ئاسایشى یەکێتى کێ دەگرێ و کێ‌‌ ئازاد دەکا ؟!

نیا کامل     
 

ئەوەى جێگاى سەرسوڕمانە لە ئاسایشى یەکێتى لە سلێمانى لە ماوەى کەمتر لە مانگێکدا دوو ڕوداوى سورسوڕهێنەر ڕودەدات . یان راِستترە هەستاون بە دوو کارى سەرسوڕهێنەر . یەکەمیان گرتنى 12 کەس بە تۆمەتى ئەوەى کە بەیاننامەیەکیان بڵاوکردۆتەوە لە دژى تۆپبارانکردنى ناوچە سنوریەکانى هەرێمى کوردستان لە لایەن ڕژێمەکانى ئێران و تورکیاوە ، وە لە ئەنجامدا دەیان گوند توشى زیان و چۆڵکردن بوون ، وە هەزاران کەسیش بآ خانەولانە بوون ، جگە لە کوژرا و بریندار . لەم بەیاننامەیەدا ئیدانەى دەسەڵاتدارانى کوردستان کراوە بۆیە یەکسەر نیگەران بوون و فەرمانى پێچانەوەی ئەم کەسانە دراوە .وەڵامى ئاسایشیش بۆ ئەم کارە ئەوەیە کە ئەوکەسانە ئیجازەیان نەبوە بۆ بڵاوکردنەوەى ئەو بەیاننامەیە ، کە ئەم وەڵامە بۆ خۆى نوکتەیە . لەکوێى دونیا بڵاوکردنەوەى بەیاننامە ئیجازەى دەوێت . ئەمە بیروباوەڕى پارتێکى سۆسیال دیموکراتە لە ساڵى 2009دا، ئەمە قەناعەتیەتى بە ئازادى بەیان و بیروڕا ، بۆیە پاش چەند ڕۆژێک ئەوکەسانە بە کەفالەت ئازاد دەکاتى.

ڕوداوى دووەم ئازادکردنى ئەفسەرێکى فڕۆکەوانە کە شاهیدى کیمیا بارانکردنى هەڵەبجەى شەهیدە ، بەبآ گومان بەبآ کەفالەت و بەگەردن ئازادى وە ڕەنگە پاداشتیش کرابێت ، لێرەوە ئینسان توشى شۆک دەبێت لە جیاوازى ئەم دووکارە ، و لە کردەوەکانى ئاسایش . ئەوەشمان لەیادە کاتێک نزار خەزرەجى لە بەردەم دادگا ڕاگیرا یەکێتى و پارتى نامەى بەرائەتیان بۆ ڕەوانەکرد ، ئێستاش مدافعى سوڵتان هاشم و على کیمیاوین ، جگەلەوەى ڕۆژانە بەیعەت دەدەنەوە بە مالکى و حکومەتەکەى . بە هەرحالڕ هەروەک بیانوە پوچەکەى پێشوو بۆ گرتنى ئەو کەسانە . ئەجارەش بۆ ئەم ڕوداوە دەڵێن جەنابى تاڵەبانى بەهەڵە ئەم کەسەى ئازاد کردوە ، ئەم قسەیە لە قسەى دایکێک یان باوکێک دەچێت کە بیەوێت منداڵەکەى کەمێک لەخۆى دوربخاتەوە و بیخڵافێنێت بە قسەیەکى پوچ ، چما تاڵەبانى چەند ڕاوێژکارى هەیە ، هەر لێگەڕآ ، بۆ دەزگاى زانیارى و ئاسایشەکەیان لە ماوەى دە دەقیقەدا دەزانن بەیاننامەیەک بڵاوکراوەتەوە و ناوەرۆکەکەى چیە ، بۆ نازانن فڵانکەس کێیە تا تاڵەبانى سەرکۆمارى عێراقى فیدڕالڕ ئەم هەڵەیەنەکات ، کە دەشزانن بەڵام تاڵەبانى قسەکانى وەک هى خودا وایە ڕەتبونەوەى نیە ! ئیتر ئاسایش چى بکات !؟ ڕەنگە لەوە ترسابن ئەم برادەرە چى لە هەگبەکەیدایە بیدرکێنێت لەبەردەم دادگادا ، ئەوکاتە ڕوى ڕاستەقینەى یەکێتى ئاشکرادەبێت بۆ کورد نە بۆ عەرەبیش . چونکە خەڵکى کوردستان باش دەزانن کە ئەوکات یەکێتى چى دەکرد ، بۆیە شەریکى ئەم تاوانەیە . بەڵام بائاسایش و تاڵەبانیش بزانن خەڵکى کوردستان مندالڕ نین بەم قسە پوچانە بیان خەڵەتێنن . دواین قسەم ئەوەیە کە لە بنەڕەتەوە ئەم دەزگایە بۆ ئەوە دروست نەبووە تاوانباران بگرێت و بیاداتە دادگا ، بەڵکە کارى سەرەکى سەرکوتکردن و لەناوبردنى ئەوکەسانەیە کە لەدژى کارە و کردەوە و زوڵم و زۆرى ئەم حیزبە سۆسیال دیموکراتە دەنگ هەڵدەبڕێت ، یان کارو چالاکییەک دەکات لەگەلڕ ئارەزوى ئەماندا نایەتەوە . بۆیە کەم کەس هەیە ڕۆژێک لەڕۆژان لە سنورى کارى ئەم دەزگایەدا کارێکى کردبێت بەدڵى ئەمان نەبوبێت توشى گێرمەو کێشەیان نەکردبێت .

nyakamil@hotmail.com