٣\١٠\٢٠١٧

  خەون.

نەژاد عەزیز سورمێ

(شەو) لە ژێر لێفەی ھەوران ئارامی گرتووە..
ئاوازی باران پروشان.
شازادە چاوی بە کڕێوە ڕشتووە..
قامیشی لێواری (ئابزۆ)ی پۆشیوە..
بەخشڵی پەرستگای پایزیی (نینئەننا) خەمڵێوە..

بەیانی بەم شکۆ و بەرزییەوە
باران دێ کێشمانەی خۆی دەدا
چارۆگەی ڕێژنەدار،
بە کێڵگەی سکداوی دموزی دادەدا..

(ڕۆژ) لە ژێر ساماڵی چاوی گەش کەوتووە..
کڵپەی گیان سووتان.
شازادە ڕووت و قووت
لەبەردەم حەفتەمین ئاستانە،
بارانی پشکۆی لە چاوە..

ھەر بینا شەو داھات
ھەر بینا تریفەی حەوتڕەنگی شازادە،
ختۆکەی شەوی ژێر لێفەی ھەوری دا.
ھەر بینا کڵپەی گیان سووتان
بەیانی (ئوور) و (نیپۆر)ی بەردا.

نیسانی ١٩٨٧
ماڵپەڕی نەژاد عەزیز سورمێ