٢٣\٢\٢٠١١
کۆبوونەوەی
حیزبەکان و دووبارەبوونەوەی سیناریۆی
شکستخواردووی تونس و میسر.
عەلی مەحمود محەمەد
بڕیار بوو ئەمڕۆ 5 حیزب لە شاری هەولێر کۆببنەوە ، دووی دەسەڵات و
سیانیش بە ناو ئۆپۆزسیۆن بۆ گفت و گۆ کردن لە سەر چارەسەرکردنی کێشەکان
و گەڕانەوەی ئاسایش بۆ شاری سلێمانی و دەورو بەری .
لێرەدا پرسیارێک دێتە پێشەوە ئایا ئەو لایەنانە مافی ئەوەیان پێدراوە
کە لە بری خەڵک لە پشت مێزەکانەوە و لە ژورە داخراوەکان قسە بکەن لە
سەر کێشەکان لە کاتێکدا خاوەند کێشەکان لە بەر لێزمەی بارانن و لە تاو
بێکاری و برسێتی لە وتنەوەی درووشمەکان ماندوو نابن .
ئەم 5 لایەنە لە یەکەم چرکە ساتەکانەوە هەموو خۆیان بێ بەری کرد لە
خۆپیشاندانەکە یاخود ئەوانە بوون بەرەو رووی بوونەوە بە ئاژاوەگێڕ و
تێکدەر ناویانیان برد ، ئیتر بە چ ئابرووییەکەوە دێن لە بری ئەوان لە
ژورە داخراوەکانەوە لە سەر مافەکانیان قسە دەکەن ، لە 17 ی مانگەوە بۆ
ئێستا مێژووییەکی هێندە دوور نییە لە بیر بچێتەوە .
لە تونس و میسریش هەمان سیناریۆ بەردەوام دووبارە دەبوەوە ، بن عەلی و
موبارەک بەردەوام لە گەڵ پارتە بەناو ئۆپۆزسیۆنەکان کۆ دەبوونەوە بۆ
چارەسەر کردنی کێشەکان ، بەڵام خەونەکانی شەقام بەو گفتو گۆیانە
چارەسەر ناکرا ، خەڵک وێڵی ئازادی و دادپەروەری و کەرامەت بوو .
ئێمە هەموو لە گەڵ ئارامیداین ، نەفرەت لەوەی ئارامی دەشێوێنێت ، باش
دەزانین مناڵی سەرکردەکان بە دەسەڵات و ئۆپۆزسیۆنەوە هەموو لە شوێنە
ئارامەکان پارێزراون ، ئەوانەی دەکوژرێن بەچکەی هەژارن و جگەر گۆشەی
ئێمەن ، ئەوەی ئەوان زیانی لێ دەکەن لە نا ئارامی بازاڕ و ئیمتیازات و
دابەزینی نرخی سەروەت و سامانەکانیانە ، ئەگەر بە راستی دەتانەوێت
کوردستان ئارام بێت ئەوا گوێ لە خەڵک بگرن ، کەرامەتیان مەشکێنن و
برسیان مەکەن ، بنەماڵە لە دەسەڵات دوور بخەنەوە ، نان لە قورگی حیزب
دەرکەن .... ئاخر ئێمە تاوانمان چییە لەوەتەی هەین هەر ئەو دەموچاوانە
دەبینین شەڕمان پێدەکەن و مفاوەزاتمان لەسەر دەکەن ، ئێوە بەردەوام
هاورێن ، یان دوژمن ، بە کوشتمان دەدەن ، دەمان خەنە بەر گازی خەردەل ،
ئێمە بووینەتە رۆبۆت بۆ گەمە نا شەریفانەکان ئێوە دەبڕۆن نەتان
بینینەوە ، قێزمان لەو چاوانە دەبێتەوە ئێوەی پێ دەبینین ، باسە گەمە
شەرمەزارییەکانتان .
لە کۆتاییدا دەڵێین نەک 5 حیزب ، 500ی لەو جۆرەش کۆببنەوە تا چارەسەری
کێشەی خەڵکی هەژار نەکەن ، ئەوا ئیتر ناتوانن لەسەر عەرشی دەسەڵات و
سەرمایەکانتان پاڵ دەنەوە بە ئارامی ، کورسی بۆ کەس تا سەر نامێنێت ،
تاکەی بۆ حەکایەتە دووبارەکان ئێوە ببین بە قوربانی ،ئەو کێشانەی ئێمە
هەمانە لە برسێتی و هەژاری و بێکاری ، لە ئاوو و کارەبا ، لە کەرامەت و
سوکایەتی پێکردن ..... کێشەی ئێوە نییە ، تەنها لە شاشەکانەوە دەیان
بینن ، کێشەی ئێوە تەنها کێشەی گیرفانەکانتان و کورسییەکانتانە.
ماڵپهڕی عهلی مهحمود محهمهد
|