٩\١\٢٠١٦

چی گیانی (نازە)کان ئاسوودە دەکا؟

بەشدار عوسمان     

بە تێڕامانێک لە سیما و وێنەکانی نازی جوانەمەرگ، دنیایەک ئومێد و خەون و خولیا بەدیدەکرێت ،کاتێک لە وێنەکانی وورد دەبیتەوە ناتوانیت بڕوا بەوە بکەیت کە کچێکی جوان و گەنج کە سەرەتایی تەمەنیەتی و لەشوێنێکی باش کار و دەوام دەکا و بەسیارەکەی خۆی بچێتە شەقامێک و گڕ لەجەستەی ناسکی خۆی بەربدات..؟!

کێ بروا بەوە دەکا، ناز کە هەمو بەیانیەک زیاتر لە سعاتێک خەریکی قژ و بەکارهێنای مەسکارە و جوانکاری بوە تا بەجوانترین شێوە دەربکەوێت،کەچی دەستی دەچێتە جەستەی ناسکی خۆیی و بیشێوێنێت..؟!

وایدەخوێنمەوە،ناسکی دەستەکانی ناز ناتوانێت ئازاری تەنها مێرولەیەکیش بدات نەک جەستەی هۆی بشێوێنێت و گازی ژەهر دەرخواردی خۆی بدات..!
شێوازی گیان لەدەستدانی ناز بەو شێوەیە بێ ڕەحمانە، ئەگەر خۆکوژیش بێت ئاسایی نیە،چونکە کەسێک بەو شێوەیە دەستی بچێتە گیان و جەستەی خۆی کێشەیەکی قوڵ و گەورەیی هەبوە ،کۆتایهێنان بەژیان و کورتکردنەوەی خۆشترین ساتەکانی تەمەن،قورسترین بڕیارێکە ئینسان دەرهەق بەهەناسەدان و سیەکانی خۆی دەیدات ،ئەگەر کێشە و گرفتەکان تینی بۆ نەهێنابێت،ئەگەر هەموو دەرگاکانی لەسەر دانەخرابێت،ئەگەر حەز و خۆزگە و هیواکانی بەسەراب نەسپێردرابێت،ئەوە چ وەزعیەتێکە مرۆڤ ئەو هەستەی لا دورست بێت کە هەناسەدانی ئەرکە و دەبێت کۆتایی بێت ؟!(پێچەوانەی هەمو قسەی کەس و کار و هاوڕێکانیەتی کە دەڵێن هیچ کێشەیەکمان نەبوە و هیچ کێشەیەکی نەبوە..!).

بەپێی زانیارییە دەروونی و پزیشکیەکانیش ئەگەر کەسێک بیری لای خۆکوژی بێت ،پێشتر نیشانە و هێمای جۆراو جۆر بە قسە و کار و کردەوەی دەردەکەوێت و دەوروبەرەکەی هەستی پێدەکەن ( قسە و لێدوانی هاوڕێی دەوام و خولی ئینگلیزیەکەی و خانەوادەکەی ئەوەمان پێ ناڵین کە ناز هەولێکی لەم شێوەی هەبێت ..! )ئاخر ئەو بەیانیان تا ئێوارە کاری کردوە تا داهاتویەکی باشتر بۆ خۆی و مناڵەکانی دابین بکات ، دواتر چۆتە خولی زمان تا ووشەیەک زیاتر زمانی ئینگلیزی فێر بێت و زانیاری زیاتر لە دەرەوە وەربگرێت ،ئەمانە هەمو ئاماژەن بۆ بەهێزی ئیرادەی ناز و پلان و بەرنامەیەک کە بۆ ژیاندا کێشاویەتی ،نەک نیشانەیەک لە شێوازی ژیان و کار و کردەوەی بۆ خۆکوژی..؟!

چەند ساڵێک بەر لە ئێستا کوڕی یەکێک لە بەرپرسانی ئەو هەرێمە لەرێگای کۆڕێ-هەولێر، کچێکی گەنجی خانەوادەیەکی ئەو هەولێرەی کردە چالێکەوە و کوشتی ،تەنها لەبەر ئەوەی کچەکە نەیویستوە لەگەڵ ئەو کوڕە بێت ، دواتر بە چەند دەفتەر دۆلارێک هەمو شت کۆتایی پێهات و کوڕەکەش یەک سعات نەچوە سجنەوە..!

بەداخەوە ئێستا نازی جوانەمەرگ لە ژیاندا نەماوە تا بەرگری لەخۆی بکات، خەون و خولیا و هیواو و ئاواتەکانی لەگەڵ خۆی بردە ژێر گڵ،باشترین وەفا و رێزگرتن بۆ نازەکان ئەوەیە ئەوەی لەدەستمان دێت بۆ گوتنی واقعیەتی رووداوی گیان لەدەستدانیان وەکو خۆی باس بکەین و لەخوێنی بە ناحەق رژاوی رۆڵەکانمان خۆش نەبین،تەنها راستگۆیی و نەترسان و هەڵنەخەڵەتاند و سوور بونمان لەسەر دادگاییکردنی بکوژی رۆڵەکانمان گیان و رۆحی نازەکان ئاسوودە دەکان.
 

ماڵپه‌ڕی به‌شدار عوسمان