٩\١\٢٠١٤

بەرداشەکانی کۆمەڵگەی حیزبیی.

ئەرسەلان مەحمود   

ئەوەی خەڵک دەهێنێتە سەر شەقام لەکوردستاندا، هەژموونی دنیای نوێ‌ و چەکرەکردنی ئەو کەلتوورە هاوبەشەی مرۆڤگەلی ئەم سەردەمە نییە، چونکە هێشتا ڕاڕەوەکە لەکوردستاندا بەدەست کۆیلەگەرەکانەوەیەو، ڕێڕۆیش هەر بەرەو خود کیلەگەرکارییە، بەڵکە وەک پێویست نەبوونی خزمەتگوزرای و ڕەتکردنەوەی نابەرابەرییە لەژیانکردندا بەمانا سادەکەی، درککردنە بەناشەفافییەت و بەلاڕێدەبردنی دەسەڵات بەمانا حیزبییەکەی، دژایەتیکردنی ئاپارتمانێکە لەکات و درۆی بەسەریەکدا ترشاو بەمانا کۆمەڵایەتییەکەی، بۆ بەرگرتنە بەشێلانی گیرفان لەسەر قوت و کەوڵی ئەوانی دی بەمانا بابەتییەکەی، بۆ ڕێگرتنە لەغروری و جێگۆڕکێ‌ بێ‌ ماناکانی شەیتان بەمانا سوننەتگەراکەی، ئەوەتا وەک هەمیشە میدیا وروژێنەرە بەئەنقەست و بەمەبەستەکانیش، بێباکانە ئاڕاستەی هێزە مەزنە وروژاوەکەی خەڵک، لەمرازی خۆی دەترازێنێت و ناڕەزایەتییە بێ‌ ڕتووشەکانیان بەڕتووشکراوی دەیخاتەوە خزمەت موزایەداتە جۆراو جۆرە قازانج ویستە قێزەونەکانی خۆی و سەرچاوەکانی ئاڕاستەکردنیانەوە، بە نموونە:

دروشمەکانی ڕۆژانی دووەم و تا کۆتایی وروژاوان جگە لە" ئازادی، ئازادی " غەیب دەیبات، وەک ئەوەی ئازادی لەسایەی "ئەلف"ـدا کەوتبێتە ژێر پرسیارو مەترسییەکانی لەناوچوونەوە بەڵام لەسێبەری "با"ـدا، دونیا شامی شەریف بێت، بەدبەختییەکە ڕەنگە لەوەدابێ‌، چۆن داری ئازادیمان بەخوێن ئاودا، ئیدی دەبێ‌ بەری دیموکراسییەتیش هەر بەوەها خوێنێک پاراو بکەین، ئەگەر نا، لەڕاستیدا، نەخزمەتگوزاری وەک ئەوەی دەبێ‌ هەبێ‌ هەیەو، نەئازادیش دروست بەمانای ئازادی بوونی هەیە، بەڵام ئەگەر هاتنە سەر شەقامی ئەم خەڵکە تەنها پەیوەستە بەدروستکردنی فشار لەپێناو هێنانە ئاراوەی خزمەتگوزارییەکی زیاترو شایستەتر بەهەبوونی ئەو خەڵکە، ئەدی وتنەوەی "ئازادی، ئازادی" لەوەها دۆخێکدا جگە لە"پارادۆکس"ـی حیزب و یەکە بڕیار بەدەستەکانی ئەم کۆمەڵگەیە، بڵێن تا بڵێم شوێنگەی چییە لەوەها شەتەکدانێکدا؟، ئەدی ئەگەر هاتنە سەر شەقامی ئەم خەڵکە لەبەر نەبوونی ئازادییە، بڕو بیانوی نەبوونی خزمەتگوزاری جگە لەکار تێکەرێکی فریودەرانەی وروژێنەر، بێژن تا بێژم بەهای چییە لەوەها جوینەوەیکدا؟

ئەم نابەتیبوون و ناتەباییە هەمەکییەی لەژینگە سیاسیەکەی ئەم وڵاتەی خۆماندا بووە بەواقیع و خەریکە بەکۆمەڵایەتیش دەکرێت، ڕەنگە لەهەر شت زیاتر زادەی نەبوونی زمانی بەموختابگرتنی شەقام و ئەو ناهۆشیاری و زانیارییە هەڵەو باوانە بێت سەبارەت بەدیاردەو دەرکەوتە جیاکانی ناوکۆی کۆمەڵگە وەک تاک و یەکە پێکهێنەرەکانی هەمانە، ڕەنگە لەبەر ئەوەیش بێت پرسیار گەلە هەستیارو سەرەکییەکە وەک تاک هێشتا لەزیهنییەتماندا بەمانا نەبووەو، لەبەرامبەردا یەکە گوتاربێژو بڕیار بەدەستە باڵاکانی کۆمەڵگەیش ئەوەتا دڵخوازانە ئەم نائامادەگییە لەقازانجی هاوسەنگکرنەوەی ململانێکانی نێوان خۆیاندا لاڕێ‌ و ئیستغلا دەکەن، یانی نایانەوێ‌ بۆشاییەکانی هەبوونمان بەهەڵوێست نواندنە ڕاست و دروستەکان تەژی بکەینەوە، چونکە ئەگەر خەمە قوڵەکەی خەڵک هەبوونی ژیانێکی شایستەترە بێ‌، ئەوە بەدڵنیاییەوە خەونە گەورەکەی حیزب، شوێنپێکردنەوەی زیاتری خۆی و جومگەکانی خۆیەتی لەسەر کەوڵی ناڕەزایەتییەکانی ئەم خەڵکە، هەر لەبەر ئەمەیشە نایانەوێ‌ فێرە ئەوەبین پرسیاری جیددی دروستبکەین لەخۆماندا، بەنمونە ئەو پرسیارانەی:

" خۆم وەک تاک بۆ دەستەبەرکردنی ماف و ئازادییەکانم دەبێ چیبکەم؟.. ئایا پتەوکردنی دیمۆکراسییەت دەتوانێ ماف و ئازادییەکانم وەک تاک تاچەند دەتوانێ‌ دەستەبەر بکاو بپارێزێت؟.. ئەی ئایا کەوتنە دوای هەڵڵای ئەم و ئەوێک دەتوانێ لەمندا ئەگەر بێماناییەک هەبێ‌ بەمانای بکاتەوە؟.. ئەی ئایا ئەگەر بەهێز کردنی پیگەو پایە یاساییەکانم وەک پارێزەری ماف و ئازادییە خودییەکانم بەلاوە گرینگەو بەخاتری ئەوە هاتوومەتە سەر شەقام، ئەزانم وڵاتەکەم ئینگڵاند نییەو لەغیابی دەستورێکی هاوچەرخدا وەها بەهێز بوونێک زاڵگەرایی حکومەتێکی تەواو مەرکەزی دەهێنێتە ئاراوە؟.. جەستەی خۆم موڵکی کێیە؟.. ئەی دیدو ڕوانینەکانم دەستکردی کێن؟.. ئەی ئیستغلاکردن و پێشێلکردنی ئەم بنەمایانە لەژێر ناوی چاکەی گشتی و پاراستنی بەرژەوەندییە گشتییەکانەوە دەچێتە خانەی خزمەت بەکێ‌ ؟.. ئایا خۆم وەک مرۆڤ ئازادم لەوەی دەسکردو داهات و موڵکایەتییەکانی خۆم وەک ماف و ئازادییەکانی خۆم گەشە پێبدەم و بپارێزم بەو مەرجەی تەجاوز نەکەمە سەر ماف و ئازادی و موڵکایەتیکردنی ئەوانی دییەوە؟..".

ئەمانەو زۆر پرسیاری تریش، دەتواندرێ‌ لەدو ئاستدا وڵام بدرێنەوە، یەکەم، وەک ئەوەی سروشت دەڵێت" تۆ وەک تاک ئازادی و مافی تەواوەتی موڵکداریەتی تایبەت بەخۆتت هەیە، یانی بۆت هەیە ماف و ئازادییە خودییەکانی خۆت ئەزمونبکەی، ئەمە بەبێ‌ ئەوەی کەس بۆی هەبێت ئەم ئازادی و مافە خودییانەت لێ زەوت بکات و لەبەرژەوەندی خۆیدا وەک ئەوەی ئێستا لەکوردستاندا بەکار دەبردرێت، بەکاری ببات، ئاشکرایە خودا بەر لەهێنانە ئاراوەی ئاینەکان، جەستەو هزرو ئاکاری بەخشیووەتە هەر مرۆڤێک، هێنانە ئاراوەی ئاینەکانیش هەر لەخزمەت مرۆڤدا بەمانا کردن، نەک مرۆڤەکانی خستبێتە خزمەت ئاینەکانەوە، یانی ئەگەر ئەمە سەبارەت بەخوداو ئاینەکان وابێ‌، ئەوە حیزب و ئایدیۆلۆژیاو فەلسەفەکان هەرگیز مافی ئەوەیان نییەو نابێ‌ مرۆڤ بخەنە خزمەت هەڵکشانی جێگەو پێگەو ڕێگەی خۆیانەوە، دووەم، بەمانابوونی ئەم ماف و ئازادییە خودییانەو پارێزگاری لێکردنیان، لەبەر ئەوەی لەم لەسەردەمە دیجیتاڵییەدا ڕەنگە هەروا سادەو سانەیش نەبێت، بەڵکە لەبنەڕەتدا ڕەنگە پێویستییان بەهەبوونی ئۆرگانێک هەبێ‌، بەڵام ئەوە هەر حکومەت و دەوڵەت نییە بتوانێ‌ وەها وەک ئۆرگانێک ئەو ماف و سەلامەتییانە بپارێزێت، لەدنیای پێشکەوتودا ئەگەر نەوترێ‌ ئەمە ئەوەندەی حکومەت ئەرکی کۆمەڵگەی مەدەنی و کەرتی تایبەتە، ناشتواندرێ‌ نکۆڵی لەڕۆڵییان بکرێت، وتم کۆمەڵگەی مەدەنی و کەرتی تایبەت، نەک کۆمەڵگەی حیزبیی و کەرتی قۆرغکراوی تایبەت، هەروەک ئەوەی لەژێر ئەم ناوەدا ئێستا لەکوردستاندا بوونەتە بەرداش و کەرامەتی مرۆڤی کورد دەهاڕن و لەخۆڵەمێشەکەیشیان کۆیلەی حیزبیی و پاسەوانی پارێزگاریکاری بێدەربەستی سەروماڵی ناشەرعی بابای خاوەنشکۆی لێدروست دەکەنەوە، وابزانم ئیدی کاتی ئەوە هاتووە ماف و ئەرکە تایبەتی و جڤاکییەکانی خۆمان وەک تاک، لێرەوە بەر لەهەر شتێک لەخۆماندا تەتەڵەو دەردەشە بکەین و هەنگاو باوێینە دەروەی ئەم زیهنەتە باوگەراو فراوانخوازییەو ببینەوە بەخۆدێکی خاوەن نەخش.
 

ماڵپه‌ڕی ئه‌رسه‌لان مه‌حمود