١٧\٣\٢٠٢٦

بۆچی ئەمەریکا لە ئێران دەدا؟

شوان عەزیز      

بیانووەکان وەک لێیاندەدوێن:
ئێران چەکی ئەتۆمیی هەیە یان دروستیدەکا، یان یورانیوم دەپیتینێ و بۆ چەکی ئەتۆمیی ئامادەیدەکا!
ئێران سەرچاوەی تیرۆریزمە!
بەڵام:
ئایا ئەوە ئێران بوو بزووتنەوەی تاڵیبانی لە ئەفغانستان دروستکرد؟
ئایا ئەوە ئێران بوو داعشی دروستکرد و بەریدایە گیانی خەڵکی سوریا و ئێراق؟
ئایا ئەوە ئێران بوو کە گرۆیە تیرۆریستە ئیسلامییە سوننە تونڕەوەکانی لە نێو سوریادا دروستکردن و بە چەکی قورس سازیدان و ناوینان بەرەی بەرهەڵستکار و گوایە لە دژی رژێمەکەی ئەسەد دەجەنگان بەڵام کاری تریان پێدەسپێردرا؟
ئایا ئەوە ئێرانە کە لە هەر چوار لای جیهانەوە بۆ ''جیهاد'' لە دژی خەڵکی ئێراق و سوریا تیرۆریستی تێڕا دێنە ناو سوریا و ئێراقەوە؟
ئایا چیچانیی و ئوغوریەکانی چین لە ئێرانەوە دێنە ناو سوریا و ئێراق یان لە تورکیای ئەندامی ناتۆوە؟
ئایا ئەبو محەمەد جۆلانی، گەورە تیرۆریستی جیهانی، بە پاڵپشتی ئێرانیی، بووە سەرۆکی سوریا و گەلانی؟

دوێنێ چل ملیۆنتان دەدا، لەبۆ سەری جۆلانی، ئێستاس ڕاناوەستن، لە سەنا و پێداهەڵدانی! چەندین نموونەی تر هەن و چەندین گرۆی تیرۆریستی تر هەن کە بە هەر چوار لای جیهاندا بڵاوکراونەتەوە و بەردراونەتە گیانی خەڵکی سیڤیل و هەر هەمووشیان ئەمەریکا و هاوپەیمانەکانی ئەمەریکا سەرچاوەی بژێویی و پڕچەککردنی ئەو گرۆپانەن نەک ئێران!

ئەمەریکا خۆی بۆ خۆی، خۆی کردۆتە پۆلیسی جیهان نەک ئێران!

من بەرگریی لە ئێران ناکەم و پێشموایە و بە بەڵگەش سەلماوە کە سیستەمی ئاخوندیی سیستەمێکی دژە مرۆیی و بە ڕژیمی پەت و سێدارەش ناسراوە. بە زەبری سەرکوت و سێدارە و برسییکردن بە دەیان ساڵە خۆی سەپاندوە! بەڵام ئەمەریکا لە ئێران نادا چونکە ئێران لەگەڵ کورد خەراپە، یان لەگەڵ گەلانی ئێران خەراپە، یان چونکە سیستەمی ئاخوندەکان سیستەمێکی دیموکراسی و مرۆیی نییە، یان لە بەر ئەوەی سیستەمی ئێران سیستەمێکی عیلمانی نییە، بەڵکو ئەمەریکا لە ئێران دەدا چونکە بە کورتیی و کرمانجیی ئێران ناچێتە ژێرباری داخوازییەکانی ئەمەریکا!

ئەم بۆچوونەی من دیسان ڕاستە بۆ ڕژێمەکانی سوریا و ئێراق و یەمەن و سوودان و میسر و لیبیا و تونس و سەرجەم ئەو دەوڵەتانەی کە لە بەناو بەهاری عارەبییدا سەرەونگون کران و ناتۆ بە سەرپەرشتیی ئەمەریکا هەریەکەی بیانوویەکی لێدۆزینەوە. من پێموایە ئەگەر ئەو دەوڵەتانەی بەهاری عارەبیی وەک پێویست ئەمەریکا و هاوپەیمانەکانی بە کارەکانیان دڵخۆش بووانایە هەرگیز ڕۆژیان بەمڕۆ نەدەگەیی! بۆ نموونە ئەمەریکا و هاوپەیمان و هاوئاوازەکانی سەدامیان نەڕووخاند چونکە سەدام لەگەڵ کورد و گەلی ئێراق خەراپ بوو، یان سەدام چەکی کۆمەڵکوژی هەبوو، یان چەکی کیمیایی بەکارهێنا لە دژی کوردان، بەڵکو لەسەر شتیتر سەدامیان ڕووخاند کە دوور و نزیک پەیوەندیی بەو هۆیانەی نەبوو کە لە ڕاگەیاندنەکانەوە لێیاندەدوان! هۆیەکانیش تەنیا بیانوو بوون و هیچی تر! بیانوو بوون بۆ ئەوەی هەم خەڵکی ئەو وڵاتە ڕاکێشنە ناو سوپاکەی خۆیان و هەمیش ڕەواییەکی نێودەوڵەتی، کە هەر خۆشیان بەرپرسی ئەو ڕەواییەن، بە هێرش و پەلامار و وێرانکارییەکانیان بدەن.

من دیسان دەیڵێمەوە هەموو ئەو ڕژێمانەی کە لە بەهاری عارەبییدا ڕووخێنران و ئەوانەی کە ئێستا لەسەر کارن، هیچیان دوور و نزیک پەیوەندییان بە خەڵکەوە نییە و هەموویان دژە خەڵکن جا یان دیکتاتۆر بوون یان ئێستا دیکتاتۆرن! بەڵام میژوو سەلماندوویەتی ناتۆ بە سەرپەرشتیی ئەمەریکا دژی دیکتاتۆریەت نییە لە جیهانی عارەبیی و ئیسلامییدا، بەڵکو دژی ئەو سیستەمەیە کە لەگەڵ ئەمەریکا نەبێ.

تۆ لەگەڵ ئەمەریکا بە ئیتر کەسێکی باش و بێ کەموکوڕیی ئەگینا تۆ تیرۆریستی!

تکایە بە وردیی سەرنجی ناوچەکە و رژێمەکانی ناوچەکە بدەن بۆتان دەردەکەوێ کە ئەم تێڕوانینەی من ڕاستە!

تێبینیی: تکایە ناوەڕۆکی ئەو بابەتەی من وا لێکمەدەنەوە کە من پێمناخۆشە ڕژێمی ئێران بڕووخێ، یان من دژی سەربەخۆیی کوردم. بەڵکو ئەوەیە کە من نامەوێ ڕژێمێکی دیکتاتۆر بڕووخێندرێ و یەکێکیتر لە خۆی خەراپتر بهێندرێ! من دژی شەڕ و وێرانییم کە مەبەستی تەنیا وێرانیی و شەڕە لە بەرژەوەندیی بازرگانانی شەڕ یا لە بەرژەوەندیی جیهانی سەرمایە و کۆمپانیایەکانی چەک و شەڕ!

ماڵپه‌ڕی شوان عەزیز