١٢\٣\٢٠١٠

     به‌ڵێننامه‌.

ئارام ئه‌بوبه‌کر

ئه‌گه‌ر هاتى ...
گشت نێرگزى ئه‌م به‌هاره‌
ئه‌کڕمه‌وه‌
وه‌ک ته‌وقه‌ ئه‌یده‌م له‌سه‌رت
ئه‌گه‌ر هاتى ...
داره‌کانى ئه‌م هه‌واره‌
ئه‌بڕمه‌وه‌
بێت و هه‌ڵنه‌ستن له‌ به‌رت !.
به‌ڵام
چیبکه‌م که‌نایه‌یت و
منیش چاوه‌ڕێم گشت کاتێ
تۆش
بوویت به‌ ئه‌ستێره‌ى سیوه‌یل
چه‌ند ئه‌که‌م
ده‌ستم ناتگاتێ !!.

 خه‌یاڵێکى پڕ له‌ڕاستى.
تۆ ، له‌که‌نار ڕووباره‌که‌ ،
ورد ئه‌بویته‌وه‌ له‌ باڵات
منیش ، به‌سوارى که‌شتیه‌ک...
به‌تاسه‌وه‌ بووم بێم بۆلات.!
له پڕ بوو به‌هات و هاوار ،
که‌شتى نغرۆبو ڕاسته‌وخۆ
ئه‌وسا زانیم نه‌ک به‌ڕاستى ...
به‌خه‌یاڵیش ناگه‌م به‌تۆ !!.

  شیرین بووم لێت .
که‌ دڵخوازت بووم ،
که‌ هاوڕازت بووم ،
لات بێنرخ بوم پێت ئه‌وتم : شێت
هه‌تا ئه‌و ڕۆژه‌ى...
له‌دڵى خۆمدا ده‌رمپه‌ڕاندى و
گۆشه‌ى گریانم بۆ کردى به‌ جێت .
ئیتر له‌وساوه‌...
بووم به‌ هه‌نگوین و ،
ده‌قه‌ به‌ ده‌قه‌ شیرین ئه‌بم لێت !!.

  دوو دڵۆپ خۆزگه.
خۆزگه‌ ئه‌بووم به‌ پیتێک و
بۆ سه‌ر لقى لێوت ئه‌فڕیم
به‌ڵکو جارجار له‌ ده‌مته‌وه‌ ،
به‌ناسکى ده‌رتئه‌بڕیم .
یان خۆزگه‌ ئه‌بووم به‌ حه‌رفێک ،
له‌و حه‌رفانه‌ى ...
ناوه‌که‌تى پێئه‌نه‌خشێ
خۆ هیچ نه‌بێ ...
ئه‌گه‌ر بیکه‌یته‌ ملوانکه‌ ،
له‌و مل و گه‌ردنه‌ت ئه‌خشێ !.

aramabu@yahoo.com