٩\٧\٢٠١٠

گۆشه‌ی '' رۆژه‌ک نا رۆژه‌ک ''. (٦)

ئاى خوایە..... ئەو رۆژەى حکومەتەکەمان نەمێنێ ئیتر ئێمە باسی کێ بکەین..؟!*

شێرزاد عومەر مەحمود

چونکە ئەمڕۆ کەسانێکى هەڵپەرست و نا نەتەوەیی و نا بەرپرس بەرامبەر بەو میللەتە لەناو حکومەت تەراتێن دەکەن و بە دڵی خۆیان میللەت و حکومەت دادەدۆشن، هەر لە بازرگانى کردنى ناڕەوا تا دەگاتە قۆرغکردنەوەى دەسەڵات بۆ بەرژەوەندى تاکەکەسی خۆیان، بەو بۆنەیە حکومەت بە هەموو دام و دەزگاکانیەوە بووەتە بە بنێشتەى خۆشەى سەر زارمان، لە هەموو شوێنێک و لە هەموو کات و ساتێ خوێندنەوە بۆ دەستى ئاشکراى گەندەڵچیەکانى ناو حکومەتە، جا کەسانێک هەن دڵیان بەوەزعەکە دەیەشێت و هەشە دڵی پێ خۆشە و ئى واش هەیە چونکە بەردەوام نانى بەعسی خواردوە و یەک قوربانى بۆ کورد و کوردستان نەداوە ئەوا لەپەنا سلبیاتەکانى حکومەت هێرش دەکاتە سەر عەقڵیەتى مرۆڤى کورد و موقەدەساتى نەتەوەیی هەمیشە حوکمى بەعسى پێ چاکتر و قارەمانتر زانیوە.

بەهەر حاڵ ئەمڕۆ حکومەت بووەتە گەنمى خێرێ و ئەوەى دێت مشتێکى لێدەدات بە رەوا و نا رەوا، بێدەنگى حکومەتیش نیشانەى رازیبوونى حکومەت نیشان دەدات بەرامبەر بە هەموو مشتەکان، حکومەت ئەگەر زۆرى بۆ بێ ئەوا بە هەڕەشەیەک وەڵامى هەمو لایەک دەداتەوە، کە ئەمەش هەرگیز چارەسەرى بنەڕەتى نییە، بێ پلانى و بێ بەرنامەی زۆرینەى دام و دەزگاکنى حکومەت و بە هەدەرچوونى سامانى نیشتمانى و بە ئیستیهلاک کردنى میللەت و فەرامۆش کردنى پرسە چارەنووسازەکان لەلایەک و خزمەتگوزارییە بنەڕەتیەکان لەلایەکى تر و گوێنەدان بە ئایندەى مرۆڤەکانى ئەم وڵاتە بە تایبەت گەنجان و رەشەکوژى ئافرەتان و فەرامۆشکردنى بەتواناترین چین و توێژی کۆمەڵگا و هەموو ئەمانە و دەیان پرسی تر ئەمڕۆ بوونەتە ئەو ئەژدیهایەى کە هەمیشە مۆتەکەى خەوى بێ وادەى تاکى کوردە لەم وڵاتە، ئیتر وابزانم کاتى ئەوە هاتووە بزانین لە شوێنە گشتیەکانەوە چ پەیامێک هەیە بۆ حکومەت:

• سەرتاشەکە بەدەم قژ بڕینەوە: چوومەتە باجى دەرامەت لەبەرامبەر نوێکردنەوەى مۆڵەت داواى 275000دیناریان کردووە و گوایە حکومەت پێویستى پێیەتى بۆیە زیادى کردوە.

• لەوسەرەوە موشتەریەک(ئەگەر حکومەت بەو 17% تێرنەبێ و بەشی نەکات بە هیچ تێرنابێ)، ناوەڕۆکى بابەتەکە دەقۆزرێتەوە.

• موشتەریەکى تر بەوجۆرە گەرمترى دەکات: برایان ئینسافتان هەبێ ئەوە نییە حکومەت بەو پارانە مووچە زیاد دەکات و بازاڕیش گەرم و گران دەکات.

• یەکى تر کە فەرمانبەرێکى پلەدارى سوودمەندە: ئەوەى من دەیزانم کارەساتە خەڵک هەیە چوار مووچەى هەیە و لە گوڵی کاڵترى پێ ناڵێن، سێ پارچە زەویشى وەرگرتوە و جنێویش بە حکومەت دەدات و بەو وەزعەش ناڕازیە.

• سەرتاشەکەى تر: ئێوە بۆ باسی داو و دەرمان ناکەن، باشە دەبێ حکومەت ئەو خەڵکە بە مرۆڤ نەزانێت رێگرى لەو بازرگانانە ناکەن لە هێنانى دەرمانى خراپ و ئێکسپایەر، بڕوا بکەن حکومەت ئاگادارى هەموو شتێکە چونکە ئەمەیان پەیوەندى بە ئەمنى قەومیەوە هەیە هەر دەبێ حکومەت ئاگاداربێ.

• موشتەریەک کە دڵی زۆر پڕە: کە گووتیان (مووچە) حکومەت وا خۆی نیشاندا نەباى دیوە و نەباران، خۆ ئەگەر بیانگووتبایە مووچە کەمدەکرێتەوە ئەوا حکومەت لە سێ مانگ پێش وەختەش کەمى دەکردەوە، ئێوە بۆ باسی ئەو شتانە دەکەن بۆ باسی ئەوە ناکەن کە حکومەت و حیزبەکان هەموو خەڵکیان کرد بە موچەخۆر و ئێستا وا تەواو مەستەهلیک بووینە و خەڵکى ئێستا پێی شەرمە کشتوکاڵی و مەڕدارى و کاربکات، توخوا حکومەت پێی شەرم نییە ماستاومان لە ئیران و هەنگوینى بیابان لە سعودیا و پەتاتە لەسوریا و شوتى لە فەلوجە و حەویجە و رانکو چۆغەلمان لە چینەوە بۆ دێت، کەوایە نازانم وەزارەتى(کشتوکاڵ و پیشەسازى و کار و ....هتد)مان بۆچییە، توخوا پێم بڵێن حکومەت شەرم لەخۆی ناکات کە وەزارەتێکى زل و زەبەلاحى کارەباى هەیە و کەچی هەموو کارەباى ئەو هەرێمە لەسەر مۆلیدە بەندە، باشە نازانم وەزارەتى ژینگە چ کارەیە لەکاتێکدا بە تۆن دووکەڵی ژەهراوى لە مۆلیدەکانى کارەبا دەردەچێت و ژینگەمان وێران دەکەن، باشە وەزیری ژینگە دەبێت ئەو مۆلیدانەى نە دیتبێت.

• موشتەریەکى دیکە کە پێدەچوو تازە لە ئەوروپا گەڕابێتەوە: هەر دار واشنتۆنێکیان بە 1350 دۆلار فرۆشتۆتە حکومەت کەچی لە ئەنقەرەى تورکیا دانەى تەنها بە 40دۆلار گەیشتۆتە کوردستان، کەچی حکومەت خۆی لە وشکە ساڵی بێ ئاگا کردووە، نازانم چ حیکمەتێک لەو هەموو دار واشنتۆنەوە هەیە، ئایا نەدەکرا لە بری ئەو پڕۆژە ئیفلیجە چەندین پارک لە دەورى شار دروست بکرابوونایە بۆ ئەوەى هەر نەبێ لە گەردەلوولى تۆز و خۆڵ بارین رزگارمان ببێ.
• سەرتاشەکە: بەعس دوژمنمان بوو راستەوخۆ مافی نەتەوەیی دەخواردى، بەڵام مافی ژیانى پێ دەداى، نزیکترین کەسی خۆی خیانەتى بکردایە لەسێدارەى دەدا، گەندەڵی لەکەس قەبوڵ نەدەکرد.

• سەرتاشەکەى تر بە ئاهێکەوە: کێشەکە لێرەیە، بەهۆی ئەو گەندەڵیانەوە خەڵک دەسەڵات و حکومەت و ئینتیماى نیشتمانى و نەتەوەیی تێکەڵدەکات، حکومەت هەرچی بێت نابێت ئێمە ئەوە لەبیر بکەین کە کوردین و ئینتیماى نەتەوەییمان لەبیربچێتەوە.

مشت و مڕ و گفتووگۆیەکە زۆری خایاند و لەوە زیاتر بوو کە نەگووترابوو، پێدەچوو سوودمەند و حزبیەکان زۆریان لە دڵ گران بێت بۆیە ئەوان بێ هەڵوێست و بێدەنگ تەنها گوێ ڕایەڵ بوون، بەڵام ئەوەى زۆر سەرنجى راکێشام قسەى کەسێک بوو کە لەکاتى رۆیشتنى گووتى:

• توخوا کەى مۆدێلی ئەوە ماوە خەڵک باس لە عەیبەکانى حکومەت بکات، ئەوەندەمان ویست و ئەوەندەمان داواکرد هیچی بە هیچەوە نەبوو، کە شتێک چارەسەر نەکرێ نەنگە زیاتر لێیەوە بدوێین و باسی بکەین، کوڕینە حکومەت سوا سوا.!!

_______________________
* دێرە شیعرێکى (دکتۆر فەرهاد پیرباڵ)ە.

s4632628@gmail.com