١٤\٧ نەوشیروان مستەفا پشوو بە..!

بەشدار عه‌لی 

ئەو رێکەوتە،پشووى نەوشیروان مستەفا نیە بۆ بیرکردنەوە لە گۆڕان و گۆڕانکارى و دورست کردنى هێزێکى ئۆپۆزسیونى کارا و پەرلەمانێکى زیندوو، رۆژى دانانى بەرنامەیەکى مۆدێرن و پێشکەوتوو نیە بۆ هێنانە کایەى پانتایەک بۆ بیروڕاى جیاواز و دەنگ و رەنگى جیاواز،رۆژى دەرکێشانى خەڵک نیە لە بێ سیستەمى و فەوزایەک کە هەموو کایەکانى بەرێوەبردنى ئەو مەملەکەتەى گرتۆتەوە،رۆژى گێڕانەوەى قودسیەت نیە بۆ تاکەکان(وەکو خۆى ئیدعاى بۆ دەکات)،بەڵکو رۆژى دان نانە بە هەڵەیەکى مێژووى کە رێک (9) ساڵە لەمەوبەر لە (14/7) لە سلێمانى ئەنجامدرا و تاوانەکەشى تاکو ئەو ساتە سەرکردایەتى یەکێتى دەیخەنە پاڵ ئەوى کە بەرەسمى سکرتێر بوو، تیایدا پێنج لە شەریفترین ئینسانەکانى دونیا خەڵتانى خوێن کران و تەرمەکانیشیان نەدرایەوە کەس و کارەکانیان و لە شەوێکى ئەنگوستەچاودا بە نهێنى بە خاکیان سپاردران.

هیچ مرۆڤێک بەدەر نیە لە کەموکوڕى و هەڵە و کارى نادورست ،بەڵام دووبارەکردنەوەى هەڵە و دانەنان بە کەموکوڕییەکان و ئەو هەڵوێستانەى کە دەبێتە هۆى تێکدان و کاوڵکردنى ژیان و چارەنوسى کەسێک و خێزانێک و حیزبێک و کۆمەڵگایەک مایەى هەڵوێستە لەسەر کردنە و پەڵەیەکى رەشە بە یەخەى ئەنجامدەرانیان، کاتێک نەوشیروان مستەفا شانى خۆى لە هەموو کەموکوڕیەکات هەڵتەکاند و لە دەسەڵاتى سیاسى چۆتە دەرەوە و ئیدعاى ئازادى و یەکسانى و دورستکردرنى ژینگەیەکى جیاوازتر لە ئیستا دەکات و پێیوایە دەسەڵاتى سیاسى لە مامەڵەکردن لەگەڵ بەرامبەر و هێزە جیاوازەکان دواکەوتوو بوە و کورتى هێناوە،دەبێت لە ساڵرۆژى ئەو رووداوەدا بیسەلمێنێت و قەناعاتمان پێبکات رۆَلى ئەو چى بوە وەکو سکرتێرى یەکێتى ئەو کات لەم رووداوە(چونکە تاڵەبانى بە سەفەرێک لەدەرەوەى وڵات بوو) ئیستا چى دەڵێت. ئەگەر یەکێتى وەکو هێزێکى نا مەدەنى و نا شەفاف ئامادە نیە دان بە تاوانى کوشتنى کۆمۆنیستەکان و قەدەغەکردنیان لەسەر داواى جمهورى ئیسلامى بنێت و داواى لێبوردن لە کەس و کار و هاورێیان و ئازادیخوازانى دونیا بکات و و قەرەبوى زەرەر و زیانەکانیان بکاتەوە ،نەوشیروان مستەفا کە ئیدعاى شەفافیەت و مەدەنیەت دەکات وەکو تۆمەتبارێکى سەرەکى لەم رووداوە ،پێویستە رووداوەکە وەکو خۆى باس بکات و هەڵوێستى ئیستاى خۆى لەم بارەیەوە رۆشن کاتەوە،چونکە دورشمە باق و بریقەکانى پولێکى قەڵپ ناهێنێت و ئەگەر رەفتار و کردەوەى لەگەڵدا نەبێت.

لەلایەکى ترەوە، ئاشکرارکردنى نهێنی و ووردەکارییەکانى و پەیوەندییە ژێرەو ژووریەکانى ئەو رووداوە لەلایەن نەوشیروانەوە شکاندنى ئەو کەلتورە دواکەوتوە و تەقلیدییە کە دەسەڵاتى سیاسى کوردستان پەیڕەوى دەکەن و ئیستا نەوشیروان لێى نارازییە و ئیدعاى گۆڕانکارى لەم کەلتورە دەکات،ئەگەر ئەو کارە نەکات دەبێت چ خۆشباوەریەک بە بەرنامە و ئەجنداکەى بکەین کە تەنها دورشم و مەرەکەبى سەر کاغەز بێت؟!

لە خوێن هەڵکێشانى پێنج لاوى دڵ پر لە هیواو و کوژاندنەوەى دونیایەک حەز و خۆزگەى بەدینەهاتوو لەنێو دڵەکانیان،قەدەغەکردن و داخستنى بارەگا و رادیویى حیزبى کۆمۆنیست لەسەر داواى جمهورى ئیسلامى ئێران و سەرگەردانکردن و دەربەدەرکردنى سەدان ئەندام و کادیر لە ماڵ و خێزانەکانیان ،کارێکى سادە و راگوزەر نیە و بە ئاسانى بەسەر سەرى ئەنجامدەرانیان تێپەڕ نابێت و لە هزرى ئێمەش کاڵ نابێتەوە.

حیزبى کۆمۆنیست داواى ئازادى و یەکسانى و خۆشگوزەرانى و دەستڕاگەیشتنى هەمووان بوو بە سەروەت و سامانى ئەو وڵاتە ،داواى کورتکردنەوەى دەستى حیزبى دەکرد بەسەر ژیان و هەناسەى تاکەکان و دورستکردنى ودەوڵەتێکى دامودەزگاى ،داواى یەکسانى ژن و پیاوى دەکرد و لەمبارەیەوە تێدەکۆشا و سەنتەرى پارێزگارى کردبویەوە،داواى نەزم و نیزامێکى مەدەنى و یاسا و دەستورێکى هاوچەرخ و مافە فەردى و مەدەنیەکانى تاکى دەکرد،... .

کەچى ئیستا ئەو کارانە بۆتە دورشم و بانگه‌شه‌ی لیستى گوڕان کە نەوشیروان مستەفا سەرۆکایەتى دەکات و تاکو ئەو ساتەش بەئەندازیارى ئەو رووداوە تاوانبارە، واتە سەرکوتکردنى و ئازادى و خنکاندنى بیروڕاى جیاواز ،ژێر پێنانى ماف و ئازادییەکانى تاک و دەست بەسەراگرتنى سەروەت و سامانى خەڵک.

نەوشیروان مستەفا ئەگەر ئەو دوو ساڵە پشویەکى دابێت و عەقڵیەتى کارکردنى چەندین ساڵەى خستبێتە کەنارەوە ،دەبێت لە ساڵرۆژى ئەو رووداوە خوێناویە و دەیان رووداو و کارەساتى ماڵوێراتى تر کە لەسایەی یەکێتى نیشتمانى کوردستان بوونەتە نسیبى خەڵک و ئەویش وەکو کاراکتەرێکى بەدەسەڵات لەم حیزبە رۆڵى کاریگەرى هەبووە ،دەبێت لەمەودوا رووداوەکان وەکو خۆى بۆ خەڵک رابگەیەنێت و هەڵوێستەکانى لە هەموولایەکەوە رۆشن بکاتەوە و ئیحرائاتى قانونیان لەگەڵدا بکرێت،ئەگەرنا گۆڕان و گۆڕانکارى گاڵتەجاریەکى ترە و فێڵێک بوو لە خەڵکى کوردستانى کرد و سەد خۆزگە بە کفن دز !

Bashdar_net@yahoo.com