٧\١٠\٢٠٢٦

    چەند کورتە هۆنراوە.

زانا کوردستانی

١
چوون خەم و پەژارە 
وڵاتمی داگیرکرد
دەسووڕێ داکوو
دڵخۆشیان خەسان.

٢
لە دووری تۆ
کراسەکەم 
تیتۆڵیکە سپی
سێ پەلە،
پێچراو بە دەوراندوەری جەنازەم.

٣
ئەمە مەراقی منه،
گەشەوبوونی من دەسپێدەکات 
خونچەکانی 
مەرگ و نەبوون دەم دانەوە ئەبێت.

٤
لە چاوه‌کانت 
هێندیک وشە پەنای گرتووە
ئەگەر شیعر نەبەن،
ده‌بنە باران!

٥
زۆر مەرگ 
ڕێگاکەمیان گرتووە!
لە ئەنفالەوە 
هەتا
نەبینینی تۆ!

٦
من لە جەنگی ژیاندا
جگە لە تەنیایی تەواو
مەرگی تەواونەکراو
هاوسەنگەرێکی ترم نەبوو.

٧
وا مەزانە 
دونیا دەمێنێتەوە،
مەگەر تۆ بۆ من،
مایتەوە؟!

٨
ئێمە فەرهادی شاخکەنمان نەبینی
بەڵام 
فەرهادی کۆڵبەرمان بینی
ئەوەی 
لەبەر پارووە نانێک
سفرەی گیانی 
خستبووە سەر کۆڵ.

٩
دەپشکم و دەپشکم
بەدوای کەمێک بەختەوەریدا
لە ناو سەتڵە زبڵەکانی 
دەوڵەمەندە ناخۆشەکاندا...

٢٠٢٦
rahalilass@gmail.com