په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک

٤\٣\٢٠١٢

بەرژەوەندیی کورد لەگەڵ عێراقدایە نەک لایەنێکی دیکە - مالیکی.


ھیوا رەش      


ئەو ناونیشانەی سەرەوە بەشێکە لە قسەکانی مالیکی - سەرەکوەزیرانی عێراق - لە میانەی چاوپێکەوتنێکی ڕۆژنامەی - عوکاز - ی سعودیدا ، جێگەی ئاماژەپێدانە کاتێک سەرەکوەزیران قسە دەکا دەبێ بزانێ کە خوێندنەوەی جیاجیای وردی بۆ دەکرێ چونکە دەبێتە وێنای سیاسەتی فەرمیی وڵات ، بۆیە دەبێ بە لێوردبونەوەی تەواوەوە بێتە گۆ ، ھەڵوێستی ڕاگەیەنراوی ئەمجارەی نوری مالیکی لەمەڕ مافی بڕیاردانی چارەنوسی گەلەکەمان ھاوشێوەی شۆفینیزمە عەرەبە باڵادەستەکانی پێشوتری عێراق کە خوێنی یەکتریان دەکردە کاسەوە ، کەچی لە بڵند کردنەوەی بەیداخی قەڵاچۆکردنی نەتەوەی کورددا کۆک و تەبا بوون و بە ئەمانەتەوە ڕادەستی یەکتریان دەکرد ، جا کاوێژەکانی مالیکیش نە تازەیە و نە نامۆ کە دەیەوێ وەکو ھاوسەرۆکە ھاوبیر و ھاوشێوەکانی پێشخۆی ھەمان قەوانی سواو لێبداتەوە و وەکو ئەوانیش کورد بەوە تاوانبار بکات کە بە دەستی لایەنێک دەیەوێ ھەنگاو بنێ بۆ ئەوەی لە عێراق جیا بێتەوە ، خۆیان وتەنی : عێراق پارچەپارچە بکەن ، بێئەوەی خوێندنەوەی ھەبێ بۆ خواستی سەربەخۆییبوون بۆ ساڕێژ کردنی پارچەپارچەیی خاکێکی دابەشکراو و گەلێکی بێئاڵا و بێناسنامە و مافی دامەزراندنی دەوڵەتی کوردستان وەکو سەرەتاییترین مافی گەلان ، قسەکانی ناوبراو واتایەک دەبەخشێ و لەوەش زیاتر لە ھەگبەکەیدا جێگەی نابێتەوە کە خاکی کوردستان بە پارچەیەک لە - نیشتمانی عەرەب - و گەلی کوردیش بە بەشێک لە - نەتەوەی عەرەب - دەزانێ ، بەڵام دەبێ بیریان نەچێ کە نە عێراق و نە لایەنێکی دیکە مەحاڵە تا سەر بتوانن خاوەندارێتیمان بکەن و خاکمان بە میراتی باپیری خۆیان بزانن کە نزیکەی سەدەیەکە لە ژێر باری سیاسەتی ڕەگەزپەرستانەی شۆفینیزمیی نەتەوەی باڵادەستدا یەخسیر و داگیر کراوین ، بەڵام ئەوەش دەبێتە مێژویەکی پڕ شەرمەزاریی بۆیان و ڕۆژێک دادێ ئەمڕۆ بێ یا سبەی گەلی کورد بە تەواوی مافەکانی خۆی بگا.

دوژمنان وەکو پیشەی فرچکپێگرتویان ھەمیشە لە کاتی لاوازییاندا خنەخنیان کردووە و بە خەندەگۆوە بەپیر داواڕەواکانمانەوە ھاتوون بەو مەبەستەی جێپێی خۆیان پتەو بکەن ، پاشان کاژ فڕێ دەدەن و مڵۆزمیی خۆیان ئاشکرا دەکەن و زمانی لۆکەییان دەبێتەوە بە دڕکەزێکەی جاران و چاومان لێسور دەکەنەوە ، لەو چاوپێکەوتنەیدا مالیکی ئەوە بە چاوی کورددا دەداتەوە دەڵێ : ( ئەی ئەوە نیە لە نەوتی باشوری عێراق بەشیان ھەیە ) ، پێدەچێ بیەوێ خۆی لە گێلی بدا کە نەوەد ساڵە لە ژێر دروشمی ( نفت العرب للعرب ) دا بەرھەم و داھاتی سەر و ژێر زەوی وڵاتەکەمان لە لایەن شۆفینیزمی عەرەبی عێراقەوە لووش دەدرێ و دەدرێتە بۆمب و ناپاڵم و خەڵک و خاکی کوردیان پێقڕ و سوتماک دەکرێ ، جا ئێستا کاتی ئەوە ھاتووە ئێمەش وەڵام بەو دروشمە پێیان بڵێین : نەوتی خۆمان بۆ خۆمان و نەوتی خۆتانیش بۆ خۆتان و ماڵی خۆمان جیا دەکەینەوە و چاومان لە ماڵی ئێوە نیە و چیتر خێرمان پێمەکەن ، ئێمەش لەباتی پینەچێتیی بۆ عێراقی ھەڵوەشاوە لەمەودوا سەرقاڵی یەکخستنەوەی ماڵی خۆمان دەبین.

ھەر لەو دیمانە ڕۆژنامەییەیدا بە جەختکردنەوە ڕایدەگەیەنێ : (ئەوەی کورد لە عێراقدا بەدەستیھێناوە - ھەرگیز - کوردی سوریا و تورکیا و ئێران بەو شێوەیە بۆیان نایەتە دەست)، لەھەمانکاتدا دەڵێ: (لەبەر ئەوەی کورد لە پارچەکانی تر - ھەرگیز - ئەوەیان بۆ ناچێتە سەر) ، وەکو ئەوەی پێمان بڵێ لە ئاسمانەوە سروشی - ھەرگیز - ی بۆ ھاتۆتە خوارەوە بۆیە وا بە مکوڕییەوە بە - ھەرگیز - دەمانترسێنێ کە ئەم - ھەرگیز - بەکارھێنانە لە یاسای ژیاندا جێگەی نابێتەوە چ جای لە زانستی سیاسەتدا ، دیارە لەوەپێشیش لەو بڕوایەدا نەبووە و پێی وابووە کە - ھەرگیز - پیرەدیکتاتۆرەکانی چەندین ساڵەی دەسەڵاتدارێتی عەرەب ئاوھا بە دوای یەکدا تاج و تەخت و بەختیان سەروەنگون نابێ ! ، بۆیە پێویستە بە ھەمان - ھەرگیز - ەکەی ئەوان ئێمەش ڕایبگەیەنین کە ئێمە پێکھاتەیەک نین لەوان و خاک و زمان و داب و نەریت و کلتور و کەلەپور و ڕۆشنبیری و باری کۆمەڵایەتی و ھەموو شتێکمان لەگەڵ ئەواندا جیاوازە ، چونکە مالیکییەکان بێئاگان لەوەی ھەمو شتێک لە ژیاندا ڕێژەییە نەک ڕەھا و بە ڕەھا قسە کردن بەڵگەی نەزانییانە و نەزانیش ئەستەمە لە زمانی پێکەوەژیان بگا.

لە لایەکی ترەوە ھۆشداریمان دەداتێ کە: (ئەوەی لێرەش لە عێراق ھەیە جیاوازە لە باشوری سودان ، ئەزمونەکان کۆپی ناکرێن ، باشوری سودان ھۆکاری تایبەتی ھەبوو ، ژمارەیەک دەوڵەت لە پشتی بوون ، بەڵام ھەرێمی کوردستان ژمارەیەک دەوڵەت دەوریان گرتووە) ، بەم درەنگوەختە و بە دزەنیگاوە ئاماژەمان پێدەدا و کۆبونەوەی وەزیرانی دەرەوەی وڵاتە دوژمنەکانی کورد - تورکیا و ئێران و عێراق و سوریا - مان بیر دەخاتەوە کە ھاوکاتی پێشڕەویی شۆڕشی گەلی کورد کۆ دەبونەوە بۆ پیلانگێڕی و درەنگخستنی سەرکەوتنەکان و پێیوایە سەردەم سەردەمی سەدامی دیکتاتۆرە و دەتوانێ لاسایی ئەو بکاتەوە ، نەبادە لەوەی لە سەردەمی زانست و کرانەوە و ئەنتەرنێتدا دۆخەکە گۆڕاوە و لاوانی کورد توانیویانە دەیان ماڵپەڕی وەچەکانی ئەتاتورکی فاشیزم ھاک بکەن و ئاڵای کوردستان و دروشم و وێنەی شەھید و سەرکردەی کورد لەسەر دڵی دڕندەترین دوژمندا بچەقێنن کە بە لوتبەرزییەوە نکوڵی لە بونمان دەکەن و بە تورکە کێوی و شاخاوی ناومان دەبەن.

لە چەندین بۆنەدا مەسعود بەرزانی - سەرۆکھەرێمی کوردستان - ھەندێ جار بە ژێر لێوەوە و ھەندێ جاریش ڕاشکاوانە لە دەرگای سەربەخۆیی کوردستانی داوە و لە بەرامبەردا شۆفینییەکان بە ھەڕەشە وەڵامیان داوەتەوە ، دیارە ھەڵوێستی لەم شێوەیەی سەرۆکی ھەرێم ئەگەر ببێتە کردار پشتیوانییەکی سەرتاسەریی خەڵکی لەگەڵدایە ، بۆیە پێویستە بە مکوڕییەوە کاری بۆ بکرێ و لە دروشمەوە بخرێتە سەر ڕاستەڕێی واقیع و ببێتە بەرنامەیەکی یەکگرتووی تەواوی حیزب و لایەنە سیاسییەکان بۆ ئەوەی ھاوچەشنەکانی مالیکیش خوێندنەوەی ھەڵە بۆ مافە زەوتکراوەکانمان نەکەن و تەواوی تواناکانمان وەگەڕ بخەین تا ویستی ڕەگەزپەرستانەی تواندنەوەی گەلەکەمان لە نێو بۆتەقەی عروبەچێتیدا زیندەچاڵ بکەین.

نوری مالیکی دەبوایە کاتێک ئەو ھەڵوێستەی دەرببڕیبایە ھیچ نەبێ:

١ - دەسپێشخەری سڕینەوەی ئاسەواری ئەنفالە بەدناوەکان و شار و گوندە کیمیابارانکراوەکانی بکردایە کە لەسەر دەستی دەسەڵاتدارێتی عەرەبیی شۆفینیزمی ناوەندەوە دوچاری جینۆساید و کارەساتی مرۆیی ھاتوون و بودجەی تایبەتی لە دەسەڵاتی ناوەندییەوە بۆ تەرخان بکردایە و قەرەبۆی مادی و مەعنەوییانی بکردنایە نەک ببێتە درێژەپێدەری ھەمان سیاسەتی نامرۆڤانە .
٢ - بە ڕژدی کاری بۆ نەھێشتنی سێکوچکەی سیاسەتی تەعریب و تەرحیل و تەھجیر لە ناوچە سنورییەکانی باشوری باشوری کوردستان بکردایە نەک وەکو ئێستا بە دوای ھەلی ڕەخساودا ویڵ بێ بۆ زیاتر برەو پێدانی .
٣ - ئەگەر لە ماوەی نۆساڵی دوای نەمانی ڕژێمی بەعسەوە کار بکرایە بۆ جێبەجێ کردنی مادەی - ١٤٠ - و ئاساییکردنەوەی ئەو دۆخەی کە بەعسییەکان لە ھەمبەر ناوچە داگیرەکانی کوردستان خولقاندویانە ئەوا ئەوسا ئێمەش ئحمێکمان بۆ قسەکانی جەنابی دەکرد.

بەھەرحاڵ لە مار چاوەڕوانیی ھەنگوین ناکرێ ، ئەوەی مالیکی دەیڵێ و دەیەوێ پەیامێکی ژەھراوی کۆن و بەسەرچووە و لێی تێدەگەین ، بەڵام دەبێ ئێمەی گەلی ستەملێکراوی کورد ببینە جەستەیەکی خۆشەکراوی دژەژەھر و نەسڵەمێینەوە لە تێفکرینی بنیاتنانی دەوڵەتی سەربەخۆی خۆمان چونکە بارودۆخی سیاسیی ئەمڕۆی جیھان لە ھەموو کاتێک لەبارترە بۆمان ، لەھەمانکاتدا بە دروشمی سەرکردایەتی کوردیش نەکەوینە ھەلەکەسەما و دەبێ خۆمان بڕیاردەری ئاییندەی خۆمان بین چونکە ئەوان ھێندەی سەرقاڵی پینەوپەڕۆ کردنی عێراقی ھەڵوەشاوەی دوای سەدام حوسێن و لە غەمی بەشەبودجەی زیاتری خۆیانن بۆ بەرژەوەندیی حیزب، ھێندە سەربەخۆبوونی کوردستانیان بۆ بەرژەوەندیی نەتەوە لا مەبەست نەبووە و نیە ، ئەگینا دەمێک بوو لە وەدیھێنانی ئامانجی نەتەوایەتیمان نزیک دەبووینەوە، پێویستە کار بۆ بەمیللیکردنی سەربەخۆیی بکەین بەدەر لە ویستی حیزب و سەرکردەکان تا ناچاریان بکەین بە کردەوە بێنە ژێر باری خواستی گەلەوە و تێکڕا بە مکوڕییەوە کار بۆ ھێنانەدیی ئامانجی لەمێژینەمان بکەین نەک تەنھا لە بۆنەکان وەکو دروشمی قەتیس لە ھۆڵە داخراوەکاندا بوترێتەوە و دوای چەپڵەڕێزان بیر بچێتەوە ، دەبا ھەمومان یەکڕیز و یەکدەنگ جیاوازییەکانمان بخەینە خزمەتی سەربەخۆیی کوردستانەوە و بە گیانێکی نیشتمانپەروەرانەوە پاڵپشتی بەستنی کۆنگرەی نەتەوەیی بین و کاری ئەمڕۆمان دوا نەخەین بۆ سبەی.

 

ماڵپه‌ڕی هیوا ره‌ش

 

 

 

په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک