٦\٣\٢٠١٩

چەپکێ لە وتە و پۆستەکانم لە گشتپرسییەوە و تا ساڵوەگەڕی گشتپرسیی.

هەڵۆ محەمەد      

- بەشی دووەم -

بەندە، پرۆسە و شێواز و بڕیاری ریفەراندۆم بۆ ئەو ھەڵکەوتە تاڵەی کوردی تێخزێندراوە و ھەلومەرجی جیھانی سازی داوە، بە یەکێ لە میتۆدە دروستەکانی خەباتی گەیشتنە ئامانجە ڕەواکانمان لەم قۆناغەدا دەزانم. ھەر لەم سۆنگەیەشەوە بوو، بەدڵ و کوڵ پێشوازی و داکۆکیم لێکرد و بە ڕووداوێکی بەرزی دەنرخێنم و جێی شانازیی کوردبوونمە. لەو ساتەوەختەدا و پاشتریش لە ڕێگەی ھەندێ پۆستەوە، بەشداریی و ئامادەیی خۆمم لەم کارەدا نواندووە. لێرەدا ئەو پۆستانە، پێشکەش بە ئێوەی ھێژای دەکەم.
سەرنجێکی لێرەدا شایانی ئاماژە پێدان بێت، ئەوەیە بڕەک لە پۆستەکان پەیوەستن بە چرکەساتی رووداوەکانی کوردستان یاخود ھەڵوێستی دەستەوتاقمێکی دیاریکراوە، یانژی بارودۆخی ناوچەیی و جیھانییەوە.
مێژووی ئەو ڕۆژگارەش ھێندە کۆن نییە، لەیادەوەری ھەمووان دا بە جۆرێک لە جۆرەکان ھێشتا دەزرنگێنەوە. جار ھەبووە لە ڕۆژێکدا چەند پۆستم بڵاوکردۆتەوە، بۆیەکا بەرواری ڕۆژەکانیشم داناوە، تا ڕیزبەندی ڕووداوەکان بپارێزم. بەداخەوە بۆم نەلوا لە ساڵرۆژی ریفەڕاندۆم دا بڵاویان بکەمەوە.
ھەڵۆ محەمەد ١/٣/٢٠١٩

بەشی (١ ـ٣)

٢٥/٩/٢٠١٧

ـ لەگەڵ "بەڵێ" بۆ سەربەخۆیی دا،سڵاوی گەرمی خەبات بۆ پێشمەرگە لەیاد نەکەن،تکایە و زۆر تکایە.
ـ بەڵێی سەربەخۆیی،باشترین و بەنرخترین پاداشتە بۆ ساڕێژکردنی ڕەوانی گیانبەختکردووە نەمرەکانی ڕێی ڕزگاریی و سەربەخۆیی کورد و کوردستان.
ـ لە گەرمیانی ئەنفالکراوەوە بە قەتار و ئەڵاوەیسییەوە پێشوازی لە سەربەخۆیی کوردستان دەکرێت. ئەوان وێرانکەر و ئێمە ئاوەدانکەری ژیانین.
ـ بەر لە ٥٦ ساڵ لای دایک و باوکم و پێش لە ٣٩ ساڵ لای پاسۆک و بیروباوەڕی نەتەوەیی فریچکم بە سەربەخۆیی کوردستانەوە گرت. ئێستا بەختەوەرم گرتنەبەری ئەو ڕێبازە .
ـ ھاوڕێیان: کەرنەڤاڵ و گۆڤەندی سەربەخۆییە،کەچی من بە قووڵپ گرانم دێت. بنۆڕە چ بارودۆخێکی دەروونی سەیر ئابڵوقەی داوم؟!.
ـ سڵاو لەو برایانەی "گۆڕان" کە دەنگ بە "بەڵێ" بۆ سەربەخۆیی دەدەن، بەس تکایە دەنگی نەخێرتان لە دژی گەندەڵی و نادادپەروەریی با بڵندتر بێت.
ـ سڵاو لە ڕۆڵی کۆسرەت ڕەسوول، د. نەجمەدین و ڕێبوار تاڵەبانی، کە لەدوا چرکەساتەکان دا، شاری کەرکووکیان وەک دڵ بەخشێیەوە بە کوردستان.
ـ نەتەوەکەم،بە ھەست و خرۆشێکی بەرز و جلوبەرگی کوردیی و ئاڵای کوردستان و خواردنی برنج و قەیسیی جەژن و بەخشینەوەی شیرینی بۆ سەربەخۆیی دەچێت.
ـ ئەرکەکانی ئایندەی بەردەم کورد، ھەروەک ڕابووردووی سەخت دەبێت. بە دەوڵەتبوون پرۆسەیەکی قورس و ھەستیارە، دەست لەدەست و ھێز لە نەتەوە.
ـ بەرپرسان تکایە: پانۆڕامایەکی گەورە وەک شورای چین دروست بکەن و وێنەی تاکە تاکەی گیانبەختکردووانی کوردستانی پێدا ھەڵواسن.
ـ گەر حیزب و ڕێبازێ، تاکەکانی بۆ کوردستان و کوردایەتی پەروەردە نەکات، ئەو ئاکامە بەدەستەوە دەدات، کە ڕێژەی نەخێرەکانی ئیمڕۆ نیشانیان دا.
ـ ئەوانەی بە ھەر ھۆکارێک دەنگی "بەڵێ"یان نەدا، دەبێ ئەوە بزانن ، ئەوە مومارەسەی مافی دیموکراسی نەبوو، بەڵکوو دژ وەستانەوەی مافی نەتەوەیەک بوو.

٢/١٠/٢٠١٧

ـ ھەرگیز باوەڕم بەوە نەبووە، ڕۆشنبیری ھەلپەرست و حیزب و سەرکردەی ھەناسەسوار و ڕاڕا، بتوانن سەرکردایەتی خەباتی رزگاریخوازی بکەن.
ـ بەناوی فشەکردن بە کوردایەتییەوە، سنگی خۆی بۆ ئامەد و قامیشلۆ دەکوتێ،کەچی حەز دەکات داعش ھەولێر،داگیر بکات و مەھابادیش نادیدە دەگرێ. پەکووووووو!!.
ـ کە تۆپ و فرۆکەی داگیرکەر بۆمبارانی کوردستانی کرد، ناپرسێ زەرد دەکوژم و سەوز دەبەخشم و مۆر ھاوڕێمە و شین بێ لایەنە. ئەو کورد دەکوژێ.
ـ گوایە ڕۆژئاوا و ئەمەریکا داوای دیموکراتیمان لێ دەکەن،کەچی سادەترین بنەمای دیموکراسی دەنگدانی %٩٢ نەتەوەکەمان بوو بۆ سەربەخۆیی،لێمان پەسەند ناکەن.
ـ داگیرکەران ھەموو شتێکمان لێ قبووڵ دەکەن،بەس کوردبوون نەبێت.
ـ کورد ساڵانێکە دژی تیرۆریستانی داعش لە جەنگ دایە،کەچی پاداشتی کۆمەڵگای نێونەتەوەیی بێدەنگی و فەرامۆشییە، بەرامبەر بە خواستەکانی.
ـ دەوڵەتانی تورکیا و ئێران و عێراق و سووریا، بەرھەمی خەباتی میللەتەکانیان نین، بەڵکو بەچکەی زۆڵەکی ناشەرعی مامە ئینگلیز و فەرەنسا و ڕووسیان.

٣/١٠/٢٠١٧

ـ مەخابن بۆ ئەو کەس و لایەنانە گەوجێندراوانەی، گووتاری دژە سەربەخۆیی و دژە دەوڵەت ختووکەی فیزیان دەدات.
ـ چەمک و مانا و گوتار و کرۆکی "کوردبوون" داوای یەکێتی و یەکڕیزیی و تۆکمەییمان لێ دەکات، مامۆستا و ھاوڕێ ئێوە وان لە کوێ؟.
ـ ھەر ھێز و کەسێک دژی سەربەخۆیی و دەوڵەتی کوردستان بێت، بانگاشەکانی درۆزنانە و دروشمەکانیان چەواشە کارانەن.
ـ ھاوڕێ! من باش دەتبینم،خۆت و حیزب و باوەڕەکەت،لەئاست پرسی نەتەوەیی کورد دا، مێشک و دەست و ھەگبە بەتاڵن. ئیتر گارە گاری چیتە؟!
ـ ئیدی کورد لە کایەی مێژوودا گەمە دەکات،بۆیەکا چیدی بەخۆیی و مێژووی پڕ لە شانازییەوە ناگەڕێتەوە بۆ دواوە.

٨/١٠/٢٠١٧

ـ نھێنی سەرکەوتنی کورد دەگەڕێتەوە بۆ یەکێتی و تەبایی ریزەکانی،نەک فەلسەفە و ئایدۆلۆژیای حیزب حیزبێنە.
ـ ئەگەر کورد موعجیزە نەبێت،وا لە میانەی ٢٧سەدەی داگیرکراوی و چەوسانەوەدا، وا ئێستا باسێکی مێژوو و کەرەسەیەکی مۆزەخانە دەبوو.
ـ مەرگی مام جەلال سنوورە دەستکردەکانی سڕییەوە و پرسی نەتەوەی کوردی لە سەرتاسەری کوردستان دا،یەکخستەوە.
ـ ریفەراندۆمی سەربەخۆیی بووە ھەڵگری ھیوای کورد و ھێزەکانی باوەڕی یەکخست. بۆیەکا داگیرکەران ھەراسان بوون و بەردەوام پلانگێرێ دەکەن.

١٣/١٠/٢٠١٧

ـ ھەر ھێزێک یەکڕیزی کورد ببەزێنێ،یاری بەئاگر دەکات و خۆی بەر لەھەر لایەکی تر دەسووتێنێ و بەر نەفرەتی مێژووش دەکەوێ.
ـ کورد بە یەکڕیزیی سەرکەوتنی دەبێتە شا سەرکەوتن و ژێرکەوتنیشی دەبێتە مەدالیای شەرەفی مێژووی مرۆڤایەتی. کەواتە ھەر سەرکەوتووە.
ـ خەباتی بوونە دەوڵەتی کوردستان سەختە و مەرجی سەرکەوتنیشی یەکڕیزیی و حیکمەتی سیاسییە. لەبەرئەوە ھەموو ورە و خۆڕاگرییەکی گەورەمان پێویستە.
ـ سڵاو لەو ڕۆڵە بە ڕوومەت و سەربڵندەکانی کەرکووک، ئەوانەی لاشەیان دەکەنە شورای پاراستنی شار و وڵاتەکەیان.
ـ گەر کورد کەرکووک لەدەست بدات، سەربەخۆییەکەی ئیفلیج دەبێت و دەگەڕێتەوە چوارگۆشەی یەکەم.
ـ کەرکووک گشتپرسییەکەی سەرخست و کەرکوویش سەربەخۆییەکەمان دەپارێزێ و مسۆگەری دەکات.
ـ ھەستی ئێرانچێتی ھێندە شۆفێنیزمی لێ دەتکێ، پاسدارێک و چەپێکی دژە پاسداری ئێرانی خستۆتە یەک سەنگەریی دژ بە سەربەخۆیی کوردستانەوە.
ـ پێویستە ھێزی جەماوەر و ڕۆشنبیران،حیزب و دەسەڵاتی کوردی ناچار بکەن نە پاشەکشە و نەھەڕاجی دەنگ و ھەڵوێستی سەربەخۆخوازییان بکەن.
ـ کەش و ھەوا و سەرکەوتنی بەرچاوی بەڵێی سەربەخۆیی، نەخێرخوازەکانی کشومات کرد. ئێستا کە دوژمن ھەڕەشە دەکات، ئەوانیش دیسان سەرە جوقەیانە.

١٧/١٠/٢٠١٧

ـ مێژووی کورد جاشایەتی و ناپاکی ٣١.٨.١٩٩٦ و ١٦.١٠.٢٠١٧ھەرگیز لە بیر ناچێتەوە.
ـ کەرکووفرۆشان جگە لە خۆتان، ھەستی کوردبوونی ٦٠ ملیۆن کوردتان بریندار کرد. ڕووتان بۆ ھەتا ھەتایی ڕەش بێت.
ـ ئەگەر ئەندام و لایەنگریی حیزبەکان ھەڵوێست نەنوێنن, بەرامبەر بە کەرکوکفرۆشان, وا دەبێت ھەر لە نێو ناپاکی دا تلاوتل بکەین.
ـ ئەوەی کەرکووکی فرۆشت, ناپاکی لە ماڵی خۆیشی دەکات.
ـ ئەرێ! بڕیاردەران و بکەران و لایەنگرانی ناپاکییەکەی رۆژی١٦.١٠.٢٠١٧ ، لەمەوپاش چۆن باس لە ٣١.٨.١٩٩٦ دەکەن !؟.
ـ بێدەنگی لایەنە سیاسییەکان و جەماوەری کوردستان, بەرامبەر بە کوردستان فرۆشان نیشانە و ئاماژەیەکی ترسناکە بۆ ئێستا و ئایندە.
ـ کەرکووک, کرایە قوربانی چەند تەنکەرێک نەوت و بڕەک فەردە دۆلاری قەرسیلی.
ـ کەرکووکفرۆشان باش بزانن، ئێستاش بە پشتیوانی داگیرکەران کارتان مەیسەر بێت،وا لەدەست نەوەی ئاییندە و مێژوو ھەرگیز ڕزگارتان نابێت.
ـ مۆری ناپاکی لە نەتەوە و نیشتمان،ھەرگیز کاڵ نابێتەوە و ھیچ ھێزێکیش ناتوانێ بیسڕێتەوە.
ـ سەیرە نیشتمانێک کەسێک یان دووان بتوانێ گەمە بە چارەنووسی بکات؟! ئەی شێرە کوڕ و مامۆستا و فەیلەسوفەکان ئێوە وان لە کوێ؟!.
ـ سەرکەوتن و ژێرکەوتنی بە کۆمەڵمان،دەبووە گەورەتین وانەی مێژوو. مخابن یەکڕیزی تێک درا.
ـ دوای ١٠.١٠.٢٠١٧،وا چاوەڕوانم دەکرد، زۆر ئەندام مەکتەبی سیاسی و پەرلەمان و بەرپرس و سەرۆک و ئەندام واز لە حیزبەکەیان بھێنن.
ـ ئەگەر ئەم تێکشکانەی١٦.١٠.٢٠١٧ وەرچەرخان لە بیر و تێڕوانین و پەیکەرسازی کورد دا دروست نەکات، مانای وایە ئیدی مایەپووچ بەدیار مێژووەوە ژیان دەگووزەڕێنین.
ـ وتاری سەرۆکی ھەرێم زۆر لاواز و وەڵامدەری کێشە و ڕووداوەکانی ١٦/ ی ئۆکتۆبەر نەبوو.
ـ کورد نەتەوەیەکی زوڵملێکراو و تەنیای ئەم گەردونەیە، %٩٢ی دەڵێ بەڵێ بۆ سەربەخۆیی ، کەچی بە چوار دەوڵەت پەلامار دەدرێ و دنیاش تەماشای دەکات.
ـ بەریتانیا دایکی ئەوروپا و جیھان چونکە دەوڵەتە،BREXIT ی لەیەکێتی ئەوروپا کرد،لێیان قبوڵ کرد. کەچی کورد و کاتالۆنی پەلامار دەدرێن.
ـ تۆ بڵێی ئیسرائیل و ئەمەریکا رازی بن، ئێرانی خاوەن چەکی ناوکی، عێراقیش وەک سووریا و لوبنان و یەمەن بەتەواوی کۆنتڕۆڵ بکات؟.
ـ داگیرکەرانی کوردستان یەکگرتوویی کوردیان ناوێ، بۆیەکا بەردەوام بایەخ بە لایەکی دەدەن، تا میکانیزمی خۆخۆری لەگەڕ نەکەوێ.

١٨/١٠/٢٠١٧

ـ لەنێو داگیرکەرانی کوردستان دا، ئێران مەترسیدارترینیانە، چونکە بەناوی زڕبرا و دۆستەوە، وەک ھەژدیھا دەستی خستۆتە ناو جەرگ و ھەناوی کوردەوە.
ـ ئێران بە درێژایی بوونی خۆی ھەوڵی پاراستنی میکانیزمی کوردکوژی لەنێو پارتە کوردییەکاندا داوە، تا دوا بڕیار و کۆنتڕۆڵ لای خۆی بێت.
ـ کورد ھەزارجاری دیکەش بکەوێ، ھەر ھەڵدەستێتەوە و ڕۆژێ دێت بە ئاواتەکانی بگات.
ـ ھەزاران ناپاکی ناوخۆ و ھەڕیشە و گەمارۆی داگیرکەران، ناتوانێ نەتەوەیەک لەناوبەرێ، کە ٢٧١٧ ساڵە بە مەرگ خۆی ژیان دەڕسکێنێ.
ـ کوردبوون و خەبات و قوربانییەکانی بۆ بنەبڕکردنی ناپاکی،لە ھەمووان داوای ھەڵوێست دەکەن.
ـ نەبوونی سوپایەکی کوردستانی، یەکێکە لە فاکتەرە ھەرە کاریگەرەکانی شکستمان.١٦ ی ئۆکتۆبەر بە نموونە.
ـ کەسێک تامی ئازادی چەشتبێ، بەسانایی کۆیلە ناکرێتەوە. بنۆڕە ڕاپەڕینی ئەمرۆی کورد.
ـ لە سێبەری ڕیفەراندۆمی سەربەخۆیی دا، نەتەوەی کورد یەکگرتووترین چرکەساتەکانی ژیانی دوو دەیەی ڕابووردووی خۆی بەسەر برد.
ـ بێ کەرکووک، نابێت کورد بیر لە ھیچ دانووساندن و پرۆژەی چارەسەرێک بکاتەوە.
ـ دەبێت ئێستا باری دەروونی پاڵەوانانی کەرکوکفرۆش چۆن بێت؟
ـ حەشدی شەعبی،داعشی شیعەیە بۆ کورد.
ـ سەیرە د. نەجمەدین لەسەر کوردایەتی دەردەپەڕێندرێت و بێ بڕیاری ئەنجومەنی کەرکووک دەیگۆڕن؟
ـ سڵاو لە ھاوزمان و ھاوخوێنەکانم لە شاری خانەقینی/ حەشدای شەعبی بەزێن.
ـ سڵاو لە گەڕەکی ڕەحیمئاوای بابەگوڕگوڕ کە نایەڵن، ئاڵای کوردستان لەکەرکووک نەوی بێت.
ـ تکایە بەپەلە گرتەیەکی ڤیدیۆیی ڕاپەڕیوەکانی ڕەحیمئاوا و خانەقین بنێرن بۆ کەرکوکفرۆشان.
ـ بەو ھیوایەی ناپاکی ١٦/ ی ئۆکتۆبەر.بۆ ھەمیشە، بێتە دوا وانەی ھەڵکێشانی ڕەگوڕیشەی ناپاکی و خۆفرۆشی لە کوردستان دا.
ـ ڕاپەڕینی سەرتاسەریی لە کوردستانی بندەستی حەشدی شەعبیدا، چەخماخەی دایەوە.

١٩/١٠/٢٠١٧

ـ خەڵکی تێکۆشەر و قوربانیدەری کەرکووکی بابەگوڕگوڕ، بە شکۆ و شایستەوە پێشوازی لە د. نەجمەدینی پارێزگار و دڵسۆزان و ئاوارەکان بکەنەوە.
ـ جەماوەر پێشمەرگەیە و پێشمەرگەش کراوەتە تەماشاوانی گاڵتەجاڕکە. چ سەیرێکە یاران!.
ـ سەعدی پیرە: یەکێتی لە پێناوی کەرکووک لەگەڵ حکومەتی عێراق ڕێک کەوتووە، ئەی بۆ کاک کۆسرەت و د.نەجمەدین شەڕیان لەدژی حکومەت کرد؟!.
ـ کەرکووکفرۆشان بەپشتیوانی داگیرکەران توانیان بە OFFSID گۆڵێک بکەن. ئێستا خۆبەخشەکان بە شانازییەوە لەھێڕشدان و گۆڵبارانیان دەکەنەوە.
ـ ھەوڵی داتاشینی ھەر حیلەشەرعییەک بۆ ناپاکییەکەی ١٦ی ئۆکتۆبەر دەکاتە عوزر لە قەباحەت خراپتر.
ـ گەلۆ کورد لە باکوور و ڕۆژھەڵات و ڕۆژئاوا گشتپرسییشی نەکردووە،کەچی ھەر دەکوژرێ و لەسێدارە دەدرێ.
ـ ھیچ بەدووری نازانم (ئەبوبکر بەغدادی)لە سوریا و ئێران بێت،وەک زۆربەی سەرکردەکانی دیکەی القاعدە.

٢٠/١٠/٢٠١٧

ـ ھەرچی چەرمی دنیایە بیخەنە سەر ڕووم، ھێشتا زات ناکەم، وەک بەرپرسی حیزبەکان درۆ بکەم.
ـ پێمان دەڵێن: بۆ ئەوەی کەرکووک وەک موسڵ و حەڵەبی لێ نەیەت، دامانە دەست حەشدی شەعبی، سبەینێ دەڵێن: با سلێمانی و ھەولێریش وەک کەرکووک لێ بکەین.

٢٢/١٠/٢٠١٧

ـ بینیم، بە دڵی سارد و گیانی سڕ و باوەڕی لەرزۆکەوە، بەشەلەشەل بەرەو گشتپرسیی دەچیت، دڵم کرمێ بوو و ترسیشم لێ نیشت، وتم دەیقەومێنێ.
ـ خەڵکینە تێناگەم: میللەت و حیزب و بەرپرسەکانی یەکێتی ناوی کەرکوکفرۆشیان ھێنا، کەچی ئەوان ھێشتا لە کوردستانن و بەرپرسی یەکێتیشن؟!.
ـ کورد بە گوڵ و عەرەب بە گوللە، پێشوازی لە ئەمەریکا دەکەن، کەچی ھەر عەرەب لای ئەوان لەپێشترە. گەر کورد وەک عەرەبی بکردایە، چی دەبوو؟!

ـ ٢٣/١٠/٢٠١٧

ـ ئێران بە حیزبوڵڵا ژیانی سیاسی لە لوبنان ئیفلیج و کۆنتڕۆڵ کردووە، کوردستانیش لە ڕێی کوردستانفرۆشانەوە لە ھەوڵ دایە.
ـ ڕۆشنبیرانی پایتەختی ڕۆشنبیریی کوا قیڕەکانتان!؟، قەڵەمتان شکاوە و شەوەزەنگ بیرتانی داپۆشی، یان ھەریەکەتان نرخی حیزبێکتان پێوەیە؟.
ـ ئێران ھەموو خەونەکانی لە باشووردا بۆ نەھاتۆتە دی، بۆ نموونە براکوژی، بۆیەکا دەست لە پلانگێڕی ھەڵناگرێ.
ـ کەرنەڤاڵی سەربەخۆیی و سەرکەوتنە مەزنەکەی بە %٩٢ و مەراسیمی بەخاک سپاردنی مام جەلال شکۆی کوردی سەنگین کرد، خۆفرۆشان ھەموویان سڕییەوە.
ـ یاران چ کارەساتێکی نەتەوەیی و ڕۆشنبیرییە دەنگ و ڕەنگی لەشکری قەڵەمفرۆشان دژ بە داگیرکەران و خۆفرۆشان نە دێت و نە دیارە.
ـ چ دەقەومێ گەر بێت و گرووپێکی جولەکە، پەلکێشی حیزبوڵڵا بۆ ناو ئیسرائیل بکەن، یان گرووپێکی فەلەستینی ھی ئیسرائیل بۆ غەززا و ڕامەڵڵا بکات؟!

٢٤/١٠/٢٠١٧

ـ ناڕۆشنبیرمان ھەیە بە یەکقۆڵی و دووقۆڵیش شت دەنووسن بۆ ئەوەی "گەڵاکان"ھەمیشە وەک پاداشت بەسەوزی و مفتی بەدەستیان بگات.
ـ ئەگەر خۆت بە بیر ڕۆشن دەزانی، ئەوە شەوەزەنگی نەتەوەکەت داھات، ھەر ھیچ نەبێ ڕێگا ڕووناککەرەوە، پەلی کوێرێ بگرە و دژی خۆفرۆشێ بوەستەرەوە.
ـ گەر زانین و زانیاری و باوەڕ و ئایدۆلۆژیا و چەک و حیزب و ڕێباز ، خزمەتی کورد و کوردستانی پێ نەکرێ، سەلکێ پیازی ڕزیو ناھێنێ.
ـ کوان ئەو تاریک بیرانەی وەک پاڵەوانی شاشە، بەردەوام خەریکی نائومێدکردنی تاکی کورد و قووڵکردنەوەی قەیران و میکیاجکردنی دەسەڵاتداران بوون؟!.
ـ ئەی گوایە بۆ دڵخۆش نەبین، ئەی گوایە بۆ ھەڵنەپەڕین! سەرفرازین، وەک ڕانەمەڕ لەناو گەلەگورگی چاو تەنگا تێربین و وەکو وردەماسی لەناو ھەناوی نەھەنگا ئارام بگرین.
ـ لە دوای ١٦ی ئۆکتۆبەرەوە باش و جاش، خەباتگێڕ و نیشتمانفرۆش وا تێک ئاڵاوکراون، بەدروستی لێک جیا ناکرێنەوە.

٢٥/١٠/٢٠١٧

ـ دەرکەوت زۆر کەس پێشمەرگە بووە بۆ حیزب و شۆڕشیشی بۆ حیزب بووە. بۆیەکا ئەوانە ناتوانن بڵێن پێشمەرگە بوون و شۆڕشیان کردووە.
ـ حیزبەکان بۆ کورد و کوردستان و کوردایەتی کەسییان پەروەردە نەکردووە، بەڵکو بۆ بەرژەوەندییەکانی خۆیان ھەموو بازرگانییەکیان کردووە.
ـ ئەو پرۆژەیەی لە١٦ ی ئۆکتۆبەردا پێماندا ھەڵپژا،ھی چڵکاوەکەی ساڵی ٦٦ بوو.
ـ داگیرکەرانی کوردستان بەتاک و بە کۆ، بەردەوامن لەسەر پلانگێڕی دژی کورد. تاکە چەک و قەڵغانی دەستمان یەکڕیزیی و تەبایی و کوردایەتییە.
ـ داگیرکەران و دنیا دژی ڕیفەراندۆمی سەربەخۆیی کوردستان دەرکەوتن، ئەم ڕاستییە دەیسەلمێنێ، ئەو بڕیارە مێژووییە، بەس ھی کورد خۆی بووە.

٢٦/١٠/٢٠١٧

ـ شانازیکردن بە تەنیا شارێکی نیشتمانەوە، لە ڕێبازی کوردستانی و بیری کوردایەتی و چەمکی کوردبوون دا جێگە و سەنگ و بەھای نییە.
ـ بەو ھیوایەی مێژووی ھاوچەرخمان، بە قەڵەم و ویژدانێکی پاک و دڵسۆزەوە بنووسرێتەوە.
ـ نیشتمان لە کۆمەڵێ شار و شارۆچکە و ناوچە و ھەرێم و گوند پێک دێت، شار بریتییە لە چەند گەڕەکێک . کەواتە نیشتمان گەورەتر و پیرۆزترە.

٢٨/١٠/٢٠١٧

ـ کورد وەک قوربانییەکی داگیرکاریی و فەرامۆشکراوێکی نێودەوڵەتی، ئەگەر ژیانی لێ تێک بدرێ، ئەوانیش! ھەموویان نابێ و ناتوانن بە ئاسوودەیی بژین.
ـ ئەگەر کورد ئەمجارە لە باشووردا شکست بخوا، دەرفەتی خەباتێکی نوێی قورس دەبێت، چونکە چیدی بەغدا و تاران وەک جاران ناکۆک نین، بەڵکو یەکن.
ـ دوو دەوڵەتی داگیرکەری کوردستان بوونە یەک، کەچی پارچەیەکی کوردستان خەریکە بکرێتە دوو پارچە و کە نیوەشی ھەر داگیرکراوە.

٣٠/١٠/٢٠١٧

ـ تا ١٦ی ئۆکتۆبەر باوەڕم وابوو حیزبەکان ڕەفتار مافیائاسان، کەچی لەو ڕۆژەدا دەرکەوت مافیای ناو حیزبیش هەیە و دەستبەکار و بڕیاردەریشە.
ـ هەزاران چیرۆک و ڕۆمان بگێڕنەوە و شا وەستای پینەچییان و مکیاجسازان بهێنیتەوە، ناتوانی ڕووی ڕەشی ناپاکییەکەی ١٦ی ئۆکتۆبەر سپی بکەیتەوە.
ـ مەلای عەجەم وەک هەژدیهای حەوت سەر، بەخۆیی و چەندەها پلانی جەهەنەمییەوە شاڵاوی بۆ تێکشکاندنی شکۆی کورد و کوردستان هێناوە. یەکریز بن.
ـ ئەوەی هەوڵی پاساوهێنانەوە بۆ ناپاکییەکەی 16ی ئۆکتۆبەر دەدات،خۆی دەکاتە بەشێک لەتاوانەکە و(خوش امدی)ی لەداگیرکەر دەکات.
ـ سەردەمی سەدام مووچە بە ئیمتیازەوە هەبوو،کەچی شۆڕشمان کرد! و ویستمان لە قەندیلەوە بیرۆخێنین! بۆ؟!
ـ شەڕی کوردکوژی پشێوی نانەوە و پارچەپارچەکردنی کوردستان و لەناوبردنی تاکە دڵسۆزەکانی و کڕینی جوامێرەکانی...تاد،ئەجێندای مەلای عەجەمن.
ـ هەموو دەرک بەو گوشارانە دەکەین کە ڕووبەڕووی کوردستان بۆتەوە، بەڵام سەروەری لەوەدا بوو بەیەکڕیزی سەرکەوتن یان ژێرکەوتن بنووسینەوە.
ـ ئەگەر لە ١٦ی ئۆکتۆبەردا لە کەرکووک بەرگری بکرایە، ئێستا کوردستان یەک کڵپە ئاگر و داگیرکەر ریسوا و جیهان ڕوو زەرد و شەرمەزار دەبوون.
ـ بنۆڕە دنیا چەند سۆزانییە بەرامبەر بەنەتەوەی کورد و کاتالانییەکان. دوژمنەکانی ئێمە داگیرکەران و ئەمەریکا و ئەوان ئیسپانیا و ئەوروپا.

٣١/١٠/٢٠١٧

ـ ڕاستگۆیی و هەقپەرستی دوو پرنسین لە ژیانی حیزبایەتی کوردستان دا تابوون، چونکە حیزبەکان دەروێشن، ترسنۆک و بەرژەوەندی پەرستن.
ـ ناپاکەکان بوونەتە خاوەنی زۆر شت، کوردبوونیان دۆڕاندووە. میللەت دڵشکاو وە دەربەدرە،لێ کوردبوون چەک و سەرمایە و شانازی بوون و هەبوونێتی.
ـ گەر هێزە هاوپەیمانەکان ڕاستگۆ و خاوەن مۆڕاڵ و بە پەرۆشی مرۆڤایەتین، ئێستاش دەتوانن بە بەدیلەکانیان کار بۆ چارەسەری کێشەی کورد بکەن.

٢/١١/٢٠١٧

ـ ڕاگەیاندنی بلفۆڕ بەر لە ١٠٠ ساڵ دراوە. تا ئێستا فەلەستینییەکان داوای هەڵوەشانەوەی دەکەن. هەندێ کوردیش داوای تۆخکردنەوەی سایکس پیکۆ دەکەن.
ـ نەخشەی رۆژهەڵاتی ناوەوین: ئیسرائیل بەرامبەر بە عەرەبی یەکنەگرتوو، کوردی دابەشکراو ڕووبەڕووی ٤ داگیرکەری دڕندە وی نامرۆڤ.
ـ لە چڵکاو و ژەهراو بەولاوە، حیزبەکان چ شتێکی تریان نەکردووە بە گەرووی ئەندامەکانیان دا، بۆیەکا زۆرجاران ڕێگای ڕۆشنشییان لێ تاریک بووە.
ـ بەپێی ڕاپرسییەک%١٣ ئیتالییەکان لە وڵاتەکەیان دا ئاسوودەن .کەچی کەسیشیان هەوڵی ڕووخانی دەوڵەتەکەیان نادەن و پەلکێشی دوژمنیش ناکەن.

٣/١١/٢٠١٧

ـ ئەگەر کاتالۆنیا لە ڕۆژهەڵاتی ئەوروپا و ژێر خولگە و هەژموونی ڕوسسیادا بوایە، ئێستا ئەمەریکا و یەکێتی ئەوروپا پشتیوانی سەربەخۆییان لێ دەکرد.

٥/١١/٢٠١٧

ـ گەر دوای سەرەداوی ناپاکییەکەی ١٦ی ئۆکتۆبەر بکەوی، پاش مەلای عەجەم، دەگەینە مام ئینگلیز لە داون ستریت/ لەندەن.
ـ ئاغای گەورە "ئینگلیز"دروستکەری عێراقە، بۆیەکا دوای ڕیفەراندۆم ی سەربەخۆیی بۆ پاراستنی دەوڵەتەکەی گاردەکانی سنووری سایکس پیکۆی خستەگەڕ.

٩/١١/٢٠١٧

ـ هەتا کێشەی ڕەوای کورد چارەسەر نەبێ، مەحاڵە ئاشتی و ئاسایش و سەقامگیریی لەناوچەکەدا، بێتە دی و بەرقەرار بێت.
ـ لە ترسی ئەنفالی حەشد و سوپای عێراق ١٥ هەزار کەس لەدوای ناپاکییەکەی ١٦ی ئۆکتۆبەرەوە لە کەرکووک و ناوچەکانی ترەوە ئاوارە بوون.
ـ مادام ژیان و گوزەران لە کورد تێکچووە، وا بە دڵنییایەوە داگیرکەرانیش ناتوانن ئاسوودە بن.
ـ هیچ دەوڵەتێکی داگیرکەری کوردستان بە یاسا و دەستوور ڕەفتاری لەگەڵ کورد دا نەکردووە، هەتا کەی کورد چاوەڕێیە داری زڕ بەری بۆ بگرێ.
ـ بارودۆخی ئێستا بەرهەمی سەرەکی ناپاکییەکە لە ئەقڵی خێڵەکی و حیزب حیزبێنە و سیاسەتی سەقەت و نەزانی و گەندەڵی و هەڵەکردن و نادڵسۆزییشی تێدایە.
ـ نەبوونی حیزبێکی نەتەوەیی و سەرکردایەتییەکی نەتەوەیی و پرۆژەیەکی نەتەوەیی، لە کەماسییە هەرە مەترسیدارەکانی کوردستانە.
ـ دبلۆماسێت و لۆبی کوردی هەر نییە، گەر هەش بێت، هی حیزبەکانە، ئەویش لە جێی نەبوانە.
ـ لە ئایندەدا کورد دەبێ: سەرکردایەتییەکی نەتەوەیی بەدیسپلین، حیزبی پۆڵاینی خاوەن ستراتیژ و لەشکرێکی یەکگرتووی، پشتبەستوو بە نەتەوە و چیاکان پێک بهێنێت.
ـ ئەقڵێتی ناپاکی 16ی ئۆکتۆبەر و ئەوانی دیکەش، کتومت وەک ئەوە وایە: کەسێک لە داخ و ڕقی باوکی ، پیاوێکی بێگانە سواری دایکی خۆی بکات.

١٧/١١/٢٠١٧

ـ دەوڵەتی ئێرانی ساڵانە چەندەها ملیارد دۆلار بۆ حیزبوڵای لوبنان دەنێرێ، کەچی خێوەت و پەتووی پێویست بۆ قوربانییەکانی کرمانشان دابین ناکات.
ـ فارس دەوڵەتی میدیای ڕووخاند، سمکۆی شەهید کرد، پێشەوای لەسێدارە دا، قاسملۆ و سەرەفکەندی تیرۆر کرد،ئەندازیاری چەندین 16ی ئۆکتۆبەریشە.

٢٠/١١/٢٠١٧

ـ عێراق دەوڵەتێکە سەرەککۆمارەکەی بووە بە گاڵتەجاڕی خەڵک، جا چاوەڕوانی چی لە دادگاکەی و ئەقڵێتی داگیرکاریی و چ زڕەخەونێکی دیموکراسی دەکەیت!؟
ـ هەروەک کورد ئەنفال و کیمیابارانی کرد بێو هەزارانی لە سێدارە دابێ، وا دادگای فیدڕاڵی پەیتاپەیتا بڕیار لە دژمان دەردەکات.
ـ ئەو واقیعە کۆمێدییەی دەوڵەتی زۆڵەکی عێراقی تێیدایە، هەر ئەقڵێتی دەسەڵاتدار لێی بەرپرس نییە، بەڵکو ئەوانەیشی کە خەونی پەمەیی تێدا دەبینن.
ــ گەر ئینگلیزی ئاغای گەورە، دەوڵەتی بۆ عەرەب و دروست نەکردایە، وا بەیەک ملیۆن ساڵی تریش لە پەراوێزی خێڵ دەرباز نەدەبوون.
ـ میللەتێکی، عێراقی، سوریایی، لیبیایی، لوبنانی،میسری،جەزائیری،مەغریبی نییە. با هەزار ساڵی تریش دەوڵەت بن، ناتوانن میللەت دروست بکەن.
ـ شانازی بە یەک چرکە بیرکردنەوە و خەبات و دروشمی هیچ کەس و لایەنێکی کوردەوە ناکەم، بۆ وڵاتانی داگیرکەری تورکیا و ئێران و عێراق و سوریا بێت..
ـ هاوسۆزێ کورد بۆ جولەکە ئۆباڵەکەی دەگەڕێتەوە بۆ موسڵمانی عەرەب و فارس و تورک. ئەوان شەیتانی یەکتر قبوڵ دەکەن و ڕەحمانی کورد ڕەت دەکەنەوە.

ماڵپه‌ڕی هه‌ڵۆ محه‌مه‌د