٢٤\٣\٢٠١٤

  پێنج شیعر لە پێنج وڵات لە بەرواری جیا.

فه‌رهاد مازێ

    هێما.*
لە نێوانی پەنجەکانتا بمشارەوە
لەو دیو شەقام مەلە خۆشە
سبەی یەک دێ دەمشواتەوە
حەزم لە مەلەی ئەو دیو شەقامە
دەچمە ناو خۆڵ و ئاوەکە
دەبمە قوڕی پیشەسازی
نەوەی داهاتوو ورچێکم لێ دروست داکا.

______________________
* ساڵی ١٩٨٨ هەولێر - کوردستان.

    داگیرکەر.**
عەیامێ بوو
خەنە و گوو لێکتر دەخلیسکان
خەنە سووری لێکەوتەوە
گووش داگیرکەر.

_____________________
** ساڵی ١٩٨٨ بابل - عێراق.

    ئەزموون.***
بەفرە و
ئەمشەو لە ناو سەرم گۆڕێکی تر هەڵدەکەنن
دەستێکم لە شەڕدایە و
نیوەی سەرم شەهید دەکەن،
قاچێکم زیندانیی،
بەیانی زوو دەبەیەک پڕ ئاو دەکەم،
بۆ نیوەڕۆ
لە گۆڕەپانێک
بە نیوەی دەموچاوم
جگەرەیەک دادەگیرسێنم،
ئێوە
لە ژێر تاقیکردنەوەی نیوەی من دان.

_______________________
*** ساڵی ١٩٩٢ تورکیا.

    دەمامک.****
بەڕوو ئەسپ / وشتر قەسپ
خەبات فەرمان / هەنگاو ناڵە
ئاسن ئادەم / زمان پەرچەم
تۆ گوێت لێیە
باو و گۆرانی و فتق بوون
تف لە سەراب و سەقەت بوون،
زەمەن پەڕامووچەی دەم با
مریشک شێت
پێڵاو سەفەر
شەقام وەک بن هەنگڵی ئافرەت:
تۆ گوێت لێبوو
پێش ئەوەی کوندەپەپۆ هەڵنیشێ
شیرینیان کوشت،
پێش ئەوەی بگەمە ئێرەش
دڵمیان کوشت
تۆش پێت گوتم
ماچ، ئازادیی
زیندان، گەززە
ئاشتی، نوستن
کامیان هەڵدەبژێری و لەپێیکە.

________________________
**** ساڵی ١٩٩٥ فینیکس - ئەمەریکا.
 

    بەدبەختی.*****
لێوێک،
ددانەکانی خوارەوە دادەپۆشێ
لێوێک
ددانەکانی سەرەوە
دەم
قفڵی زمان
زمان
کلیلی دەم
بۆیە ددان بۆگەن دەکا
خاوەن زمانێکی ئەسیرە و
دەوێکی نەوسن.

___________________________
***** ساڵی ٢٠٠٦ پۆرتۆپەنیاسکا - مەکسیک.

ماڵپه‌ڕی فه‌‌رهاد مازێ