|
١١\١\٢٠١٥
تابلۆی
زامەکان.
ستار ئه‌حمه‌د
رۆحم به‌ته‌نیایی
خۆمه‌وه گرێداوه
گه‌واڵه‌یه‌کم...
به‌دوای رامووسانی ئه‌ستێره‌یه‌کا ده‌گه‌ڕێم
له‌ترپه‌ی ده‌نگی باران
چه‌ترێک له‌نوور ئه‌ده‌م به‌سه‌را
له‌گه‌ڵ به‌فری سه‌ر دیواره‌کان نم نم ده‌توێمه‌وه
نه‌پێیه‌ک به‌خشپه‌م له‌په‌نجه‌کانی ده‌ترازێ
رێگایه‌ک به‌نه‌مانم چوارچێوه‌ی ده‌دڕێنێ
نه‌زریوه‌یه‌ک کانیه‌ک ده‌خاته ناخمه‌وه
ئه‌ستێره‌یه‌ک به‌ژوانم نادره‌وشێته‌وه
ته‌نیایی له‌رۆحی ته‌نیام ئاڵاوه
نیگای وه‌کو ئه‌ستێره...
له‌پرشنگی خۆردا ونه
بسته خاکێکم...
له‌نێوانی ئه‌ستێره‌و هه‌وردا
داماوم بۆ چریکه‌ی ئه‌و مانگه‌ی
شه‌وانه ده‌روازه‌ی ژووره‌که‌ت ماچده‌کا
به‌دوای نهێنی رووناکی و
سیاچاره‌یی رێبواره‌کاندا وێڵه
قه‌ده‌رێکی شوومه
دابڕان...
ده‌ستی چاوه‌ڕوانی ببڕێته‌وه
په‌نجه‌ی رازه‌کان له‌برین هه‌ڵکێشێ
له‌تیله‌ی خۆزگه‌دا..
ورده ماچ...
دانه‌ی باران ..
تریفه‌ی خۆر...
شنه‌یشه‌ماڵ...
گوڵی که‌نار...
له‌بسکی خه‌م بدات
دورگه‌یه‌کم تاریک
پڕاوپڕ له‌کوشتن
مه‌ست به‌ته‌رمی دووگیان
په‌شۆکاو به‌کانی خوێن
ترساو له‌لرفه‌ی بروسکه‌ی گولله‌ی وێڵ
ئه‌مه ئه‌هریمه‌نی له‌خاچدانه
ته‌وێڵت به‌ئه‌سکڵی برین
هه‌ناوت به‌زه‌بری سێداره
چاره‌نووست...
به‌ئاورنگی ئالووده‌بوون بسپێرێ
ده‌ریایه‌کم له‌کانی عومرم وه‌ڕسم
زێدم چه‌که‌ره‌ی دوندێکی سه‌رسه‌خته
که‌ئاده‌مم ناسی....
به‌هه‌شتم له‌کیس چوو
گۆڕ بووه تابلۆی زامه‌کانم
گه‌ڵایه‌ک...
رووتبوونه‌وه‌ی پێبه‌خشیم
زمانم به‌پشکۆ هاته‌گۆ
کراسێکیان له‌ئاگر بۆ بۆدووریم ، لیمنابێته‌وه
هه‌تا ئێستا نزایه‌ک له‌پرشنگ
هه‌ناسه‌یه‌ک له‌عیشق
چرکه‌یه‌ک له‌تاسه‌ی نیشتمان
سترانی لێبورده‌یی....
به‌سه‌ر ده‌روونما نه‌چڕیوه
بۆیه شه‌وانه له‌خۆم وه‌ڕسبم
سپێده...
به‌دوای رۆحی خۆمدا بازئه‌ده‌م
له‌گه‌رووی برینا سه‌ر خه‌وێک ده‌شکێنم
پێپه‌تی ردێنی هه‌ور ده‌گرم
ده‌ستم ناگاته پرشنگێک
بۆ ئه‌وه‌ی له‌سێبه‌ری باڵای خۆمدا
په‌نجه‌کانم بژمێرم
ته‌مه‌نی هه‌نگاوه‌کانم نازانم
بێئاگام له‌پشکۆی ئه‌و رێگایانه‌ی
ساتێک گه‌رمی نه‌کردینه‌وه
ئه‌مێستا میوانی شه‌واره‌ی سه‌ره‌ڕێی
منیش له‌به‌رده‌م...
خانه‌قای یه‌زدانا راوه‌ستاوم
ده‌ستێکم رۆحی بزێومی داگیرساندووه
ده‌سته‌که‌ی تریشم....
گه‌ردنی تاریکی..
کردووه به‌کاتژمێری دیوارێک
به‌ته‌قه‌ی ده‌رگایه‌ک شادنه‌بووه
شه‌ونوێژێک له‌پاڵیدا نه‌کراوه
بۆیه تینوو به‌وێردی ده‌ف وسۆز
ده‌روێشی رێگرتووی مه‌زاری عه‌شقی تۆم
دێوانه‌م وه‌ک ئه‌و موریدانه‌ی
له‌لانکا عه‌وره‌تیان ده‌بڕن
به‌نینۆک ناوکیان ده‌تاشن
تامه‌زرۆم وه‌ک ئه‌و شێتانه‌ی
له‌گۆشه‌ی کووچه‌کان
له‌خه‌ڵکی ده‌ڕوانن
چاوه‌ڕێی نانێ ره‌ق
یان بزه‌ی لێوێک و شه‌وباشن.
star.ahmad62@ymail.com
|
