١١\٣\٢٠٢٥

   ئاشووبی بێدەنگ .

ئەرسەلان مەحمود

مانگەکان لە فەرهەنگی ئاسماندا نەمان!
چەمکە قەدەغەکراوەکان بوون بە ئەستێرە.
"جەنگ" وشەیەک نەماوە، مەرەکەبێکە لە
کاغەزی سنوورەکاندا ڕژاوە:
تورکیا → Ø
سوریا → Ø
کوردستان → ؟

دڵەڕاوکێ،
دەزگەیەکی ئەلکترۆنی.
درۆنەکان سیگناڵ دەردەکەن
هاوارەکان پەخش دەکات

گەردوونێ
لە وشەی قەدەغەکراو:
⟨داگیرکردن⟩ دابڕانی جوگرافیایە لە واتا
⟨سەرباز⟩ دابڕانی مرۆڤە لە هەست
⟨کوژراو⟩ دابڕانی ڕۆحە لە جەستە

ژماردن نەما
ئەوەی هەیە، هەژماردنە
[١] زەوی [٢] ئاسمان [٣] ئاگر
٤] ئاو [٥] [٦] [٧] [٨] تاد.....
پرۆگرام بەرکارە. کۆدەکە
بەردەوامە.

منداڵەکان
بەناو تێکستەکاندا دەڕۆن
بەناو ئەو وشانەی قەت نەنووسراون
لەناو ژێرزەمینەکاندا لەسەر شاشەکان
سیماکانی خۆیان دەبینن: >_ هەڵە:
ناوی فایلەکان نەدۆزرایەوە
هەرگیز...

مردن لە تورکیا نایاساییە
مردن لە سوریا نایاساییە
مردن لە کوردستان هێشتا
چاوەڕێی فەرمانێکە نوێتر

تورکیا \ {مردن} = تورکیا
سوریا \ {مردن} = سوریا

بیرکردنەوە تاوانە، چونکە
بیرکردنەوە زمانێکی نهێنییە

لە کۆددا وشەکان
پەیکەرەکانیان هەڵدەگرنەوە،
لەناو مێشکدا دەبنەوە کۆد
ئاوەدانیان دەکەنەوە

//گێلانەترین شت
ئەوەیە کە بیر بکەیتەوە.
//دەستووری سیستەم:
ڕستەی سەرەوە هەڵەیە
بلیمەتترین شت ئەوەیە
وشەکان لەناو مێشکتدا
بشاریتەوە تا لەناو زماندا
چ قەدەغە نەکرێت.

ماڵپه‌ڕی ئه‌رسه‌لان مه‌حمود