، لەبەر ئەوەی بەڕێزیان چەندین ساڵ لە وڵاتانی خاوەن نیزامێکی ڕێکوپێک و سازماندرا و ژیاون.

 
کارگێڕیی و بەڕێوەبردنی دەزگای ئیداری ئەو کاتە مانایە هەیە و لە خزمەت بەشی زۆرینەی خەڵک دایە کەسازماندان و رێکوپێکی تێیدا بێ و زانایان و پسپۆڕان و کارناسان و شارەزایان ئەرکی بەڕێوەبردن و کارگێڕیی دەستووری وڵاتیان پێ سپاردرابێ.


کێشەکانی هەنووکەی کوردستان و بەردەوامی دەزگای ئیداریی و پێشگرتن لە ناڕیکۆپێکی و کەموکۆرییەکان و لەبەنبردنی گەندەڵیی تەنانەت بە دامەزراندنی سیستەمێکی سازماندار و ڕێکۆپێکی ئیداریی واتە بە ئنیستیتوشونالیزم کردن نیزامی ئیداریی و بەڕێوەبردن لە کوردستان چارەسەری دێ.


هیوادارین دەوڵەتی حەوتەم بتوانێ لەو بوارەدا هەنگاوی گرنگ بنێ و کوردستان لە ناڕێکوپێکی و بێ نەزمی و بیرۆکراسی ئیداریی رزگار بکا.
 

٢٤\٢\٢٠١٢

ماڵپه‌ڕی هێمن

 

 

 

په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک