یەکی ئایار :
جەژنێکی پیرۆز و بۆنەیەک بۆپیاچونەوەى بارودۆخی تاڵى ژیانی کرێکاران.
ڕاگەیەندراوی بزوتنەوەى دیموکراسیخوازانی
کوردستان.
کرێکارانی ماند و بەش مەینەتی کوردستان
هەژاران و زەحمەتکێشانی قوربانی دەستى ناعەدالەتی و گەندەڵى و ستەمی
سیاسی .
ئەم جەژنە پیرۆزە بۆنەیەکی گونجاوە بۆئەوەى سەر لەنوێ هەڵوەستە لەسەر
ئەو بارودۆخە تاڵ و نالەبارە بکرێتەوە کە کۆمەڵگاى کوردستانی کردۆتە
کۆمەڵگاى ( زۆرینە برسی و کەمینەیەکی زۆر کەم ملیۆنێر) . بەرى ڕەنجی
ئێوە و ئەنجامی ماندوبونەکەتانى خستۆتە خزمەتی چینێکی تازە
دەوڵەمەندەوە ، کە تادێت بەهێزتر و خێراتر ئەبن لە زیاتر
دەوڵەمەندکردنی خۆیان و زیاتر هەژار کردنی کۆمەڵگاکەیش .
کرێکارانی هەمیشە ماندو : لەکاتێکدا قەیرانی بێکارى بەشێکی زۆرى لاوانی
گرتۆتەوە ، ئەوانەیشیان کە کارێکی پڕزەحمەتیان دەستکەوتووە بەشی نیوەى
کرێ خانویەکیان ناکات ، هەتا دێـت زیاتر بازاڕ و شوێنە گشتیەکان
ئەکرێـتە موڵکی تایبەتی کەمینەیەکی خاوەن نفوز ، بەهۆى وشکەساڵى و
خراپی و گەندەڵی سیاسەتی ئابورى هەرێمی کوردستانەوە ، کشتوکاڵ و
ئاژەڵدارى ( کەرتی ئابورى سەوز )لەکورستاندا خراپترین بارو دۆخی خۆى
ئەژی ، لەشکرى ئەو بێکارانەى لەم دواییانەدا و بەناچارى گوندەکانیان
چۆَڵکردوە و لەشارەکاندا بێ کار ئەسوڕێنەوە هەڕەشەیەکی جدی لەسەر
ژێرخانی ئابورى کوردستان دروست کردووە . بەگشتى کۆمەڵگاى کوردی بەرەو
سەرگەردانیەکی ئابورى و سیاسی ئەبرێت ، بەناوی بازاڕى ئازادەوە
کەمینەیەکی (خاوەن نفوزی سیاسی – ئابورى ) بازاڕیان قۆرغکردوەو تەواوی
تواناییە ئابوریەکانی وڵاتیان لەچنگی خۆیاندا چڕکردۆتەوە ، کە هیچ
گومانی ناوێت ئەنجامی ئەم کێشە ئابوریانە چ کارەساتێکی بۆ خەڵکی هەرێمی
کوردستان هەڵگرتووە .
کرێکارانی ماندو و ستەملێکراو ، ئەوسەندیکاى لەکوردستاندا بەناوی
ئێوەوە دامەزراوە ، قەت ڕۆژێک لەڕۆژان نوێنەرى خەم و کێشەو ئازارەکانی
ئێوە نەبووە ، هەرگیز بەهەڵبژاردنێکی دیموکراسیانە و لەلایەن
کرێکارانەوە هەڵنەبژێردراوە ، بەڵکو بەعەقڵیەتی بەرەى کوردستانی ، هەر
بەفۆرمە کۆنەکەى خۆیەوە ، هەموو جارێک لەلایەن حیزبەکانەوە
دامەزراوەتەوە . بەدرێژایى تەمەنی 17 ساڵەى ئەم سەندیکایش ڕۆژێک
لەڕۆژان مانگترنێک ، خۆپێشاندانێک ، چالاکیەکی جدی نیشان نەداوە لەسەر
کێشەیەکی کرێکاران ، بۆیە کاتی ئەوە هاتووە ئیتر کرێکاران خۆیان
سەندیکاى خۆیان دروست بکەن و نوێنەرى خۆیان دیارى بکەن . نەک حیزبێک
بۆیان دیارى بکات کە قەت باوەڕى بەخەبات و مافی پیشەیى کرێکاران نیە .
ئێمە کە پیرۆزبایى ئەم جەژنە پیرۆزەتان لێ ئەکەین ، بە پێویستى ئەزانین
زەرورەتی خەبات و تێکۆشانی ئێوە بۆ چارەسەرى ئەم کێشە هەڵایساوانە
وەبیر بێنینەوە ، هەمیشە چینی کرێکار و هەژارانی میللەتانە کەرەستەى
خاوی شۆڕش و گۆڕانە چاکسازی خوازەکانە ، بێگومانین کرێکارى کوردیش لەو
ئاستەى بەرسیارێتی نیشتمانی و چینایەتیدایە .
بەرزو پیرۆز بێت جەژنی نێو نەتەوەیى کرێکاران
مەکتەبی ڕاگەیاندنی بزوتنەوەى دیموکراسیخوازان
1 ئایارى 2008 - هەولێر
|