په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک

٢٨\١٠\٢٠٢١

    ئاودەمانباتەوە.

فه‌رهاد مازێ

کەس لە نهێنیی ئاو ناگا
کەس نازانێ ئاو بە چ زمانێ دەدوێ
مێژووی کەیە و کەی هاتووە و چەند بڕدەکا
ناڕوا و تا کۆتایی لەگەڵمان دەمێنێتەوە
یان وەک چۆن خۆشەویستانمان جێیانهێشتین و ئاویش بای بای دەکا و جێماندێلێ
بێ تۆ وشک دەبین و دەمرین بە تۆوە جوانین و دەژین
ئاو ژیانە، ژیانە تۆی
هەندێ جار کەیفی سازە سەما دەکا و
هەندێ جاریش سەرخۆشە و گۆرانی دەڵێ و بەلادادێ ئاو
یاخی و تووڕەیە کاری قۆڕ و نابەجێش دەکا ئاو
بێ ئۆقرەیە و وەک بڵێی شوێنی نییە لێیبمێنێتەوە ئاو
ئەوەی بێتە پێشی دەیشکێنی و لەگەڵ خۆی دەیبا ئاو
لە کەس نەبووە و هەندێ جار خووی مرۆڤی هەیە و دەڵێی مرۆڤی لێبووە ئاو
دەبینرێ و دەوترێ تەنیایە و شادە و خەمبارە ئاو
روون نەبۆتەوە باران هاوسەریەتی جۆگە و رووبار منداڵیەتی
بەفر و تەرزە خوشک و برا و
هەور و بروسکە دایک و باوکیەتی
بێ رەنگە و ژیان رەنگ دەکا شێوەکارە ئاو
بێتامە و تام دەدا جوانترین ئۆکسترای ژیانە ئاو
بشمانبا و نوقمی خۆیمان کا رق هەڵناگرین
بڕوا دەڕۆین، بوەستێ دەوستین
تێنوبێ دەمرین، بێ تۆ دەمرین ئاو
تۆمان هەیە و بێ تۆ ناژین خۆشماندەوێی ئاو
خاوەنی هەموو شتێکە و بێ گیرفانە ئاو
پارە کۆناکاتەوە بەخشندەیە و کۆتایی نییە ئاو
لە هەر کوێیەک بێت ژیان لەوێیە، ئاو ژیانە، تۆ ژیانی ئاو
گەر هاتیت و بڕۆیت بمبەرەوە
لەوەتەی هەم لە دەرەوەی ماڵەوە غەریبم
گەڕانەوە لەگەڵ تۆ ماڵ ئاوەدان دەکاتەوە
ماڵەوە ژیانە و تۆش نەمری ئاو.

 

ماڵپه‌ڕی فه‌‌رهاد مازێ
 

 

 

 

په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک