١١\٧\٢٠١٠

گۆشه‌ی '' رۆژه‌ک نا رۆژه‌ک ''. (٧)

بۆ خوێندنەوەى ئەم بابەتە
تکایە نۆرە بگرن...!!!

شێرزاد عومەر مەحمود

لەم وڵاتە ئێمەدا، لەبەر کەمى شتەکان و زۆرى پێداویستیەکان و درەنگ وەدەست هاتنیان، یان چاکتر وایە بڵێین لەبەر موستەهلیک بوون یانیش سەرقاڵکردنى هاوڵاتیان بە شتێکەوە، ئێستا دیاردەى نۆرە گرتن وا خەریکە دەبێتە باوترین نەریت و خەڵکى خوى پێوە دەگرێت. سایکۆلۆژیاى گشتى خەڵک بەهەموو هەستەکانیەوە حەز دەکەن پابەندى نۆرەگرتن ببن و لەو دیاردەیەوە وا بەدەر دەکەوێت کە هاوڵاتیان رقیان لە بەربەڕەڵاییە و حەز بە بوونى یاسا و سیستەمێک دەکەن بۆ گەیشتن و دەستەبەرکردنى شتەکان.

ئەوەى ئەمڕۆ لەنێو ئاپۆراى شاردا بەدى دەکرێت کە لەهەر کونج و کەلەبەرێکى پانتایی شار(نۆرە) گرتنە، نۆرە گرتنەکانیش جۆر و شێواز و مەبەستیان تێدایە، بۆ نموونە تەنگەژەى سووتەمەنى بەتایبەت بانزین دێتە پێش ئەوا کاروانى نۆرەگرتووى ئۆتۆمبێلەکان بە ئاگامان دێننەوە کە تەنگەژەى سووتەمەنییە، کڕینى نان و سەمون و نۆرەگرتن لێیەوە، بە ئاگامان دێنن لەوەى یان ئارد و گەنم بەرەو کەمى چووە یان ئەوەتا نرخى سووتەمەنى و ئارد و گەنم بەرزبۆتەوە یانیش سنورەکان گیراون، نۆرەى چوونە لاى دکتۆریش هەڵبەتە بەبیرمان دێننەوە کە نەخۆشی و پەتا پەیدابووە جا چ وەرزى بێت یانیش درێژخایەن، نۆرەى وەرگرتنى سیمکارتى مۆبایل، نۆرەى وەرگرتنى مۆڵەتى شوفێرى، نۆرەى وەرگرتنەوەى ئەنجامەکانى تاقیکردنەوە، نۆرەى وەرگرتنى مووچە، نۆرەى دابەشکردنى زەوى، نۆرەى پشکنین لە بازگەکان، نۆرەى رۆتینى کاروبارى بەڕێوەبەرایەتى و فەرمانگە حکومییەکان، نۆرەى بڕینى بلیتى نەخۆشخانە، نۆرەى سەردانى نەخۆش لە نەخۆشخانە، نۆرەى دەرهێنانى پەساپۆرتى ئێراقی، نۆرەى چاپکردنى کتێب و ....هتد.

ئەمانە هەمووى نۆرەگەلێکن کە پێم وایە زۆرێکیان تەنها بۆ سەرقاڵکردنە، ئیتر لەهەر نۆرەیەک مەبەست و ئامانجێک هەیە و هەر یەک لەئێمە رۆژێ لە رۆژان یاخود رۆژانە لە ناکاو پێویستمان بە یەکێ لەو نۆرانە دەبێت کە جارى وا هەیە بێ ویستى خۆت دەخزێنرێیە ناو نۆرەیەک کە تۆ ناتەوێت یاخود ئەو کات و دەرفەتەت نییە، بەڵام لەو وڵاتەى ئێمە ئەگەر ئیشت کەوتە فەرمانگەیەک و کەوتیە نێو ئاپۆراى نۆرەگرتنەوە دەبینى دواى یەک کاتژمێر وەستانت لە ریزى نۆرەگرتووان و کاتێ نۆرت دێ یەکسەر پێت دەڵێن ئیشی تۆ لاى ئێمە نییە یان ئیشی تۆ لە ژوورەکەى تەنیشتمانە، هەموومان لە فەرمانگەى هاتووچۆ و نەخۆشخانە و پۆلیسخانە و تاپۆ و فەرمانگەکانیتر ئەوەمان تووش بووە، لەمانەش کارەساتتر ئەوەیە نۆرە بگریت لەپێناو ئەوەى پارە بدەیتە حکومەت بۆ نموونە باجى دەرامەتى خانوو و زەوى، یاخود تێستکردن و تاقیکردنەوى ئۆتۆمبێل کە کۆمپانیایەک ئەو ئەرکەى سەرشانى حکومەتەکەمانى سووک کردۆتەوە و دەبێت یەک دونیا نۆرەى بۆ بگریت تاوەکو ئۆتۆمبێلەکەت لێ خراپ دەکەن بەناوى تێست کردنەوە و بەهەر چەند و چوونێک بێت عەیبێکى هەر لێ دەبیننەوە بۆ ئەوەى باجێکى قورست لێ وەربگرن، ئۆتۆمبێلەکەم کیلۆمەتر سفر بوو کەچی بردمە ئەو شوێنەى کە(هەزەى) پێ دەڵێن تەنها 11کم رۆیشتبووم بەو ئۆتۆمبێلە دواى نۆرە گرتنێکى زۆر کاکى بازرگان(ببوورن فەرمانبەر) دونیایەک عەیب و کەموکوڕی لێ دۆزیەوە و پارەیەکى باشی لێ سەندم، بێ ئەوەى حکومەت بیربکاتەوە کە چ جۆرە بانزینێک بەو ئۆتۆمبێلانە دەفرۆشێتەوە تا کەموکوڕیان نەبێت، بێ ئەوەى حکومەت ئەو هەستەى هەبێت کە شەقامەکانى شار هەمووى وێرانەیە ئیتر چۆن کەموکوڕی نەکەوێتە ناو ئۆتۆمبێلەکان، رۆنى ئۆتۆمبێلەکان بەقاچاغ لەلایەن بەرپرسەکانەوە لە دەرەوەى شار دروست دەکرێن واتا رۆنە کۆنەکەوە رۆنى نوێی لێ بەرهەم دێنن و هاوڵاتیانیش لە ئۆتۆمبێلەکانیان دەکەن جا چۆن ئۆتۆمبێل کەموکوڕیان نەبێت..؟! ئەگەر ئۆتۆمبێلێکى کیلۆمەتر سفر عەیبداربێت حکومەت بۆ لێدەگەڕێت داخیلى هەرێم بێت بۆ وا دەکات ئێمەى هاوڵاتیان باجەکەى بدەین، دیسانەوە نۆرەکان زۆرن بۆ خەمى کەموکوڕیەکانى ئەو حکومەتە، جا هیوادارم ئەگەر چەند کەسێک بوون ویستتان ئەم بابەتە بخوێننەوە تکایە نۆرە بگرن.

s4632628@gmail.com