١٤\٢\٢٠٢٦

ئازادیی دەربڕین.

دارا خونچە

کە لە ئازادیی دەربڕین دەدوێین.. هیچ پێویستمان بە چەقەچەقی ئەکادیمیایی و فەلسەفیی نییە تا پێناسەی سەیروسەمەرەی بۆ دابتاشین! هەروا ئەو گشتە پەیف و گوزارشت و دەستەواژە بێ واتا و سەرلێشێوێنەر و هەڵبزوڕکاوانەشمان گەرەک نییە کە بیرمەندان و رۆشنبیران کاوێژیان پێوە دەکەن و بە پێی بەرژەوەندییە تەسک و خۆپەرستییەکانیان ئازادیی دەربڕینی پێ لە چوارچێوە دەگرن! تەنانەت پێویستە بەرپەرچی ئەو تێڕوانینە میللییانەش بدەینەوە کە زۆرێک لە چین و توێژە هەژار و کرێکارییەکان بە هۆی چەوسانەوەکەیان لە نەزانیی نقوم بوونە ''بە تایبەتییش دینییەکان و نێرسالارەکانیان'' پێیانوایە ئازادیی دەربڕین واتە بەرەڵایی یان بە ئارەزووی خۆت وەنێوبکەوی!

بەڵکە ئازادیی دەربڕین زۆر بە سادەیی و بە روونیی و راشکاویی واتە؛ هەر کەسێك بێ لەبەرچاوگرتنی رەنگ و رەگەز و نەتەوە و دین و هەر لەمپەرێکی دیکە و بەوپەڕی ئازادیی لە سەرجەم کار و جوولە و هەڵسوکەوتەکانی ژیانیدا ناخی خۆی دەرببڕێ، بە شێوەیەکی رۆشنتر واتە بتوانێ ئازادانە خۆی کار و چالاکییەکانی رۆژانەی ژیانی خۆی هەڵببژێرێ و ئەنجامیانبدا، لە رووی هزر و فەلسەفە و رامیاریی و رێکخرابوون و کۆی کار و چالاکییە فەرهەنگییەکانیش جیهانبینیی و تێڕوانینەکانی خۆی لە رێی ئاخاوتن و نوسین و هونەر و هەر ئامرازێکی میدیایی هەیە دەرببڕێ، لە خواردن و خواردنەوە و سێکسکردن و هەر جۆرە پەیوەندییەکی سۆز و خۆشەویستیی بەهرەمەند بێ، خۆی بڕیار لەسەر شوێنی نیشتەجێبوون و چۆنیەتی و چەندیەتی گەشت و گەڕانی خۆی بدا، لە نمایشکردنی کردنی جەستەدا خۆی جلوبەرگ و رەنگ و شێوە و ئاکاری خۆی دەستنیشان بکا... بە کورتییەکەی لە تێکڕای خۆدەربڕینی خۆی ئازاد بێ، بەڵام نابێ بە هیچ جۆر و شێوەیەک لە کاتی هەڵسوکەوتکردن و پێڤاژۆی هیچ ئازادیی دەربڕینێک زیان بە ماف و ئازادییە گشتییەکان و پاراستنی ژینگە بگەیەندرێ.

ماڵپه‌ڕی دارا خونچە