په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک

٤\١\٢٠١٢

لێژنه‌ی لێکۆڵینەوە، کەناڵێک بۆ داپۆشینی دۆسیەکان، سکاڵاکان، تاوانەکان.


عەبدوڵا مەحمود    


دوای فتوای مەلا و نەفرەتی ئیسلامیەکان کە سوتاندنی شوێنەکانی شێلان و دوکانەکانی مەیفرۆشیی و چەند ئوتێل و شوێنی گەشتیاریی و سوتانی بارەگاکانی یەکگرتووی لێکەوتەوە، و زیندانیکردن و راوەدونانی لە هەندێک ناوچەی بادینانی ژێر دەسەڵاتی پارتیدا بەدوای خۆیدا هێنا... سەرۆکی هەرێمی کوردستان! لێژنه‌یەکی لێکۆڵینەوەی بۆ بەدواداچوونی! رووداوەکان پێکهێنا.


لێژنه‌کەی سەرۆک، ٢٥\١١\٢٠١١ راگەیاندنی کۆتایی کارەکانی خۆی ڕاگەیاند.


لە ٢٠ ساڵی رابردوودا کورستان سیخناغ بووە لە لێژنه‌ی بەدواداچوون کەچی بۆ یەک جاریش هیچ کەیسێکی بەئاکام نەگەیاندووەو تاوانباربوونی هیچ کەس و بەرپرسێکی حیزبی و حکومی! نەسەلماندووە. بەڵکە بۆتە کەناڵیک بۆ داپۆشینی دۆسییەکان، شکایەتەکان، تاوانەکان...تاد، نەخشە ڕیگای دەسەڵات بۆ شاردنەوەی تاوانکارییەکان و دیزە بەدەرخۆنەکردن و خاوکرنەوەی ناڕەزایەتی شەقام.


هەروەها لێژنه‌و لێژنه‌کاری لەبنەرەتدا لەکوردستان، کەناڵێکە درۆی یاساو بێلایەنییەکەی پوچەڵ دەکاتەوە. وە نیشان دەدات کە دەسەڵات و زۆری هێزی حیزبه‌کان لە سەرووی هەموو پرانسیبێکی یاساییەکانەوەیە و کەس لەسەروی دەسەڵاتی حیزب و بەرپرسە حیزبیەکانەوە نییەو یاسا تەنها چەکێکە بۆ سزادانی بێهیزەکان و ناڕازیانی کۆمەڵگا و خەڵکی دەستتەنگ و ئازادیخواز.


راپۆرتی لێژنه‌کەو کاردانەوەی یەکگرتووی ئیسلامی هێندە فریوکارانە ئامادەکراون، کە نیشان دەدات ململانێی کۆنەپەرستانەی نێوان بزوتنەوەی ناسیونالیستی کوردو ئیسلامی و رەوتە ئیسلامیەکان چەندە دژی ئینسانی و پڕ فریوکارییە. راپۆرتی لێژنه‌کەی سەرۆک مەتاتی هەڵگری دێژدادڕییەکی ئاگاهانەیە بۆ پێداگری لە راگەیاندن و هەڵوێستی پێشوویان ،کە لوت بەرزی و سەرکوتکەرییەکەی نیشان دەدات. هەروەها کاردانەوەی یەکگرتوو لە چواچێوەی هەمان غروردا کە بەهۆی کاریگەرییەکانی ئیخوانەکانی میسرو سوریا و رابونی تونسی، ئەو مافە بەخۆی دەدات کە بەدەنگێکی بڵندتر... نیگەرانیەکانی بەیان بکات و غەزەبی بەهاری عەرەبی نیشانی پارتی بدات.


بەم شێوەیە ڕاپۆرتەکەی لێژنه‌ی لێکۆڵینەوە و کاردانەوەی یەکگرتووی ئیسلامی هەردووکیان نیشان دەدەن کە چ هاندان و فتواو توندوتیژی نواندنەکانیان و چ گەمەی لێژنه‌و لێژنه‌کاری و ململانێی سیاسیان، دوو دیوی یەک پاکیجی جەنگی دەسەڵاتن.


بێگومان ئەوەی لەو نێوەدا دەبێتە بارمتەی ئەم فریوکارییە و ململانییە، خەڵکی زیان لێکەوتووی ناوچەکە و ئازادییەکان و ئازادی تاک و ئازادی هەلبژاردنی کاروکاسبی هاوڵاتیان و سیما جوانەکانی کۆمەڵگایە.


پارتی وەکو باڵێکی بزوتنەوەی ناسیونالیستی و بریار بەدەستی دەسەڵات لە کوردستان، و ئیسلامی سیاسی و رەوتەکانی تری... دوو ملۆزمی سەرەکی دژی ئازادی و مافە فەردی و مەدەنییەکانن.


ململانیی ئەم دوو رەوتە لە دۆخی سیاسی ئیستادا راستەوخۆ کاریگەری لە دۆخی شۆرشەکانی ناوچەکە، وەردەگرێت. وە ماهیەتی واقعیان نیشان دەدات و ئەم روپۆشە ساختەی دیموکراسی و میانەرەوی، لە روویان دادەماڵێت.


یەکگرتوو وەکو رەوتێکی ئیسلامی سیاسی لەساتی قوتبوونەوەیە لەکوردستان تا ئیستا، بانگەشەی شارستانی بوون! میانەرەویی...دەکات، بەڵام ئێستا بە تەخمینێکی هەڵە بۆ ڕووداوەکانی ناوچەکەو روانینی بۆ پایەگای رەوتە ئیسلامیەکانی وەکو ئیخوانەکانی میسرو سوریا...لەدڵی شۆڕشی بەردەوامدا غروری دەسەڵاتخوازی و نیشاندانی ملهوری نواندن نمایش دەکات تا دەسەڵاتی سیاسی لە کوردستان پایەگا و جێگاوڕێگایەکی باشتریان بۆ بەرەسمی بناسێ. ئەمەش بەرۆشنی نیشان دەدات کە یەکگرتوو هەرگیز هێزێکی ریفۆرمخواز یان میانەڕەو نییە، بەڵکە ریفۆرمخوازی و میانەڕەوی تاکتیکێکی ئەو و بەشێکی ڕێکخراوە دینییەکانن بۆ پێگرتن و گەورەبوون پاشان نواندنی توندوتیژی. پارتیش کەسەرو بنی زمانی باسی سەروەری یاسا، دیموکراسی، مافی مرۆڤ، فرەییە...تاد، لە دۆخی شەقامداگری کۆمەڵگادا و شۆڕشەکانی ناوچەکەو بزوتنەوەی نارەزایەتی خەڵکی کوردستاندا...ئەوپەری سەرسەختی هونەرەکانی ملهوری نواندن و سیناریۆسازی بەدەستەوە دەگرێت و پوچی بانگەشەکانی، دەکاتە قوربانی دیکتاتۆرییەتی بیپەردە بۆ پاراستنی دەسەڵات و قەڵەمرەویی سیاسی لەکوردستاندا.


ئاکامێک کە لێژنه‌ی لیکۆڵینەوەکان، دەیدەن بەدەستەوە، فۆرمێکی ئامادەکراوە کە بۆ هەموو روداوەکان و هەموو توندوتیژییەکان و هەموو تاوانەکان بەرامبەر بە ئازادی و خەڵكی کوردستان... دەست دەدات.


هاندان بووە، دەستی لەپشتە، کەم تەرخەمی دەزگا ئەمنیەکان دەرکەوتووە، هەڕەشە لە ئەزمونەکەمان هەیە، دەبی یاسا سەروەر بیت... ناوەڕۆکی هەموو راپۆرتەکانی لێژنه‌ی لێکۆڵینەوەیە لە کوردستان.


سیناریۆییە، بەروحی دەسەڵات نووسراوە، یاسایی نییە، بێلایەن نەبووە، نوێنەری ئێمەی تیادا نەبووە... ناوەڕۆکی تانەکانی یەکگرتوو ئۆپۆزیسۆنی بۆرژوازییە لەراپۆرتی لێژنه‌کانی لێکۆڵینەوەکان.


بەم شێوەیە کوردستان قانگدراوە لە تاوان و تاوانکاری و پاشانیش لێژنه‌ی لیكۆڵینەوە و تانەدان لە لێژنه‌کان و ئاکامی لیکۆڵینەوەکان!


ئەم سیناریۆسازی و مێژووە لە لێژنه‌و لێژنه‌سازی گەمەیەکی قێزەونی نێوان دەسەڵات و ئۆپۆزیسیۆنی ناڕازیی قەومی و ئیسلامییە... هیچ پەیوەندیەکی بە داواکاری خەڵکی کوردستان و تانەدانەدانی ئازدایخوازییەوە نییە لەم دەسەڵات و ئۆپۆزیسیۆنە کە هۆکاری سەرەکی ململانیی و توندوتیژی و جۆری کۆنەپەرستانەی دەسەڵات و هەڵوشینی پارو داهاتی دەمی خەڵکی کوردستان و پێشێلکردنی ئازادی و مافە فەردی و مەدەنیەکانن.


خەڵکی کوردستان، ئەزمونێکی درێژ و تاڵی لەسەر لێژنه‌کانی لیکۆڵینەوە، یاساو دادگاکان...هەیە. لە مێژووی ٢٠ ساڵەی دەسەڵاتی یەکێتی و پارتیدا، بە شەرو ئاشتییەوە، بەبەشداری ئۆپۆزیسیۆن و بێبەشدارییان... یەک بەرپرسی باڵای حیزب و حکومی و ئۆپۆزیسێۆنی خانەوادەی سەربەخۆیان بە تاوانبار ناوزەند نەکردووە راپێچی زیندان نەکردوە. لە کاتێکدا لە دۆسیەی جەنگە زنجیرەیەکانی دەسەڵاتەوە لە کوردستان تا دەگات بە فایلە کەڵەکەبووەکانی تاڵانی و دزی و ... تا دەگات بە بریاردان توندوتیژی و خوێنرشتن لە ناڕازیانی کۆمەڵگا، تا دەگات بە نۆکەرایەتی و جاسوسیکردن و خۆشخزمەتی و پێشلەشکری بۆ وڵاتانی ناوچەکە...خۆیان کاراکتەرو بەشدارو جێبەجێکەرو بڕیاردەر بوون.


بۆیە بۆ خەڵکی کوردستان و بەرەی ئازادیخوازی کۆمەڵگا، ڕۆشنە لێژنه‌کانی لێکۆڵینەوە بە ئەندازەی دەسەڵاتی تاڵانچێتی و دژی ئازادی لە کوردستان جێگای نەفرەتن.

 

ماڵپه‌ڕی عه‌بدوڵا مه‌حمود

 

 

 

په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک