به‌هادین نوری‌ سوکایه‌تی به‌ خۆی ئه‌کات.

عامر سابیر    

به‌هادین نوری به‌م کۆتایی و به‌م نه‌خۆشییه‌، هه‌ر به‌رده‌وامه‌ له‌ سوکایه‌تی کردن به‌ خۆی، به‌ قسه‌ی خۆی له‌وکاته‌وه‌ی نه‌خۆشه‌ چه‌ندین نامه‌ی ناردووه‌ بۆ جه‌لال تاڵه‌بانی و مه‌سعود بارزانی تا بۆ چاره‌سه‌ر بینێرنه‌ ده‌ره‌وه‌ی وڵات، تاڵه‌بانی له‌ پاش ده‌ مانگ و بارزانیش له‌ پاش یه‌ک مانگ وه‌ڵامی نامه‌ی یه‌که‌می ئه‌ده‌نه‌وه‌، که‌ هه‌ر به‌ڵێن بووه‌، وه‌ تا ئێستا هیچی لێ سه‌وز نه‌بووه‌.

به‌هادین نوری له‌ ٦/٥/٢٠٠٨ نامه‌یه‌کی تر ئه‌نێرێت بۆ تاڵه‌بانی، که‌ به‌ قسه‌ی به‌هادین خۆی دوو هه‌فته‌ له‌سه‌ر مێزه‌که‌ی دانراوه‌ و نه‌یخوێندۆته‌وه‌، ئه‌میش تووڕه‌ ده‌بێت و ده‌ینێرێت بۆ ڕۆژنامه‌ی ئاوینه‌ له‌ ٢٥/٥/٢٠٠٨ بۆ بڵاوکردنه‌وه‌، وه‌ داوا له‌ خوێنه‌رانی نامه‌که‌ی ده‌کات بۆچوونی خۆیان ده‌رببڕن

من له‌و بڕوایه‌دام که‌ به‌هادین نوری ئه‌گه‌ر نامه‌یه‌کی کورتی بۆ ئه‌ندامانی ئه‌و حیزبه‌ی پێشتر سکرتێری بووه‌ بنووسیایه و داوای کۆمه‌کیانی بکردایه‌، ئێستا له‌ده‌ره‌وه‌ چاره‌سه‌ر ئه‌کرا.

به‌ بڕوای من به‌هادین نوری، ئه‌گه‌ر له‌ گونده‌که‌ی خۆی، (ته‌کێ) له‌ ناوچه‌ی قه‌ره‌داغ, یان له‌سه‌ر قه‌ره‌وێڵه‌که‌ی نه‌خۆشخانه‌ی سلێمانی، پاڵکه‌وتایه‌ و بمردایه‌ به‌بێده‌نگی، زۆر شه‌ره‌فمه‌ندانه‌تر ئه‌بوو له‌وه‌ی بگاته‌ له‌نده‌ن و نه‌مسا بۆ چاره‌سه‌ر له‌ ئه‌نجامی نووسینی نامه‌ی ئاوا پڕ له‌ سوکایه‌تیکردن به‌ خۆی.‌

تۆ بڵێی، به‌هادین نوری توانای هه‌بێت و خۆی ئاگاداری نووسینی ئه‌و نامانه‌ بێت، یان که‌سانی ده‌وروپشتی ئاوا سوکایه‌تی پێده‌که‌ن و به‌م نه‌خۆشی و پیرییه‌ کردوویانه‌ به‌ مه‌هزه‌له‌ و نامه‌ی ئاوا پڕ له‌ پاڕانه‌وه‌ی پێده‌نووسن.
 

8/6/2008

asabir79@hotmail.com