|
٣٠\٥\٢٠١٢
١٨\٢
ڕۆژى پێشمەرگە.
شێرکۆ عادل*
یادى بیرەوەرى ڕۆژێک لە دەورانى ساڵێکدا ماناى بەردەوام وەبیر هێنانەوە
و هەروەها ڕێزگرتنە لەو مێژووە ؛ تا نەوە لەدواى نەوە هەموو خەڵکى
بەگشتى لە کۆمەڵگەدا "بەشداربن بەبێ تایبەتمەندى و جیاوازى کردن " ،
نمونەى ڕۆژەکانى نیشتمانى و نەتەوەیى و کۆمەڵگا و چینەکانى و ئاستەکانى
بەگشتى دەبنە بەشێک لە یاد و بیرەوەرى خەڵکى و لە بۆنە و چالاکیە جۆراو
جۆرەکان یادیان دەکرێتەوە ؛ بیرهێنانەوەى ڕابردوو بۆ نەوەکان یەک
لەدواى یەک دەستاو دەستەکرێ و دەبێتە بەشێک لە مێژوو و وە کلتور و
ڕێزلێنان لە ڕابردوو بۆ بنیات نانەوەى داهاتوو ، نمونە هەرە دیایدەکانى
ئێمە تاوانەکانى جینۆسایدى کیمیکاڵى و ئەنفال و کۆڕەوو و بۆمباران و
ڕۆژە تراژیدیەکانە ؛ گەرچى بۆنە و یادەوەرى حزبى و ناوچەیى و ئایدۆلوژى
و ڕۆژە جیهانیەکان زیاتر سەپێنراو لەبەرچاو ترە ، بەڵام هەر چۆنێبێ
ڕۆژە گشتیەکانى خەڵکى لە هەر بۆنە و یادگاریەکدابێ لەبەرچاو ترە و بە
مەبەست و ئامانجى گشتى سەیرئەکرێت.
بە هۆى ئەوەى کەسایەتى پێشمەرگە ڕۆڵیکى بەرچاو کاریگەرى هەبوە لەماوەى
نزیکەى سەدەیەکى ڕابردومان لە کوردستانى گەورە و هەروەها ڕۆحەیەتى
گیانى پێشمەرگایەتى وەک سومبولێکى خۆبەخشى و گیان لەسەردەستى
دەخوێنرێتەوە بۆ خەبات و تێکۆشان لە پێناوى کۆمەڵگاى کوردى و خەڵکى
کوردستان ، ڕۆژێک بۆ یاد و بیرەوەرى کەسایەتى پێشمەگە ، ڕێزلێنانێکى
مرۆفایەتیە و پێویستە وەک سومبولێکى پڕشنگدار سەیرکرێت و یادى کرێتەوە.
لە کوردستان بەگشتى پێشمەرگە لە ناو هەموو حزب و ڕێکخراوە و لایەنى
سیاسى و بنەماڵە و ناوچەکانى کوردستان و شارەکانى هەبوە و درێژەى
بەخەبات و تێکۆسانى خۆى داوە و لەم ڕۆژەماندا هەموو ئاواتە خوازى یەک
هێزى یەک گرتوى تۆکمە و ڕێکخراوین بۆ پێشمەرگە کە بە شێوەیەکى
ڕێکخراوەیى دەوڵەتى لە سەر ئاستى نیشتمانى درێژە بە خەبات و تێکۆشانى
بدرێت لە پێناوى پاراستنى خەڵکى کوردستان بەبێ جیاوازى و ناوچەگەرێتى و
حزبایەتى.
لە مێژوەى ژیانى خەبات و تێکۆشانى خەڵکى کوردستان و پێشمەرگەدا چەندین
ڕۆژ و بۆنە و یاد و بیرەوەریمان هەیە و ناکرێ هیچیان لەیاد و بیر بکەین
و نمونەى ڕۆژەکانى ڕۆژمێرى گیان فیداکارى پێشمەرگە لە هەموو کوردستاندا
زۆرن و لە ژماردن نایەن ، بە ڵام لەبەر چەند هۆکارێکى گشتى بۆ
تایبەتمەند کردنى ڕۆژى : ١٨/٢/١٩٨٧ ، زۆر خاڵى جوان و سەرکوتوو پڕ لە
شانازى دەتوانین ئەم بیرەوەریە لە بەر چاو بگرین چونکە:
١- یەکەم ڕۆژ و چالاکى هاوکارى و پێکەوە ئەنجام دانى ڕزگارکردنى شاخێکى
ستراتیجى و نمونەیکى بە هاوکارى هەموو پێشمەرگەکانى بەرەى کوردستانى و
هێزى پێشمەرگەى هەموو لایەنەکانى کوردستانى بەشدار بوون پێکەوە لەگەڵ
خەڵکى سەربەخۆ و هێزى پشتگیرى بۆ ڕزگار کردنى شاخى زەردە بوو (یەکەم
چالاکى هاوبەشى هەموو هێزى پێشمەرگەى کوردستان بوە لە پاش شەڕى ناوخۆى
چەندین ساڵە).
٢- لەم ڕۆژەدا لە هەموو پارچەکانى کوردستان کەم تا زۆر چالاکى پێشمەرگە
هەبووە ، لە ناوچەکانى کوردستان.
٣- لەم ڕۆژەدا شاخێک ڕزگار کرا کە لەسەر لوتکە کەیەوە گڕى ئاگرى بابە
گووڕ گووڕ دەبینرێ و ئەم شاخە نێوانى گەرمیان و کوێستانى کوردستانە.
٤- لە کاتى خۆیدا ئەم ڕۆژە بوە شایى و خۆشى بۆ هەموو خەڵکى کوردستان کە
هەموو هێزى پێشمەرگە پێکەوە چالاکى هاوبەش و ڕزگارکەریان ئەنجام داوە و
سەرکەوتوبوون بەسەر دوژمندا.
٥- ئەم ڕۆژانە لە کۆتایى وەرزى زستانى ساڵدایە و بەفرو سەرمایە کە
ڕەمزە بۆ خەباتى پێشمەرگە.
٦- ئەم ڕۆژە تایبەت نیە بە هیچ حزب و ڕێکخراوە و لایەنێکى سیاسى یان
بنەماڵە و کەسایەتیەکى دیارى کراو.
بۆیە جێگاى خۆیەتى ڕۆژێکى ئاوەها پڕ مانا و گشتگیرى بکرێتە یاد و
بیرەوەرى ڕۆژى پێشمەرگە و ساڵانە بە بۆنەیەکى نیشتمانى و یادیکى بەڕێز
بەڕێ بکرێت و تیایدا چالاکى و وەبیر هێنانەوەى بۆ بکرێت و بکرێتە
سومبولى مرۆفایەتى پێشمەرگە بەبێ جیاوازى و لایەن گیرى ، کە بەڕەسمى
لەلایەن پەرلەمان و حکومەتەوە بناسرێت و کارى بەرنامە ى یاسایى بۆ
بکرێت ، تا ساڵ بەساڵ یادى و بیرەوەرى بەرز ڕاگیرێت وەک سمبوڵى
مرۆفایەتى پێشمەرگە سەیر بکرێت و بخرێتە ڕۆژمێرى بیرەوەریەکانى خەڵکى
کوردستان.
______________________________
*
(شێرکۆ عادل):
پێشمەرگەى
دێرین.
sherkoedel@hotmail.co.uk
|
