براوەى هەڵبژاردنەکان و ئیمتیحانێکى قورس.

بێستون حەسەن  

زۆرێک قسەو باس هەیە لەمەڕ دوواین گۆڕانکارییەکانى ئەودیو پرۆسەى هەڵبژاردن و وەرگرتنەوەى دەسەڵاتى سیاسى و دروست کردنى کابینەى نوێى حکومەت لەلایەن پارتى و یەکێتییەوە کە ئاخۆ لەپاش دەرخستنى هەموو پێوەرە ئینسانى و ئەخلاقى و سیاسیەکانیان ، تا چەند ئەم دوو هێزە گەورەیەى سەر گۆڕەپانى دەسەڵات و حکومەت سوودیان لەو داتایانە وەرگرتووە کە بەم دووایانە لەڕێى دەرخستنى دەنگى هاوڵاتیانەوە بینییان و بۆیان یەکلایی بوویەوە کە تاچەند کارو پرۆژەکانیان گەیشتوەتە ناو هاوڵاتیان و تاچەندە متمانەیان هەیە بە خەڵکى و ئاستى جەماوەرییان تا کوێیە . بۆیە ناکرێ لەبەرچاو نەگیرێ کە ڕاستییەکەو دەبێ هەموومان بیزانین کە ئەم هەڵبژاردنە گەورەیەى بۆ پەرلەمان و سەرۆکایەتى هەرێم ئەنجامدرا ، قسە گەلێک و زۆرێک دید و بۆچوونى جیاجیاى هێنایە گۆڕێ کە پێشتر نەدەوتران و نەدەبینران لە نێو ململانێکانى ناو میدیاى ئازاد ، لێرەوە ڕاستییەک خۆیمان نیشان ئەدا ئەویش بوونى ئۆپۆزسیۆنە کە هەموو لایەک پێشوازى لێدەکەن تا دەگاتە سەرکردایەتى سیاسى کورد و دییارترینیشان سەرۆکى نوێى هەڵبژێردراوی هەرێمى کوردستان بە ئاقارێکى نوێو شتێکى جوانى وەسف دەکاو لە میدیاکانەوە بە ئاشکرا باسیان لێوە دەکا ..

ئەمانە هەموو دەبنە کۆمەڵە پرسیارێک ، وێڕاى ئەوەى دەبێتە قورس کردنى ئەو ئیمتیحانەى کە هێزى باڵا و دەسەڵاتى یەکەم دەیکا لەهەمان کاتیشدا بەرپرسیارێتییەکى گەورە و مێژوویشیان دێتە پێش کە خۆى لەوەدا دەبینێتەوە ئەو خەڵکانەى کە متمانەیان بەخشیوەتە ئەمان و دەنگیان داونەتێ ، سبەى لەژێر سایەى حکومەتێکى خزمەتگووزار و سەرۆکێکى خەمخۆردا پاداشت وەرگرنەوە و پەشیمان نەبنەوە لەو متمانەیەى کە بەخشیویانەتە ئەم دوو هێزە سیاسییە . ئەگەر ئاوڕێکیش لە بوونى ئۆپۆزسیۆنى ئەمجارە بدەینەوە دەبینین جیاواز لە جارانى ترو کابینەکانى تر هاتوونەتە نێو حەرەمى بیناى پەرلەمانەوە ، ئەویش بە قورساییەکى زۆر و دەنگێکى زۆرەوە . لەگەڵ ئەوەشدا جیاوازییەکى ڕەها نابینرێن لە ڕووى ئەداى سیاسى و فۆرمى خزمەتکردنى هاووڵاتیانەوە لەنێوان هێزى دەسەڵات و هێزى ئۆپۆزسۆن ، تەنها ئەوەندە هەیە کە بەهۆى بیرو بۆچوونى ناچونیەکى سیاسى و دەرئەنجامە سیاسییەکان کۆمەڵێک ئارەزووى بەشدار نەبوونیان دەکەن لە حکومەت و دەچنە بەرەى ئۆپۆزسیۆنەوە و کۆمەڵەکەی تریش دەبێتە هێزى یەکەم و هەر ئەویش ئەرکى تەشکیل کردنى حکومەتى پێ ئەسپێردرێت . لێرەوە ئەرکەکان و مافەکان بەڕوونى دەردەکەون ، لێرەوە هەیمەنەى حیزبى و ناحیزبى لەیەک جودا دەکرێنەوە ، لێرەوە ئەرکى مێژوویى و سیاسى بەرامبەر میللەت زیاد دەکات کە چیتر کاتى ئەوە هاتووە کە ئەو کەسە هەل پەرستانەى دوێنێ ماڵ و سامانى ئەم میللەتەیان بەهەدەر دەبرد و نامەسئوولانە لە خزمەتى تاکدا بەکاریان دەهێنا ، ئەم جارەیان لە ڕۆشنایی هەبوونى هەموو هێزە جۆراو جۆرەکان کە لە ناو حکومەت و لە دەرەوەى حکومەت دەبینرێن ، ڕێگر دەبن لەو خەمساردییەو ڕێگر دەبن لە چەواشەکردنى گەلەکەیان ، چونکە دەزانن و درک بەوە دەکەن کە میللەت زۆر لەوەزیاترى قابیلە کە بۆى کراوە ، دەزانن دەبێ بە هەموو لایەکمانەوە چ دەسەڵاتى سیاسى چ دەسەڵاتى گەل و هەموو پێکهاتە جۆراوجۆەکانى دى خزمەتێکى وەها پیشانى ئەم هەرێمە بدەن کە شایەنى ئاماژە بۆکردن بێ . لێرەوە ئەرکى هەموو ئەندام پەرلەمانێکیش زیاتر دەبێ لەڕووى کارکردن و دەرخستنى ڕاى میللەت بە پەرلەمان و جێبەجێ کردنى هەموو ئەو داوایانەى کە پێشتر نەکراوە بەهەرهۆیەک بێ لە هۆکارەکان و گەیاندنى دەنگى حەق ڕەوانەى ئەوانەش کە بۆ ساتێکیش ئاوڕیان لێنەدراوەتەوە و هەمیشە بەشخووراو بون لە مافە تایبەتى و سەرەتاییەکانیاندا ، دەبێ ئەوە لەبەرچاو بگرن کە ئەوان لەخۆوە نەچونەتە ئەو شوێنەو لە باب و باپیرانیانەوە بۆیان نەماوەتەوە تا لافى تاکە کەسى لێبدەن بەسەر ئەو هاوڵاتیانەى کە بوونەتە هۆى سەرخستنى پرۆسە و دانانى هەموو ئەندام پەرلەمانێک کە دواتر بە پەرلەمانتار ناوزەند دەکرێن .

ئەگەر چى تا دوێنێ گۆڕەپانى سیاسى لە ژێر هاژەو هوژى میدیاکان و دەسەڵاتى نەیارندا بوو ، ئەمڕۆ پێکهاتەى ناو پەرلەمان بەجۆرێکى ترەوە دەبینرێن کە وا دەکات چیتر ڕێ بەکەس نەدرێت لەودیو سنوورەکانى بێئاگاییەوە قسە گەلێک هەڵڕژێننە ناو بەرەى سیاسى و دەسەڵاتى بەڕێوەبردنى میللەتەوە ، ئەمانە هەموو کۆمەڵە خاڵێکن کە دەبێت هێزى یەکەمى دەسەڵات کە پارتى دیموکراتى کوردستان و یەکێتى نیشتمانى کوردستانن زۆر چاک لەبەرچاوى بگرن و بەهەند بیزانن کە ئەگەر تا دوێنێ بەهۆکارى جودا جودا و قۆستنەوەى هەلى سیاسى لەلایەن کەسانێکى مشەخۆرەوە بووبێ چیتر ڕێگە نەدەن کەس دزە بکاتە نێو موڵک و ماڵى میللەتەوە و هەموو ئەوانەش بە سزا بگەیەنن کە ڕۆژانێک ویستوویانە میللەت و تاکى ئەم هەرێمە لە خشتەبەرن بەهۆکارى نەبوونى خزمەت گوزارى و ئاوەدان کردنەوەى وڵات ، دەبێ بە یەک دەست و یەک بازوو هاوشان لەگەڵ هێزى ئۆپۆزسیۆندا کار بکەن بۆ سەقامگیر کردنى هەرێمى کوردستان و بنبڕکردنى گەندەڵى تاک و بەرجەستەکردنى ژیانێکى فرە لایەن و خۆشگووزەران بۆ تەواوى هاوڵاتیانى هەرێمى کوردستان لە سایەى پەرلەمان و حکومەتێکى جووڵاو و ئەکتیڤ لە هەموو بوارە جۆراو جۆرەکانى خزمەت کردندا .

دەبێ چاوکراوانەتر لە ئایندەى ئەم گەلە بڕوانرێت و ئاگایان لە کەم و کوڕییەکانیان بێت ، هەر ئەو میللەتەیە بووە هۆى دەسکەوتنى ئەم ئازادییە و دروست بوونى ماڵى کوردى و حکومەتى سەربەخۆى خۆماڵى ، دەبێ ئەم تاقیکردنەوەیە بە هەند وەربگیرێت و بۆ چوار ساڵى ئایندە کار بکرێت نەک ببنە جێى نیگەرانى خەڵک و ئەو متمانەیەشى کە پێیانداون لێیان بسەنرێتەوە . ئێمە دەزانین لە هەموو جێگەیەکدا خەڵکانى باش و بە ئەزموون هەیە و خەمخۆرى میللەتەکەى خۆیانن لە هەر پلەو پایەیەکدا بن ، بەڵام خەڵکانى وەهاش هەیە هەمیشە هەلەکان دەقۆزنەوە بۆ مەرامى تایبەتى و چەواشەکارى کردنى دەور و بەر ، حەق وایە کار بکرێت بۆ ئایندە لەسەر ڕۆشنایی ئەو ڕابردووەى کە زۆرێک تەنگەژەو نا یەکسانى تاکەکانى تیادا بوو ، ڕاستر وایە بڵێین پارتى و یەکێتى کە ئێستە سەرى گەورەى حکومەت و پەرلەمانن ، بە چاوخشاندنەوە بە دوێنێ و بەوانەى کە نامەسئوولانە ڕەفتاریان دەکرد دژ بە میللەت و تەواوى خەڵکى کوردستان ، ئایندەیەکى جوانتر پیشانى گەلەکەیان بدەن و زۆرترین خزمەت و ئاوەدانکردنەوە پێشکەشى ئەم هەرێم و وڵاتە بکەن ، زیاتر کار لەسەر ئەوە بکەن با میللەت هاوشانى دەسەڵاتى سیاسى بەشدار بن لەو بڕیار و پرانسیپانەى کە دادەنرێن بۆ خزمەت کردنى بەرامبەر و توێژى فەقیر و کەم دەستان . با بڕیار تاک لایەنانە نەدرێت و هەموو ئاراکان بچێتە ناو کرۆکى خەڵکەوە و خەڵکى خۆى بڕیار بدات لە چارەنووسى خۆى ، هەڵبەت دەسەڵاتى سیاسیش هاوڕا دەبێ لەگەڵ ئەمانەدا چونکە دەسەڵاتیش هەڵبژێردراوى گەلە و حوکمیش لەوێوە تەشەنە دەکات.

تەمەننا دەکەین پەرلەمانى داهاتوو و ئەو پەرلەمانە بێت کە گشتگیرتر و هەمەلایەنتر لە ڕووداوە سیاسى و ئابوورى و کلتوورییەکان و تا دواتریش بڕوانێ ، دەخوازین هێزى ئۆپۆزسیۆنیش لە ئاست ئەو ئەرکەدا بن کە میللەت دەیەوێت و نەبنە هۆکارى ئاستەنگ و گرژى نانەوە ، دەبێ بە هەموو لایەکمانەوە کار بکەین بۆ سەرخستنى پرۆسەى تەبایی و یەکسانى لەناو یەکتردا و وەلاوە نانى کێشە و دروست کردنى ڕاى جیاواز لە سەرەوە بۆ ناوەندى خەڵک و گەڕانەوەى بۆ ناوەندى بڕیاردان .

Bestoon1617@yahoo.com