١\١٠\٢٠١٤

    ئازادیی لە لێوانم دەزێ!

دارا خونچە

ئازادیی؛ نە لە ئاسمان دادەباری
     نە لەو گۆڕەش پەیدا دەبی،
ئەز سوڕ دەزانم ئازادیی
     تەنێ لەسەر لێوەکانم
              ئاوس دەبی و
                   لەوێش دەزێ!

    *    *    *

کەنگێ پەیڤە بڤەکان و
گوزارشتە رۆشنەکانم
    بێ ترس و پرس و بێ پەروا
    وە جریوە جریو
           لەسەر لێوانم هەڵفڕین؛
هەنگێ ئازادیی یەک واتای دەبی!

    *    *    *
کەنگێ حەزە پەمبەکان و
خورپە (تەڕوبڕ)ەکانم
    بێ ترس و پرس و بێ پەروا
    ئارام ئارام
              لەسەر لێوانم داڕژان؛
هەنگێ ئازادیی یەک واتای دەبی!

    *    *    *
ئیدی کەنگێش
تێکڕای جێپەنجەی لێوانم
    بێ ترس و پرس و بێ پەروا
    لەسەر هەر چشتەک
               دەرکەتن؛
هەنگێ ئازادیی سەت واتای دەبی!

کۆتایی ئەیلوولی ٢٠١٤ - لەندەن

ماڵپه‌ڕی دارا خونچە