|
٢٠\٧\٢٠١١
٩٨٣ فەرمانبەر لە
وەزارەتى رۆشنبیرى دەوام ناکەن.
بەرهەم عەبدوڵا
وەزارەتى رۆشنبیرى و لاوانى هەردوو کابینەى پێنجەم و شەشەمى حکومەتى
هەرێمى کوردستان بە گەندەڵترین وەزارەت و دام و دەزگاى حکومەت هەژمار
دەکرێت، بە هەبوونى کەلێنێکى گەورە لە بەڕێوەبردن و چاودێرى و
لێپرسینەوە لەو وەزارەتە.
فەلەکەددین کاکەیى لە کابینەى پێنجەم و دکتۆر کاوە مەحمود لە کابینەى
شەشەم بە چاوى نوقاو کارى بەڕێوەبردنى ئەو وەزارەتەیان لە ئەستۆ
گرتووە.بە بوونى گەورەترین دیاردەى دزى و گەندەڵى لەنێو کۆڵەکە و لق و
پۆپەکانى ئەو وەزارەتە. ئەوەتا زۆرترین رێژەى راوێژکار و شارەزا لە
وەزارەتى رۆشنبیرى موچەى زەبەلاح وەردەگرن لە کاتێک جیا لە هەموو دام و
دەزگاکانى حکومەت هیچ یەکێکیان بۆ تەنیا جارێک راوێژیان پێنەکراوە و
هیچ یەکێکیشیان شایەنى ئەو پلەیە نین و خۆیان سەریان لەوە سوڕماوە چۆن
ناونیشانیان راوێژکار و شارەزایە. بەپێى ئەو بەڵگانەى لامانە وەزارەتى
رۆشنبیرى و لاوان بەقەد هەر چوار وەزارەتى پێشمەرگە و داد و شارەوانى و
شەهیدان و ئەنفالکراوەکان فەرمانبەرى بە پلەى راوێژکار و شارەزا
جێکردۆتەوە لە وەزارەتەکەى. بە بێ ئەوەى شوێنى کارکردن و بوار و
تایبەتمەندیان هەبێت. لە کاتێک وەزیرى رۆشنبیرى هەر ووڵاتێک پتر لە هەر
کەسێکى دیکە کەمتر پێویستى بەو پلە بەرزانەى راوێژکارى و مشورەت هەیە
بەو پێیەى کەسیێتى ئەو وەزیرەى دەکرێتە ئەو پۆستە خۆى ئەرکى راوێژکارى
لە بەرێوەبردن و گۆڕانکارى بوارەکەى لە وەزارەت و تەنانەت لەسەر ئاستى
سەرۆکایەتى ئەنجومەنى وەزیرانیش دەکەوێتە ئەستۆ . ئەمە جگە لەوەى
هەردوو وەزیر لەبەر ئەوەى شوێنى کارکردنیان لە هەولێربووە بەهیچ
شێوەیەک ئاگادارى چۆنیەتى کارکردن و کەم و کورى و نغرۆبوونى
بەرێوبەرایەتى گشتى و لقەکانیان نەبوونە لە سلێمانى و دهۆک .
سەرۆکایەتى ئەنجومەنى وەزیران بە پلەى یەکەم و خودى وەزیرى رۆشنبیرى
بەپلەى دووەم گەورەترین تاوانبارن بەرامبەر بەو خەمساردیەى لەنێو
وەزارەتى بەناو رۆشنبیرى دەبینرێت. چونکە ئەو وەزارەتە جیا لەوەى
لەهەمبەر چەندین پرسى کۆمەڵایەتى و رۆشنبیرى و هونەرى کە کارى ئەوانە
توێژینەوەى لەسەر بکەن و ووشیارى بڵاوبکەنەوە و کار بۆ چاککردنى چەندین
پرسى هەستیار بکەن و ببنە پشتیوان و هاندەر و خاوەن ماڵى رۆشنبیران و
گەنج و لاوى ئەو ووڵاتە، بەڵکو زۆر بەداخەوە ئەو وەزارەتە خۆى بۆتە
هۆکارى داروخان و پەرتەوازەبوون و لاوازبوونى کەسایەتى رۆشنبیران و
لاوان. لەبەر ئەوەى ئەو وەزارەتە زیاتر لە ١٦
بەرێوبەرایەتى و دام و دەزگاى داخراوى هەیە و پارەیان بۆ سەرف دەکات.
هەریەک لەو دەزگایانەش بە دەیان و سەدان فەرمانبەرى بێ کار مووچەى لێ
وەردەگرن. بە نموونەى بەرێوبەرایەتى سەتەلایتى نەورۆز و ڕادیۆ و
گۆڤارەکانى هەرێمى کوردستان و هەنگ و کاروان و بارش و بەرێوبەرایەتى
سینەما و شانۆ و میوزیک لە هەولێر و چوار
بەرێوبەرایەتى لە سلێمانى و دوو
بەرێوبەرایەتى لە دهۆک کە تا ئێستا ناونیشانى بێ ناوەرۆکن لە وەزارەتى
رۆشنبیرى و لاوان بەبێ ئەوەى دارێک لەسەر بەرد دابنێن زیاتر لە ٩٨٣
فەرمانبەر کە لە نێوانیاندا بەرێوبەرى گشتى و شارەزا و راوێژکار و
چەندین پلە بەرزى دیکە هەیە بەبێ ئەوەى لە ماوەى کابینەى شەشەم تەنیا
بۆ رۆژێکیش دەوام بکەن مووچە و دەرماڵەى تەواوى خۆیان لەو وەزارەتە
دەست و پێ سپیە وەردەگرن. لە کاتێک تەواوى ئەو فەرمانبەرانەى وەزارەتى
نارۆشنبیرى لە کەرتى تایبەت و لق و مەڵبەندەکانى حیزب کاردەکەن . بەبێ
ئەوەى رۆژێک لە رۆژان کەسێک هەبێت لێیان بپرسێت کاکى وەزیر چۆن دەکرێت
نزیکەى هەزار فەرمانبەرى وەزارەتەکەت نازانن باڵەخانە و دەرگاى
بەرێوبەرایەتى و کارکردنیان لە کوێیە بە فەرمانبەر لەقەلەم بدرێن و
هەموو ئیمتیازاتێکیش بیانگرێتەوە. چۆن دەکرێت ئێمە ئەو وەزیر و
وەزارەتە بە رۆشنبیر لەقەلەم بدەین ئەگەر لە مالەوە دەوام بکەن.ئەگەر
بۆ جارێکیش لە ماوەى ئەو چەند ساڵە لێیان نەپرسن چارەنووسى هەموو ئەو
فەرمانبەرانەى کە تەلەفزیۆن و رادیۆ و رۆژنامە و گۆڤارتان لێ داخستووە
بە کوێ دەگات.ئایندەیان بەرەو کوێ لە ژێر سایەى ئەو حکومەتە خەمساردە.
لە هەمووى خەندە ئامێزتر و گاڵتەجارى تر ئەوەیە کە لەنێو میلاکاتى
دامەزراندنى فەرمانبەرانى نوێ بۆ ئەو ساڵە، وەزارەتى رۆشنبیرى و لاوان
داواى ٥٥٠ فەرمانبەرى کردووە بۆ دامەزراندن.
وەکو ئەوەى ئەو رێژە فەرمانبەرەى ئێستا هەیەتى بەشى نەکات و دەرهەق بەو
هەموو سەرقاڵى و پاڵەپەستۆیەى کارکردن و شەونخوونى و هەوڵدانى بۆ ئەو
ئەرکانەى کە نازانێت چیە لەسەر شانى....
barhamxoshnaw@yahoo.com
|
