هۆشه‌نگ شێخ محه‌مه‌د
 

رۆیشتن بەناو گوڵە هێرۆکاندا
وەک ئەوەى تازە لەدایک بم
هەست دەکەم.

* * * * *

نووستن لەبەر تریفەدا
تەعمیدکردنى هەستەکانمە

* * * * *

رۆیشتن بەناو تریفەدا،
پیاسەکردن بەناو گوڵە هێرۆکاندا
لە دایکبوونەوەیەکى نەرمە لەگەڵ گیادا

* * * * *

تنۆک تنۆک: بمخۆوە
دڵۆپ دڵۆپ: بمبارێنە
مەستم کە بە بۆنى لاسکەکانت ئەى نیسانۆک

* * * * *

گەڕان لەناو مژدا
سوڕانەوە لەبەر هەتاودا
ئەمکاتەوە بە خۆم، لە رۆژمێرى گژوگیادا

* * * * *

ئەو بایە ماچ ئەکەم
کە لەسەر برژانگى
گوڵە گەنمێکدا سەما ئەکات

* * * * *

ئەبارمە سەر ئەو هەنارەى لە
چاوەڕوانى بۆنى سێودا قەڵشەکانى پڕ ئەکا
لە کانى شەڕاب.

* * * * *

نوێژی مەحەبەت بۆ ئەو بارانەى
بۆ سەفەرى شەنگەبییەک
پەنچەرەکانى ئاسمان ئەشکێنێ.

* * * * *

رۆژوێک بۆ ئەو شەیتانەى
بۆ پیاسەى گژوگیاى تولە رێیەک
بە توڕەیى لە دەرگاکانى خوا ئەدات.

* * * * *

سڵاو ئەى گوڵەباغ
بۆ ئەو شکۆفانەى رۆژانە بۆ با
لە مەمکەکانتەوە ئەکەیتەوە.

* * * * *

من و کانى و هەتاو و پشیلە و مۆسیقا
هەموومان دەممان ناوە بە مەمکى گیا

* * * * *

هەموومان من و تریفە و کانى و خەزان
گوێمان داوە بە سەنتورى پایزى گیا

* * * * *

هەموومان، من و پایز و کانى و مانگ
چاومان داوە بە گلێنەى کەسکى رووناکى گیا

* * * * *

هەموومان من و رووناکى و کانى و پایز
دڵمان داوە بە چپەى نەرمى رۆیشتنى گیا لەناو بادا

* * * * *

من و رووبار و رووناکى و زستان
روحمان داوە بە سەماى گیا لە ناو بەفردا

* * * * *

من و هەموو شتێک
لەگەڵ کوریکەیەکدا لە ژوانى جوانین

* * * * *

من و بڕکە گیاکان
چیرۆک بۆ دارستان دەگێڕینەوە

* * * * *

"خاڵخاڵۆکەیەک بە مێروویەک دەڵێت"
رۆیشتنى من و تۆ لەناو ئەم عەشقەدا
هەموو شتێکمان لێ دەستێنێتەوە تەنیا
ئاوازەکانى گیا نەبێت:

* * * * *

لەناو ئەم عەشقەدا تەنیا پێویستیمان بە ئاوازە

* * * * *

هەر رۆژەى ئاوازێکم بۆ بچڕە
هەر رۆژەى ئاوازێکت بۆ دەدزم:
لە گوڵ، لە سنۆبەر،لە کۆتر و لە گیا

* * * * *

هێور هێور ببارە سەرم
با تریفەکانم تەڕ نەبن
ئەى گوڵە هێرۆ.

* * * * *

تنۆک تنۆک بمخۆوە ئەى تریفە
با پەڕە هێرۆکانم نەگەچڵێن.

* * * * *

بەدیققەت تەماشاى چاوى ئەو چۆلەکەیە کە
سواندەى باخێک ئەبینیت.

* * * * *

بە وردى تەماشاى دڵى منیش کە
سەفاى شعر لە لەرینەوەى گیایەکدا ئەبینى.

* * * * *

زۆر بە خێراش تەماشاى روحم کە
وێنەى خوایەکى کوژراو و جیهانێک لە گیا بە پێوە ئەبینى.

* * * * *

تەماشام کە، ئەوەندە روونم
مێژووى سەدان ساڵەى دار چنارێک لە داوە گیایەکدا ببینە

* * * * *

تۆش وەک شەنگەبى بەر باران
جواناوى هەقیقەتێک ئەڕژێنیە سەر گیا

* * * * *

تۆش وەک هەور
بەپەلەیت بگەیتە قەدى ئەرخەوانێک و
خۆت بگۆڕییە سەر باران تا بەرببیەوە ناو گلێنەى سێپەڕەیەکدا

* * * * *

تۆش وەک سنۆبەر بەپەلەیت شەو دابێت و جلى تاریکى بکەیتە بەرو
بڕژێیتە ناو چەپکە گیایەک

* * * * *

تۆش وەک گیا
وا شەق دەبەى بۆ رێبوارێک مەمکەکانت بگرێت

* * * * *

تۆش
عاشقانە بەناو گژوگیاى شعردا وەردەبیت.

منیش وەک شعر بەناو گژوگیاى تۆدا وەردەبم!
 

5/3/2008