١٤\٧\٢٠١١

هێشتا تارمایى خۆفرۆشیى بەرۆکى هەتیوەکانى (شێخ مونیف)ى بەرنەداوە.

هیوا ره‌ش     

دواى خوێندنەوەى هەواڵى خۆپیشاندانى هەندێک لە جوتیارانى گوندەکانى (گورزەیى، گەڵۆزى و کتکە)ى سەر بە شارۆچکەى پردێ و دوورەپەرێزیى هەندێک حیزب لەو ناڕەزایەتییەى جوتیاران دەریان بڕیوە لە مەڕ ئەوەى کە چەند پارەدارێکى کورد (1100 - هەزار و سەد دۆنم) زەوییان لە شێخ مونیف ناوێکى عەرەب کڕیوەتەوە، لێرەدا بەر لەوەى بچمە کرۆکى هەندێک زانیارى تر، دەمەوێ بپرسم:

1 - ئایا عەرەبێکى کۆنە بەعسى ، 1100 دۆنم زەوى لە کوێ بوو ؟ چۆنى بە دەست هێناوە ؟ لە ناوچەیەکى تەواو کوردنشین و سەر بە هەرێمى کوردستان ، ئەگەر بە سیاسەتى - تەعریب - بە دەستى هێنابێت ! هەقى وا نیە پێڵاوى جوتیارانى ئەو گوندانەى بۆ بکرێت بە میدالیا و وەکو - ویسام - ى سەرۆکە گۆڕبەگۆڕەکەى لە جیاتى بەرۆکى لە نێوچەوانى بدرێت ؟
2 - ئایا ئەو کوردە پارەدارانەى زەوییەکەیان لێ کڕیوەتەوە هەست و ویژدانیان چۆن ڕێگەى پێداون ؟ ئەگەر پارەپەرستییان خستۆتە سەرووى بەرژەوەندیى نەتەوەکەیانەوە ، هەق نیە ڕێگەیان بدرێت هەواى کوردستان هەڵمژن ، چونکە ئەمانە مەترسین بۆ سەر ئاساییشى نەتەوەییمان و بۆیان بلوێت سەودا بە هەموو بەها نەتەوەییەکانمانەوە دەکەن و لە پێناوى قازانجى خۆیاندا نەک خۆیان ، بەڵکو گەل و نیشتمانیش دەفرۆشن .
3 - ئایا حکومەتى هەرێم هەڵوێستى لەمەڕ دیاردەیەکى مەترسیدارى ئاوهادا چى دەبێت ؟ ئەگەر سوارى کەر بێت و سەیرى بازاڕ بکات ! ئەوا هەقى وایە هەموومان پشتیوانى جوتیارە بەشخوراوەکانى خۆمان بین و پێڵاوەکانمان بکەینە دیاریى بۆ بەرۆکى شێخ مونیف و موشتەرییەکانى ، هەروەها حاشا لەو حکومەتەش بکەین کە لە ئاستى پرسە نیشتمانییەکاندا قڕوقەپ هەڵدەبژێرێت .

پێم وا نیە پرۆسەى - تەعریب - وەستا بێت ! چونکە جگە لەوەى بە شێوەیەکى نهێنیى تەعریبى کەرکوک لە برەودایە و بەردەوامە ، لە هەمان کاتیشدا ئەو زۆڵە کوردە خۆفرۆشانەى لە سەردەمى بەعسدا ملیان بۆ پرۆسەى - تەسحیح قەومیە - ى بەعس پان کردبۆوە و نکوڵییان لە کورد بوونى خۆیان کرد و سەریان شۆڕەوە کردە ناو ئاخوڕى تەویلەى عەرەبچێتییەوە ، لە باتى ئەوەى پەشیمانیى دەرببڕن و داواى لێبوردن لە گەلەکەیان بکەن و کڕنوش بۆ شڕە نەعلە دڕاوى پیرەدایکى شەهیدان ببەن ، کەچى بێشەرمانە ، دەرونهەرزانانە - ملکەچ و ملهوڕانە ، گیرفانى خۆیان بۆ بەخششى خۆبەعەرەب کردنەکەیان کردۆتەوە و پارەوپولى تێ دەئاخنن ، ئەوەى خوارەوە ناوى هەندێک لەو کەسە ناکەسبەچانەیە کە بەخشیشیى خۆفرۆشییان پێدراوە و کەسیش پێیان ناڵێت بەرى چاوتان برۆیە:

1 - حسێن عەبدولکەریم ئەحمەد ( جێگرى ئاساییشى پردێ - پارتى ) .
2 - حەسەن عەبدولکەریم ئەحمەد ( موقەددەمى پۆلیسخانەى پردێ - پارتى ) .
3 - ئەنوەر ڕەشید عەلى ( مفەوەزى ئاساییشى پردێ - یەکێتى ) .
4 - نەعمان سلێمان محەمەد ( ئاساییش لە پردێ - یەکێتى ) .
خۆش ئاساییش و پۆلیس ، ئەمانە پەرێزەرى گەل بن ، سەد ڕەحمەت لە شێخ مونیفەکەیان ، تۆ بڵێى شێخ مونیفەکانى پارتى و یەکێتى لەمانە بێئاگا بن و لە گوێى گادا خەریکى خەون بینینى دزى و گەندەڵیى نەبن ؟ !
5 - ئازاد حەسەن یابە .
6 - ئاشتى نەسرەدین ئیسماعیل .
7 - توانا لەتیف ئەحمەد .
8 - جەلیل ئەمین محەمەد .
9 - حەسەن یابە حەسەن .
9 - عەبدولکەریم ئەحمەد کەریم .
10 - خەلیل ئەمین ئەحمەد .
11 - سەرکەوت محەمەد هادى .
12 - شەوقى محەمەد هادى ( کۆنە ڕەفیق حیزبى ) .
13 - دەشتى نەسرەدین ئیسماعیل .
14 - هونەر جەوهەر محەمەد جیهان .
15 - لەتیف ئەحمەد کەریم .
16 - شلێر عەبدولقادر نەجمەدین .
17 - ڕەسمیە عومەر تایەر .
18 - لوقمان نەسرەدین ئیسماعیل .

ناوەکانى سەرەوە هەندێک لە زڕبرا کوردەعەرەبەکانى ناوچەى پردێن کە هەریەکەیان لە پاداشتى خۆفرۆشییاندا خەزنەى ئاغاکانیان بۆ واڵا کراوە و بۆ چەند ملیۆن دینارێک ویژدانى خۆیان خستۆتە هەڕاجخانەوە و عەرەبچێتییان دەمەزەرد دەکەنەوە ، ئەمانە هەر ئەوانەن کە لە کاتى خۆیدا لە مانگنامەى ( کۆڕى تێکۆشان ) زمانحاڵى حیزبى شیوعى کوردستان - باشوردا ، هەندێک زانیاریمان لەسەر داگیر کردن و دەست بەسەردا گرتنى زەوى جوتیارانى ناوچەکە و وەرگرتنى پەیین و دەرمانى کشتوکاڵى و ئاوپرژێنمان لە بارەیان بڵاو کردەوە و بە تەما بووین دەسەڵاتدارانى کوردستان لێپرسینەوەیان لەگەڵدا بکات ، کەچى نەک هەر بێدەنگییان دەرهەقیان کرد ، بگرە کردوویانن بە پیاوماقوڵى حیزبەکانیان و لە دەزگا حیزبى و ئەمنییەکانیاندا بەگەڕیان خستوون ، بۆیە ئێستاش بێ ڕووگیرى ، ڕووقایمانە گیرفانى خۆفرۆشیى گەرم دەکەن !

خوێنەرى خۆشەویست ، ئەم کردە قێزەونانە تەنها لە پردێ لە کاردا نیە و لە گەلێک ناوچەى ترى وەکو داقوق و دوزخورماتوشدا سەرقاڵى گەرا دانانە ، ئەگەر دەستم کەوت ، وە یان هەر نەتەوە پەرۆشێک زانیاریى لەمەڕ هەر نەتەوە فرۆشێک دەست کەوت ، چاوى ماچ دەکەم لێیان بێدەنگ نەبێت و بڵاوى بکاتەوە بۆ ئەوەى خۆیان و ئەوانەى چاویان لێ دەپۆشن و ئەوانەى پشتگیریشیان لێ دەکەن ڕیسوا بکەین ، ئەگەر هەر جوامێرێک و لەبەر هەر هۆیەک بێت نەیتوانى بڵاوى بکاتەوە وپێویستى کرد ، با بینێرێت بۆ ئیمێڵەکەم و بەندە بە ناوى خۆمەوە بڵاوى دەکەمەوە ، (( ئەوى لە هەق بێدەنگ بێت ، شەیتانێکى کەڕە )) .

ماڵپه‌ڕی هیوا ره‌ش