٢٢\١٠\٢٠١٣

    ئاڵوودەبوون وە مێکوژیی!

دارا خونچە

هێوارەیەک.. سەر وەسەر ران و

                 روو وە روو

           وە ئارامیی لە باوەشی

           گەرم و پڕ سۆزی (یارۆ)ی خۆم

                          لە بیر و هزران راچووبووم..

هێندەم زانی.. لە ژێر شەپۆڵی ئەندێشان

                نیگار.. نیگار، نیگای چاوە گەشەکانیم

                 (وەکاوەخۆ) لە مێشکمدا هەڵدەکۆڵی..

ئیدی (بێ وەی).. (هاییدار) بم؛

(هەرێ)م دابوو یەک (خونچە گوڵ)

         لە تریسکە و رەنگ و رۆشنایی

            چاوە گەش و رەشەکانی (دوعا خان)ێ

                لە چاوانی (یارۆ)کەی خۆم بخوازمەوە..

         زۆر وە گرنگیی و بایەخپێدان

                     لە چاکترین ئاخی نێو باخچەی

                              هۆنراوانم.. دایبچێنم..

(هەرێ)م دابوو

         خۆم لە خودی خۆم رزگار کەم..

              خۆم لە نان و گان و ژان و زان و دان و

                          هەرچی ژیان و ژین و مانە

                                    خانەنشین کەم..

         تەنێ لە راژە و پەروەردەی

                        ئەو خونچەدا

                        خۆم تایبەت و تەرخان بکەم

ئیدی..

وە هێڤیی ژیانەوەی.. وە رسکان و گەشانەوەی..

   لە چاوەڕێی چرۆکردن و هەڵچوونی بەژن و باڵاکەی..

   لە چاوەڕێی بۆی هەناسە و

                   شەپۆڵی بای

                   لەنجەولار و ورشەورشی گەڵاکانی..

   لە چاوەڕێی شەونمی سەر

            لێوە ئاڵ و گەشەکانی..

                      (حەیا داویی) بیگوزەرێنم..

                       ژیانم تێکڕای وە قوربان کەم!

کەچی لەپڕ (یارۆ)ی دەلال

شانی راستمی راتەکاند و

     وە ئەسپایی.. وە دەست و پەنجە نەرمەکەی

                 مێژووی منی - رێک وەکی خۆی -

                              لەسەر سینەمدا نووسیەوە و

                         پەردەی سەر روومی داماڵی..

     کاتێش سەرمی لەسەر رانی وەلاخست و

                        هەر ئەو جێهێشتن جێیهێشتم؛

ئەوجا وەبیرم هاتەوە:

          ئەزیش کوردم، ئەزیش یەک پیاوی نەبەردم!

ئەزیش لە توخمی ئاریایی و ماد و مترا و زردەشتییانم

ئەزیش زادەی سەلاحەددین و کەوکەبریی و شەرەفخانم

ئەزیش هۆزی کاک خانزاد و لەپزێڕین و پاشای کۆرەم

ئەزیش خێڵی شێخی نەهری و بەدرخانیی و بابانییانم

ئەزیش تیرەی سەید رەزا و شێخ سەعید و سمایل خانم

ئەزیش ئێڵی کاکە حەپسە و مام عادیلە و بەرزنجییانم

ئەزیش ئێزیدیی و گاور و جوو و یارسانیی و موسلمانم

ئەزیش بەندەی خودێی مەزن و پێغەمبەر و راشیدییانم

ئەزیش دەروێش و شاگردی نەقشبەندیی و قادرییان و

سەرلەبەری سەید و حاجی و شێخ و فەقێ و مەلایانم

ئەزیش پیاوی ئاغا و بەگ و کوێخا و میر و میرزایانم.. 

وە کورتییەکەی؛

نووکەش مرۆ و کۆیلە و گوندە و قاوەگێڕی دیوەخانی

       جوامێران و نێرەوزانی حیزبەکانی کوردستانم

تا تەرمەکەم

وە خوونی پیسی (دوعا)کان تەڵخ نەبی؛

هەرگیز دەستم ناپارێزم..

       هەرگیز رەوشت و ئابڕووی خۆم نادۆڕێنم

       هەر ئازا و مەرد و پیاو دەبم..

             هەر داککوژ و خوشککوژ و ژنکوژ دەبم!

             هەر کیژکوژ و هاوسەرکوژ و مێکوژ دەبم!

____________________________________

فەرهەنگۆک:

١- وەکاوەخۆ: لەسەرەخۆ، لەسەرخۆ. ٢- بێ وەی: بە بێ ئەوەی. ٣- هاییدار: ئاگادار. ٤- هەرێ: بەڵێن ٥- حەیا داویی: تا دوایی. ٦- مرۆ: لێرە بە واتای پیاو و چەکداری پاسەوانی کەسەک یان خێڵ و هۆزەک دێ. ٧- گوندە: شەرفرۆش و چەتە. ٨- نێرەوز: نێرینەیی.

ماڵپه‌ڕی دارا خونچە