١٩\١٠\٢٠٢٣

با پێکەوە بەر بە کوشتاری خەڵکی غەزە بگرین!

خەڵکی ئازادیخواز و مرۆڤدۆست.
رێکخراوەکانی داکۆکیکار لە مافەکانی مرۆڤ و ئاشتیخوازان.

دوای ئەوەی بزووتنەوەی حەماسی فەلەستینی و هێزی چەکداری سەربازی کەتیبەکانی قەسام سەرلەبەیانی ٧ی تشرینی یەکەم لە ژێر ناوی "توفانی ئەقسا" پەلامارێکی لەناکاوی بە رێگای ئاسمانیی و زەمینیی و دەریاییان بۆ سەر ناوچەکانی ئیسرائیل دەستپیکرد لە ئاکامدا ژمارەیەك سەرباز و دەیان خەڵکی سڤیل کوژرا و بریندار و بەدیلگیران، حکومەتی ئیسرائیل لە ژێر ناوی تۆڵەسەندنەوە لە حەماس، دەستی داوەتە ئۆپەراسیۆنێکی سەربازیی لە دژی خەڵکی فەلەستین بە ناوی "شمشیری ئاسنیین"ەوە و لە سەروو هەر پرەنسیپێکی مرۆییەوە کەوتۆتە گەمارۆدانێکی ئابووریی و سەربازیی غەزە و لە هەر ساتێکدا بە تۆپ و فڕۆکە و ڕۆکێت، کەوتۆتە کوشتاری بەکۆمەڵ و خاپوورکردنی شوێنی هاوڵاتیان کە تا ئیستا بە هەزاران قوربانی لە خەڵکی سڤیل لە ژن و منداڵ پیر و پەکەوتە سەندوە و بە سەدان کەسیش ئاوارە و بێ شوێن و پەنا کراون و هەزارانیتریش لە نێو ئاگری شەڕ و بارووتدا گیریانخواردوە و هیچ رێگەیەکی دەربازبوون لەبەردەمیاندا نەماوەتەوە. بەم جۆرەش حکومەتەکەی ناتانیاهۆ خەڵكی فەلەستینی لەبەردەم کارەساتێکی گەورەی مرۆییدا راگرتوە.

خەڵکی کریکار و زەحمەتکیشی و بیتاوانی ئیسرائیل و فەلەستین قوربانی دوولایەنی کۆنەپەرست و مرۆڤکوژن کە ساڵانیکە ژیان و ئاسایشیان خراوەتە مەترسییەوە. هەر بۆیە ئەم دۆخە کاردانەوەی خێرا لە بەرەی ئازایخواز و خەڵکی پێشکەوتنخوازی جیهان دەخوازێ. پێویستە لە بەرامبەر ئەو دۆخە و ئاکامە زیانبارەکانیدا ئازادیخوازان و رێکخراوەکانی داکۆکییکار لە مافەکانی مرۆڤ و چینی کرێکار و هێزە سۆسیالیست و پێشکەوتنخوازەکان، پێبنێنە مەیدانەوە و سنوورێك بۆ دەستدرێژەییەکانی ئیسرائیل و ئەو میلیتاریزمە وێرانکەرەی کە بەپشتیوانیی ئەمەریکا و دەولەتانی رۆژائاوا دەستیانداوەتێ دابنێن. خەڵکی غەزە پێویستیان بە هاوپشتیی و کۆمەك و بەهانەوەچوونی خێرای هەموومانە. لەم راستایەدا فیدراسیۆنی سەراسەری پەنابەرانی عێراقی بانگەوازی ئازادیخواز و خەڵکی پێشکەوتنخوازی جیهان دەکا بۆ راوەستانی ئەو جەنگە و بەرگرتن بە لێکەوتەکانی پێبنێنە مەیدانەوە:

١- راوەستانی دەستبەجێی جەنگ و بۆردومانەکان وێرانکردنی ماڵی هاولاتیانی سڤیل لە هەردوو لا.
٢- راگرتنی داگیرکاریی و سیاسەتی پاکتاوسازیی رەگەزیی و سزادانی بەکۆمەڵی خەڵكی فەلەستین.
٣- هەڵگرتنی دەستبەجێی گەمارۆی ئابووریی سەر کەرتی غەزە و رێگە بدرێ بە رێکخراوی نەتەوە یەکگرتوەکان و ریکخراوەکانی مافی مرۆڤ کە بە هانای بریندار و ئاوارەکانەوە بچن.
٤- راگرتنی لەشکرکێشیی و میلیتاریزمی ئەمەریکا و دەولەتانی تر بۆ ناوچەکە و رێگەنەدان بە هەر کۆمەکێکی سەربازیی وتەکنیکیی بە هەردوو بەرەی جەنگەکە.
٥- ئازادکردنی دەستبەجێی گیراوەکانی جەنگ لە هەردوو لا.

فیدراسیۆنی سەراسەری پەنابەرانی عێراقی