١\١٠\٢٠١٦

    ببوورە یار ‌!

دارا خونچە

تاکو وەرزی شەختەم بڕی و
    خۆم گەیاندە یەکەم جێژوان
             باران تێر تێر ماچی کردم

             زریان شڕ و وڕی کردم..١
                              ببوورە یار!
هێشتا هەر خونچەیەکی ساوا بووم و
    تازە لێوم وە ئاستەمەک کرابۆوە
           هەرچی شیلە و هەڵاڵەم بوو

                        خڕیان مژیی..٢
                              ببوورە یار!
تازە گەڵا و گوڵم دەدا
    هیچ رەشەبایەک نەما
           قەد و لکانم رانەژەنی و

                         نەموەرێنی..
                             ببوورە یار!
لەو شەوەزەنگەی

تەپوتۆزی
سیپارە زەردەکانم دەڕەواندەوە و٣
    وە پەیڤە رۆشنەکان٤

           دڕم وە تاریکیی دەدا
           زۆرم پێچوو تا رۆژم کردەوە..

                              ببوورە یار!

ببوورە یار
هیچ هیچ..
    هیچ سەرەتایەکم نەبوو
               بەرلەوەی وە کۆتایی بگا؛

    لە نێو باوەشت و
    سەر لەسەر ران و چاو لە نێو چاوت
    سەرهاتی خۆم و
            پۆلووە ئاورەکانی دوڕ ناخم٥
    سەربردەی خۆم و
       قل وە قلی ماچە هەڵوەریوەکانم
                         خڕیان وەگێڕم..٦
                               ببوورە یار!

_____________________________

١- شڕ و وڕ: (شڕ): بێ بار، باری خراپ، (وڕ): گێژ.

٢- خڕ: هەموو، گشت، سەرجەم.

٣- سیپارە: بەشێکە لە بەشەکانی قورئان.

٤- وە: بە.

٥- پۆلوو: پەنگر، پشکۆ، سکڵ.

٦- وەگێڕان: گێڕانەوە.

کۆتایی ئەیلوولی ٢٠١٦ - لەندەن
ماڵپه‌ڕی دارا خونچە