٨\١٠\٢٠١٣

بێ متمانەیی، لەنێوان نەوەکانی دوێنێ‌ و ئەمڕۆدا..

ئەرسەلان مەحمود   

بێ متمانەیی، هەندێجار جگە لەگرێیەکی دەرونی،"بەتایبەتیش لەوڵاتانێکی لەمەڕ خۆمان و، لەفەزای حیزبی و، سیاسیدا "، جگە لەخوێندنەوەو، تێفکرینێکی زۆر سەرچڵیانەو، نابابەتی، هەڵگری چجۆرە بنەمایەکی واقعبینانەو، زانستیانە نیە، یانی ئەوەندەی وەک جۆرە دڕعێک بۆ پارێزگاریکردن لەپایەو پێگە حیزبی و، ئیدارییەکان، بەکار دەبرێت، هەرگیز ئەوەندە دەرچەی چجۆرە لەمەحەکدانێک نییە.

بێ متمانەیی، وەک واتا، هەڵگری دەرئەنجامێکە تەواو نیگەتیڤ، بەڵام بەر لەوەی بسەپێندرێت، دەبێت بخوێندرێتەوەو، دەردەشە بکرێت، بەبێ‌ وەها هەڵسەنگاندنێک، کاردانەوەکانی دەبنە مایەی نەمانی گفتوگۆی ئازادو، عەقڵانی، بەمانایەکی دیکە، ‏دەبنە مایەی نەمانی بازاڕی ئازادی خود بەخاوەندارێتیکردنی خود لەخۆدا، ئەمەش گەورەترین کاریگەریی وێرانکەری دەبێت لەسەر مرۆڤ، تەنانەت لەسەر ئەوانەیش پێیان دەوترێت سەرکردە، چونکە ئەمە لەوانەوەیە قسەی ‏زل و بێمانا دەبێتە شای هەموو شتێک، هەروەک فڕێدانی ئەو دەستەواژانەی زۆربەیان درۆن و بەئامانجی خودسەپاندن و خودمەزنکردن لەمانەوە دەردەچن.

خودێکی پاسڤ و، نغرۆی ناو ڕابردوویەکی موجەڕەد، جا لەهەر پلەو پایەو پێگەیەکدابێ‌، هەر ئەو خودەی بەتەنها لەبنباڵییەوە کۆتاییەکان دەبینێت، لەبنەمادە خودێکی ئەوپەڕی وەهمییە لەزیهنداو، دواینجار نایەوێ‌ دەنگیدی ببیستێت، نایەوێ‌ ڕەنگیدی ببینێت، نایەوێ‌ ببێت بەڕابردو، بگرە دەیەوێ‌ بڵێت ئەوەی هەیە بە" من " دەستیپێکردوەو، هەر دەبێ‌ لە" من "ـیشدا کۆتایی بێت، هەیمەنەپێکردن و، ڕەوایەتیپێدانی وەها هزراندنێکیش لەم سەردەمەدا، بەلای ئەمانەوە خۆی لەبەشینەوەی بێ متمانەیی و، دڕدۆنگیدا دەبینێتەوە، دیارە بەنیەت و نیازی بەرزکردنەوەی پێگەی خۆی و، بەڕەعییەت هێشتنەوەی ئەوانیدی، واتە پێداگرتن لەسەر هزری خود پەسەندی خۆی و، خاوەکردنەوە یان کاڵکردنەوەی هزری خۆبەخاوەندارێتیکردنی ئەوانی دی.

لەبەر ئەوە، ئەگەر هەبێ‌ هێشتا هەر لەو باوەڕەدابێ‌، لەخاچدانی مرۆڤ، نیشانەی پاکبوونەوەیە لەگوناهـ و، هێمای قوربانیدانە لەلێهاتوویدا، واتە ئەوەی بییەوێ‌ پاکببێتەوە لەگوناهـ و، تواناکانی لەمەحەک بدرێ‌، دەبێ‌ لەخاچبدرێ‌، هەڵەیەو، بوونەوەرێکیشە تەواو ڕەجعیگەراو، کۆنزێرڤاتیڤ، نەوەی ئەم سەردەمە، نەوەی زەمەنێکی زۆر جیاواز لەدەورانی ڕابردووەو، پاکبوونەوەی خۆی لەڕەچە شکاندن و، لەمرۆڤبووندا، دەبینێت، قوربانیدان و، لێهاتووییەکەی لەبەشداریپێکردن و، لەتاقیکردنەوەی توانستەکانیدا، دەسەلمێندرێت.

زۆرینەی دەوڵەت و، حکومەت، حیزب و، دامەزراوەکانی کۆمەڵگەی مەدەنی و، سیاسیە خۆرئاواییەکان، ساڵانە جگە لەزانکۆکانیان، بەدەیان و، سەدەها دامەزراوەی تایبەت تەرخان دەکەن، بۆ بەرهەمهێنانی گوتارو، خیتابی نوێ‌ لەناو نەوەی نوێدا، بەڵام لەوڵاتانێکی لەمەڕ خۆماندا، تەواوی ئەم ناونیشانە جیاوازانەی سەرەوە، لەبری وەها پەرەپێدانێک، متمانە بەنەوەی نوێ‌ ناکەن، ئەوەی بیشیەوێ‌ بەرگە بگرێت، تەریک دەکرێت، دەخرێتە پەراوێزەوە بەنیازی ئەوەی لەبێچارەیدا ببنە کۆیلەو، ببَتە بوونەوەرێکی بێدەنگ، لەڕاستیشدا، هەموو ئەمانە، لەبەر تەنەها هۆکارێکە، ئەویش" خەمی لەدەستدانی ئەوەی هەتا ئێستا وەک خود بۆ خودیخۆیان بەدەستیان هێناوە".

ئەگەر ئەمە تومەتبارکردنێکی بێمروەتانەیە، ئەی بردنە پێشەوەی نەوە خودییەکانی خۆیان لەپێگە حیزبی و، کارگێڕییەکاندا، ئەی بەشداریپێکردنی منداڵەکانی خۆیان، لەچالاکییە نێودەوڵەتیەکاندا، ئەی ناردنە دەرەوەو، خوێندنی منداڵانی خۆیان، لەزانکۆ بەناوبانگەکانی دنیادا، ئەی دابینکردنی ئەم هەموو کۆشک و، تەلارو، ئۆتۆمبێلە نازدارە، ئەم هەموو باخە، ئەم پاسەوان و، دەسەڵات و، ... هتد، چوختەی دەیاها ئەو بەڵگە نکۆڵیهەڵنەگرانەی وەها حەقیقەتێک نین؟ ئەی ئەوەی چەند ساڵێکە، لەبنەمادا لەپێناو فراوانکردنی پشتێنەی پارێزگاریکردن لەمانەوەی خۆیان، دەستیان داوەتە بارگاویکردنی منداڵانی شەهیدیش، تەواو پێچەوانە بەڕێڕەوی وەها ماناوەیەکی بەماناوە نییە؟، دیارە منداڵانی شەهید، شایستەی ئەوەن ئاستیان بەرز بکرێتەوەو، پەرە بەتواناکانیا بدرێت، دەهێنن هەر جۆرە خزمەتگوزاری و، کارئاسانییەکیان پێشکەش بکرێت، بەڵام میراتگرەکانی رابردوو، هەموو نەوەکانی ئەم وڵاتەن.

لەبەر ئەوە، دەبێ‌ ئیدی‌ لەوە تێبگەن، ئەگەر نەوەکانی دوێنێ‌ بەتەنها هەر خەمی لەدەستدانی ئێستایان بێت، ئەوە ئەم نەوە نوێیەیش بەتەنها لەخەمی بەدەستهێنانی ئێستایدایە، خەمێکیش ئەم هەموو کۆڵهەڵگرە ڕەش و، ڕووت و، خاوەن خولیایانەی هەبێ‌، ئەمڕۆنا، سبەی، هەر دەگاتە جێگەو، خۆی لەخەم دەڕەخسێنێت، دەی بۆ لەبری قوڵکردنەوەی وەها ململانێیەک، خەمەکان نەکەینە یەک خەمی هاوبەش؟..
 

ماڵپه‌ڕی ئه‌رسه‌لان مه‌حمود