١\٦\٢٠١٣

بەرنامەکاری لێژنه‌ی کۆکردنه‌وه ‌و ئاماده‌کردنی کارنامە‌کانى پرسی ژنان.

سه‌ره‌تای بیرۆکه‌که‌:

پرسی ژنان بۆ ماوەی پتر لە ٢٠ ساڵە لە لایەن رێکخراو و گرووپ و تۆڕ و دامەزراوی جیاواز و بە شێوەی جۆراوجۆر کاری لەسەرکراوە، لەم بارەیه‌وه‌ زۆر پرۆژە یاسا و خشته‌ی کار و پێشنیار خراوەتە بەردەستی دەسەڵات و پەرلەمان و دەزگا پەیوەندیدارەکانی تر. له‌گه‌ڵ ئه‌وه‌ی هه‌ندێ له‌و پڕۆژانه‌ بوون به‌ یاسا و له‌ په‌رله‌مانه‌وه‌ ده‌نگیان پێدراوه‌، به‌ڵام یان به‌ که‌موکوڕیی جێبه‌جێکراون یان له‌ باری سیاسیی و یاسایی و کۆمه‌ڵایه‌تییە‌وه‌ ڕێگرییان لێکراوه‌.

ئێمه‌ پێمانوایه‌ پرسی ژن پرسێکی سیاسیی و کۆمه‌ڵایه‌تیه‌، رێکخراوه‌کانیش ده‌توانن گوشارێکی پتر دروستبکه‌ن بۆ گۆڕانکاری له‌ سیسته‌می سیاسی و یاسایی له ‌باره‌ی مه‌سه‌له‌ی ژنان له‌ درێژ ماوه‌دا، بۆیه‌ به ‌دوای چه‌ندین کۆبوونه‌وه ‌‌و دانیشتن ‌و تاوتوێکردنی هه‌ندێک بابه‌ت، بریارماندا، کۆشش بکرێت لە ماوەیەکی کورتدا هەموو رێکخراوەکانی سەرتاسەری کوردستان چ له‌ ناوه‌وه‌ یان له‌ ده‌ره‌وه‌، بە بێ لەبەرچاوگرتنی پێشینەی ئایدۆلۆژی و حیزبی کۆبکرێنه‌وه‌ بۆ تاوتوێکردنی میکانیزمێکی کارا بۆبه‌ سەرەنجام گەیاندنی کارنامە‌کانی کاری تایبه‌ت به‌ پرسی ژنان.

ناو:

لێژنه‌ی کۆکردنه‌وه ‌و ئاماده‌کردنی کارنامە‌کانی پرسی ژنان.

پێناسه‌:

ئه‌م لێژنه‌یه‌ تا ئه‌وکاته‌ کارایه‌ که‌ کارنامە‌کان جێبه‌جێ بکرێن. جێگره‌وه‌ی هیچ رێکخراو و گرووپێک نییه‌، به‌ڵکو له‌ کاره‌کانیدا نوێنه‌رایه‌تی هه‌موو رێکخراو و گرووپه‌کان ده‌کات چ له‌ ناوه‌وه‌ یان له‌ده‌ره‌وه‌ی ووڵات، به‌پێی ئه‌وه‌ی که‌ هه‌ڵده‌ستێ به‌ کۆکردنه‌وه‌ی خشته‌کانی کار‌و پێشنیاره‌کانی هه‌موو رێکخراو و گرووپه‌کان و به ‌به‌شداریی هه‌مووان کارنامە‌کان داده‌ڕێژرێن.

پێکهاته‌:

له‌ پێنج کۆبوونه‌وه‌دا له‌ شاره‌کانی هه‌ولێر و سلێمانی له‌ سه‌ره‌نجامی گفتوگۆ و وتووێژێکی زۆر نوێنه‌رانی ئه‌م رێکخراو و ده‌زگایانه‌ ئاماده‌یی کاریان ده‌ربڕیوه‌. وه‌ک زۆربه‌ی رێکخراو گرووپه‌کانی ژنانی سه‌رتاسه‌ری کوردستان و هه‌ندێک له‌ نوێنه‌رانی رێکخراوه‌کانی ژنان له‌ ده‌ره‌وه‌ی وڵات، به‌ڕێوه‌به‌رایه‌تی به‌ره‌نگاربوونه‌وه‌ی توندوتیژیی دژ به‌ ژنان، نوێنه‌ری لێژنه‌ی ژنانی په‌رله‌مان و هه‌ندێک له‌ په‌رله‌مانتاران، ئه‌ندامانی ئه‌نجومه‌نی باڵای کاروباری خانمان.

ئامانج:

• کۆکردنەوە و ئاماده‌کردنی هەموو ئەو کارنامەو بەرنامەکار و سترتیژییانەی کە تا ئێستا لە لایەن رێکخراو و گرووپەکانی ناوەوە و دەرەوەی وڵات پێشکەش کراوە و داڕشتنەوەیان لە سێ کارنامەدا بە پێی ئامانجە کورت ماوە و درێژخایەنەکان بۆ هەر سێ دەسەڵاتی یاسادانان، جێبەجێکردن و دادوەریی که‌ هه‌ر سێ لایه‌نی ئابووریی و سیاسیی و کۆمه‌ڵایه‌تی ده‌گرنه‌وه‌.
• پێکهێنانی هاودەنگیی و دیالۆگ له‌ ناو رێکخراو و که‌سایه‌تیه‌کانی بواری مافه‌کانی ژنان چ له ناوه‌وه‌ یان له‌ ده‌ره‌وه‌ی کوردستان، بۆ کارکردن له‌سه‌ر بنه‌ما هاوبه‌شه‌کانی خواستی بزووتنە‌وه‌ی ژنان.
• بەشدارییکردنی ژنان و رێکخراوەکانیان لە هەموارکردن، گۆڕانکاریی و بە سەرەنجام گەیاندنی یاسا و بڕیارەکانی تایبه‌ت بە مافه‌کانی ژنان، ئەمەش وەک گرووپێکی گوشاری به‌رفراوا‌ن بۆ جێبه‌جێکردنی خواسته‌کان وه‌ک پێداویستییە‌کی هه‌نووکه‌یی‌.

میکانیزمی کارکردن:

• رێکخه‌ری لێژنه‌‌ هه‌ڵده‌ستێ به‌ کۆکردنه‌وه‌ی هه‌موو مایل و ژماره ‌ته‌له‌فۆنی رێکخراو و که‌سایه‌تیه‌کانی ناوه‌وه‌ و ده‌ره‌وه‌ی وڵات، که‌ له‌سه‌ر پرسی ژنان کارده‌که‌ن. جگه‌ له‌و په‌یوه‌ندییانه‌ی له‌ پرۆسه‌ی پێکهێنانی ده‌سته‌که‌ ئاگادارن.
• گه‌یاندنی هه‌واڵی ده‌سته‌که ‌و کاره‌کانی به‌ به‌رده‌وام به‌ هه‌موو ئه‌و مایلانه‌ بۆ گۆڕینه‌وه‌ی بیروڕا، سه‌باره‌ت به‌و کارنامانه‌ی ئاماده ‌ده‌کرێن.
• هه‌موو کارنامە ‌و بەرنامەکارێک، که‌ له‌لایه‌ن رێکخراو و گرووپه‌کانی ناوه‌وه‌ و ده‌ره‌وی وڵات ده‌رچوه‌ کۆده‌کرێته‌وه‌، له‌گه‌ڵ ئه‌وانه‌ی له‌ ناو په‌رله‌ماندان، بۆ به‌دواداچوون و پێداچوونه‌وه‌ و داڕشته‌وه‌یان.
• دابه‌شکردنی لێژنه‌که‌ به‌سه‌ر سێ گرووپی کار بۆ داڕشتنی سێ کارنامە‌که‌، به‌ پێی زانیاریی و تایبه‌تمه‌ندیی که‌سه‌کان، دواتر تاوتوێکردنی هه‌ر سێ کارنامە‌که‌ له‌ لێژنه‌که‌دا. پاشان ناردنی بۆ هه‌موو رێکخراو و که‌سایه‌تییە‌ په‌یوه‌ندییداره‌کان تا سه‌رنجه‌کانیان بنێرنه‌وه‌ بۆ لێژنه‌که به‌ مه‌به‌ستی گونجاندنیان له‌ ناو کارنامە‌کاندا.
• واژۆکردنی کارنامە‌کان‌ له ‌لایه‌ن رێکخراو و که‌سایه‌تی و ده‌زگا و په‌رله‌مانتارانه‌وه‌.
• پاشان کارکردن بۆ گرتنی کۆنفرانسێکی سه‌رانسه‌ریی، که‌ هه‌موو رێکخراو و داموده‌زگا په‌یوه‌ندییداره‌کان تێیدا به‌شدار بن، بۆ گفتوگۆ و تاوتوێکردن له‌سه‌ر پاکنووسی کۆتایی کارنامە‌کان و ئاماده‌کردنیان بۆ پێشکه‌شکردنیان به‌ سێ ده‌سه‌ڵاته‌که‌.
• به ‌دوای ئه‌مه‌دا دانانی میکانیزمی کار و کاتی جێبه‌جێکردنی کارنامە‌کان به‌ پێی ئامانجه‌ کورت ماوه‌ و درێژخایه‌نه‌کان و به‌دواداچوونی له لایه‌ن لێژنه‌که‌وه ‌به‌ پشتیوانیی هه‌موو رێکخراوه‌کان.

لێژنه‌ی کۆکردنه‌وه ‌و ئاماده‌کردنی کارنامە‌کانى پرسی ژنان