|
چاک پرۆتستۆی بێهەڵوێستی دەسەڵاتدارانی کورد دەکات لە کوردستان و عێراق
،
لە ئاست سوککردنی
سزای بڕیاردراو بەسەر جەلادانی ئەنفال .
بەڕێز سەرۆکی هەرێمی کوردستان
بەڕێز سەرۆکی پەرلەمانی هەرێمی کوردستان
بەڕێز سەرۆکی حکوومەتی کوردستان
بەڕێزان ئەندامانی ئەنجومەنی پارتە سیاسیەکانی کوردستان
بەڕێز وەزیری کاروباری شەهیدان و ئەنفالکراوانی هەرێمی کوردستان
پارت و لایەنە سیاسیە کوردستانیەکان
بەڕێزان لیستی هاوپەیمانی کوردستانی لە پەرلەمانی عێراقی فیدراڵ
بەڕێزان وەزیرە کوردەکان لە حکوومەتی عێراقی فیدراڵ
بەڕێزان
ڕۆژانە دەبینین و دەبیستین و دەخوێنینەوە ، هەوڵێکی جدی هەیە بۆ
سوککردنی سزای سەپاو بەسەر جەلادانی ئەنفال ، ئەوەی نایبیستین و
نایبینین و نایخوێنینەوە هەڵوێستی جدی ئێوەیە لە ئاست ئەم تاوانەی
دەرهەق بە پرۆسەی دادپەروەری دەکرێت ، بێدەنگی ئێوە نیشانەی
ڕازیبوونتانە بەو هەڵوێستانە و بەو هەنگاوانەی دەنرێت لەو ڕاستایا ،
بۆیە ئێمە بە نیگەرانیەوە سەیری ئەم بێدەنگیەتان دەکەین و پێمان وایە
لە ئاستی ئەو مەسئولیەتەدا مامەڵە ناکەن کە گەل پێتانی بەخشیوە و دەبێت
پێی هەڵبستن ، وای دەبینین ئەمەش سوکایەتیەکی دیکەیە بە مافەکانی
کوردەوە دەکرێت لە عێراقی بەناو فیدراڵی لە ڕواڵەت نوێدا ، بە
بێدەنگیتان ئێوەش دەبنە هاوبەشی ئەو تاوانانەی بەرامبەر بە کورد پیادە
دەکرێت .
جێبەجێنەکردنی بڕیارەکانی دادگای باڵای تاوانەکانی عێراقی ، کە کەمترین
سزایە لە ئاست ئەو تاوانە مەزنانەی بەرامبەر بە 182000 لە هاووڵاتیانی
کورد و 4500 لادێ و خاک و زیندەورو ڕوەک و دارستان و .... کرا ،
نیشتمانێک بە مرۆڤ و زیندەورو و سروشتەوە ،بە هەموو جۆرە چەکێک لەوانە
گازی کیمیاوی لە ناودران. بێدەنگی ئێوە لە ئاست ئەم سات و سەودایەی بە
بڕیاری دادگا دەکرێت نیشانەی بێدەربەستیتانە بەرامبەر بە مافی
ئەنفالکراوان و بنامەڵەکانیان بە تایبەتی وە کورد بە گشتی .
هیوادارین بە ئەرکی مێژویی خۆتان هەڵبەستن ، قورسایی خۆتان بەکاربهێنن
، ڕێگا نەدەن بڕیاری دادگای باڵای تاوانەکانی عێراقی بەرامبەر بە
درندەترین جەلادانی ئەنفال پشتگوێ بخرێت ، چاوەڕوانی هەڵوێستانین .
ناوەندی چاک
18-11-2007
www.chak.be
chak_org@yahoo.com
جگە لەم ئیمەیل و ماڵپەڕە هیچ ئادرەسێکی دیمان نییە .
|
