       |
|
ئایا عەرەب لە كوردستاندا جێگای مەترسیە یان بەشداری ئاوەدانكردنەوەی كوردستان دەكەن ؟ *
خه‌بات لاوباخ
لەدوای دروستكردنی عێراقێكی دەستكرد لەم ناوچەیەدا و بەزۆر لكاندنی كوردستان پێوەی ، نەهامەتی و دەربەدەری و كوشتن و بڕین بە شێوەی جینۆسایدیڕاستەقینە بووە بە بەشێك لە ژیان و مێژووی دانیشتوانی كوردستان ، سەڕەڕایی بەعەرەبكردنی شارە نەوتییە دەوڵەمەندەكانی كوردستان و دەربەدەركردنی خەڵكەڕەسەنەكەی و هێنانی عەرەبی هاوردە و داگیركردنی كوردستان و تەسك كردنەوەی ڕووبەرەكەی و مانەوەی كورد بەژێردەستی و چەوسانەوە ، بەهەموو شێوەیەك لە لایەن دەسەڵاتە یەك لەدوای یەكەكانی عەرەبە شۆڤینیەكان، بەتایبەتی ڕژێمی گۆڕ بە گۆڕ بۆ سڕینەوەی نەخشەی كوردستان و نەتەوەی كورد درێغییان نەكردوەو دەستیان لە ئاژەڵ و رووەكیش نەپاراستووە و بەردەوام خەریكی ڕێكەوتن و پەیمان بەستن بوون بۆ دژایەتی كوردوكوردستان و تا ئێستاش هەربەردەوامن . بە شێوەیەكی چڕوپڕ توانای خۆیان خستبووە گەڕ بۆ ئەوەی پێناسەی كورد بگۆڕن بە عەرەب وەیان هیچ نەبێت هەستی عێراقچێتیان لا دروست بكەن ، كە جێگای دڵخۆشییە ، ئەم ئامانجەیان نەهاتەدی و تا گەیشتنیان بە دۆزەخەكەیان، توانیان تەنها چەند كورد و سیاسەتمەدارێكی كەم بهێنە سەر ئەم ڕێگایە. بەڵام بەداخەوە لەدوای ڕوخاندنی ڕژێمی دیكتاتۆری لە عێراقدا ، جارێكی تر بە لێشاو هێرشی كۆچڕەوی عەرەب بۆ كوردستان دەستی پێكردووە و زۆربەی شارەكانی كوردستانی گرتۆتەوە ، كە ئەستەمە باش و خراپیان جیا بكرێتەوە، واتە بەعەرەبكردنێكی ئارەزوومەندانەی كوردستان ،كە ڕژێمی بەعسیش ئەمەی پێنەكرا. پاساوی هەندێك لە سیاسەتمەداران وایە ، كە گوایە : + ئەم كۆچڕەوە تەنها كاتی یە و دوایی ئاسایی بوونەوەی بارودۆخی عێراق بە دڵنیاییەوە دەگەڕێنەوە ، بەپێی بوچونی من وانیە ، تەنها نموونەیەكی سۆڤییەتی كۆن ، كە ڕووسەكان بڵاوببونەوە بە هەموو هەرێمەكاندا ، بەڵام دوای نەمانی سۆڤییەت و سەربەخۆبوونی ووڵاتەكان ، ئێستا گەورەترین گیروگرفت دروست بووە بۆ ئەو ووڵاتانە ،كە ڕووسەكان نایانەوێت بگەڕێنەوە بەمەبەست ، گاریگەری خراپیشیان هەیە لەسەر سیاسەتی ئەو ووڵاتانە.كوردیش تووشی هەمان گیروگرفت دەبێتەوە و زۆر لەوەش خراپتر. + دەوترێت كوردستان بەشێكە لە عێراق ، هەموو هاووڵاتیەك سەربەستە لە كوێ نیشتەجێ بێت ، بە بۆچونی من وا نیە ، تاكو سنوری كوردستان دیاری نەكرێت و لەلایەن دەسەڵاتدارانی كوردەوە كۆنتڕۆڵ نەكرێت ، ترسی سڕینەوەی نەخشەی زۆرتری خاكی كوردستانمان لە سەرە ، ئەی بۆ كورد ناتوانێت لەهەر جێگایەك بیەوێت ، نیشتەجێ بێت؟ ، و بەردەوام لە ژێر هەڕەشەی كوشتن و بڕیندایە لەلایەن عەرەبەوە ناچار دەكرێن كۆچ بكەن. + ئەگەر كوردستان و كورد بەشێكە لە عێراق ، بۆ بێ پرسی كورد ڕێكەوتننامە دژی كورد لەگەڵ داگیركارانی كوردستان واژۆ دەكرێت و كوردیش پشتگوێ دەخرێت؟ + هەندێك پیانوایە لە ووڵاتانی كەنداو و ئەلمانیا و ئینگلتەرا ، چەندەها كرێكاری بێیانی هەیە و ووڵاتیان پێ ئاوەدان دەكرێتەوە سودیان لێ دەبینرێت ، دەتوانرێت لە كوردستانیش بەهەمان شێوە سود لە دەستی كرێكاری عەرەب ببینرێت ، بە بۆچونی من وانیە و زیانێكی زۆرمان پێگەیشتووە بێ ئەوەی بیزانین . ئێمە ناتوانین خۆمان بەراوورد بكەین لەگەڵ ووڵاتانی وەك ئینگلتەرا و ئەڵمانیا و كەنداو ، ئەوانە ووڵاتانی سەربەخۆن و ئابوورییەكی بەهێزیان هەیە و ترسی سڕینەوەی كەلتوری و سیاسیان لەسەر نیە و كرێكارانی بێیانیش تا ڕادەیەك وەك كۆیلە بەكار دەهێنن بۆ پڕكردنەوەی شوێنە بەتاڵەكانیان، لە ئەلمانیا یاسا هەیە ،یەكەم جار دەبێت كارەكە بدرێت بە هاووڵاتیەكی ڕەسەنی ئەڵمانیا ، ئەگەر نەیویست دواتر بۆ هاووڵاتیەكی ئەوروپی ،ئەگەر ئەویش نەیكرد ئینجا بۆ كرێكارێكی بێیانی ،ئەگەر كارەكە خۆشت بیدۆزیتەوە ، واتە تا هاووڵاتی خۆیان و یەكێتی ئەوروپا ڕاوەستابێت نادرێت بە بێیانی. بەڵام لە كوردستان كرێكاری عەرەب وەك خاوەن ماڵ دێت و كورد بە كۆیلە دەزانێت و هیچ یاسایەكیش نیە كە پێشتر كار بدرێت بەكورد ئینجا بەعەرەب و بێیانی . + هەندێك پیانوایە، پێویستە سود لەو پزیشك و ئەندازیار و كارمەندانی تری بەتوانای عەرەب وەربگرین ،كە ڕوویان لە كوردستان كردووە ، كە بەهیچ شێوەیەك ئامادەییان تیا نیە خۆیان فێری زمانی كوردی بكەن ، پێویستە ئیمە بە عەرەبی بدوێین ،نەك ئەوان بەكوردی ، كە زۆربەی لاوان و منداڵانی كورد ئێستا عەرەبی نازانن و لێیان تێ ناگەن ، كە ئەمەش گرفتێكی ترە.لەگەڵ ئەوەی زۆربەیان كۆنە بەعسی وپیاوخراپن و لە ترسی تۆڵە لێكردنەوە لێیان ، ڕاییان كردۆتە كوردستان و هەرچەند بڕواییان بە كوردستان و كورد نیە، بەڵام لە ووڵاتانی كەنداو و ئەڵمانیا و ئینگلتەرا ، پێویستە لەسەر هەر بێیانیەك فێری زمانی ئەو ووڵاتە بێت ئینجا دەتوانێت كار بكات. ئەی بۆ كاربەدەستانی كورد هەوڵ نادەن خوێندكاری زیرەك بنێرنە دەرەوە و زانا و كارمەندی زیرەكیان لێ ئامادە بكرێت ، وەك ئێستا دەستی پێكراوە ، بۆ نزیك و كەس و كاری خۆیان ، تاكو پێویستیمان بە عەرەب نەبێت. +لە ووڵاتانی وەك ئەڵمانیا و ئینگلتەرا و كەنداو ،ئەو كاتانەی كە كرێكاری بێیانیبان وەردەگرت ترسی تێرۆر و كوشتن و تەقینەوەیان نەبوو ، هەرچەندە ئێستا سڵ دەكەنەوەو جۆرەها یاسایان داناوە بۆ بەرگریكردن لە هاتنیان، بەڵام لە كوردستاندا لە سەرەتا و ئێستادا ئەو ترسە هەیە و هەبووە و هیچ یاسایەك و ڕێگرییەك نیە لەبەردەم ئەم دیاردەیە. +هەرچەندە ئەو ووڵاتانەی كە بێیانیان زۆرە ، بەدەست گیروگرفتەكانیانەوە دەناڵێنن ، لە ووڵاتێكی وەک ئەڵمانیا دا هەرچی فڕوفێڵ و دزی وكاری نائاسایی و خراپییە لەلایەن تورك و عەرەبەوە دەكرێت و هەر لە زۆربووندایە ، گیرییان خواردوە بەدەستیانەوە ،ئێستا چارەسەرەكەی زۆرگرانە و پەشیمانن لە هێنانی كرێكاری بێیانی ، هەوڵدراوە چەندەها یاسا دابڕێژرێت بۆ چارەسەركردنی ئەم گرفتانە ، تا بێت لایەنگیری پارتە ڕاستڕەو و نەژادپەرستەكان لە زۆربوندایە. وەك لە كوردستانیشدا دەبیسترێت كە كۆمەڵەی لاوانی نەتەوەیی ئەی ڕەقیب پەیدا دەبێت ، ئەگەر وا بڕوات زۆرتریش دەبن . + لەو ووڵاتانە بەهۆی هاتنی بێیانیەوە تێكەڵی ژنوژنخوازی پەیدا بووە و تێكەڵ بە چەندەها میللەت بوون ، بەڵام هەموو ناچاركراوون، كە پەروەردە و زمان و بەخێوكردنیان بە كەلتوری ووڵاتەكەیان بێت ، واتە بە زمانی دایكی ئەو ووڵاتە،بەڵام لای ئێمە لە عەرەب بهێنیت یان بەعەرەب شوو بكەیت هەر دەبێت زمانی عەرەبی براگەورە فێر بیت ،ئەمەش جۆرێكە لە توانەوە، ئەگەر خەمی لەناوچوونی نەتەوەكە و زمانەكەتیش بێت ، پێمان دەوترێت ڕەگەز پەرست و توندڕەو ، هەرچەندە ئەمانە دوژمن بۆ سوككردنمان بەكاری دەهێنن. + لە ووڵاتانی ئەڵمانیا و ئینگلتەرا ،یارمەتی كۆمەڵایەتی –سۆتسیال- هەیە ئەگەر بێ ئیش بیت ، ترسی ماڵوێرانی و نەبوونیت نیە ، چونكە كرێی خانوو ولەگەڵ پارەی بژێووی ژیانت دەدەنێ و ترسی ئەوەیان نیە ،ئەگەر بێیانی كارەكان بكەن ، بەڵام لای ئێمە ئەوە نیە و چەندەها كرێكاری بەسەزمانی كورد هەیە لە ناچاریدا مناڵ و ژن دەنێرنە سەر شەقامەكان بۆ پەیداكردنی بژێووی ژیان ، چونكە لەبەر هەرزانی دەستی كرێكاری عەرەب ، كار دەست كرێكاری كورد ناكەوێت. + لەو ووڵاتانە ژێرخانی ئابووری بەهێز و پتەوە و ترسی ڕوخاندنی نیە و لە دڵە ڕاوكێدا ناژین كە دراوسێكانیان تۆپبارانیان بكەن و سنوریان ببەزینن و ترسی هەبوونی سیخوڕیان نیە لە ژیر ناوی كرێكار ، بەڵام لە كوردستاندا ئەو ترسانە ڕۆژ لە دوای ڕۆژ لە زۆربووندایە ، پێویستە زۆر بە ووریاییەوە مامەڵەی لەگەڵدا بکەین. + لە ووڵاتان ،كە پەناهەندە ڕوویان تێ دەكەن لە ئوردوگاییەك كۆدەكرێنەوە و یەكسەر ڕێگا نادرێت كار بكەن و بە ئارەزووی خۆیان نیشتەجێ بن لەهەر كوێیەك بیانەوێت ،(وەك ئەڵمانیا) لە ناوچەیەكی دیاریكراو (30 كم) بۆیان هەیە بسوڕێنەوە ، بەبێ پسوڵەی هاتوچۆ سزا دەدرێن . ئەگەر هەندێ پیانوایە عەرەب لای ئێمە بێیانی نیە و بۆیان هەیە سەربەستبن لە كارەكانیاندا، من پێم وایە ڕاست نیە ، ئێستا عێراق بەس بەناو یەكگرتووە ، ئەگینا بەشكراوە ، هەرتاكێك بەسەربەستی بۆی نیە هاتوچۆ بكات ، تەنها لە كوردستاندا نەبێت. بەدرێژایی دروستبوونی عێراق ، كورد وەك هاووڵاتیەكی عێراقی سەیر نەكراوە و هەر بە میوان و كرێگرتە ونۆكەری ئیمپریالیزم دانراوە لەسەر خاكەكەی خۆی ، هیچ كاتێكیش ئەو هەستەی نەدراوەتێ و نەشیبووە كە عێراقییە و هەر خۆمان بە كوردستانی زانیوە. سەڕەڕای هەڵسوكەوتی برا عەرەبەكان و دانپیانەنانیان بە بوونمان و مافەكانمان ، ئێمە هەردەم دەروازەی كوردستانمان بۆ ئاوەڵا كردون و بە دڵسافی و ساویلكەیی خۆمان خزمەتمان كردون . لەگەڵ ئەمانەشدا چەند بازرگانێكی هەلپەرست و پارەپەرست ڕازی نابن بەوەی كوردستان پڕ بكەن لە عەرەب ، پارەیەكی زۆریش دەدەن بە هونەرمەندانی ڕەگەزپەرستی عەرەب ، كە ووشەی كوردستان نایەتە سەر زمانیان هەر بە (شمالنا حبیب) باسی دەكەن، و لە شارەكانی كوردستان كۆنسێرتیان بۆ ئامادە دەكەن ،هونەرمەندانی دڵسۆزی كوردیش پشتگوێ دەخرێن ، كە ئەمەش بەشێكە لە پلانەكانی دوژمن ، ئەی تا ئێستا بۆ هونەرمەندێكی كورد بانگ نەكرا بۆ شارێك یان ووڵاتێكی عەرەبی. دەسەڵاتدارانی كوردیش دەستەوئەژنۆ تەماشایان دەكەن!!!!!! بەكورتییەكەی بەبۆچوونی من، بوونی عەرەب بەم شێوەیە زیانێكی گەورە لە بزاڤە ڕەواكەی گەلەكەمان دەدات لە كوردستان دا ، زۆرتر لەوەی بەشداربن لە ئاوەدانكردنەوەی كوردستان ، تەنها ماڵوێرانی كوردستانی بەدوادا دێت.
* بۆ ئاگاداری ئەمە ڕوونكردنەوەیەك بوو بۆ ووتارەكەی بەڕێز كاك نەوشیروان مستەفا لە سایتی سبەی لەگەڵ سوپاسدا
|
