بەدادگاگەیاندنی هەر کەسێک کە تۆمەتی کوشتن یان هەر توندوتیژییەکی دەدرێتە پاڵ لە دادگایەک کە مافەکانی مرۆڤی تێدا پارێزراوە.. کارێکی مرۆییانە و شارستانییانەیە بۆ بەرگرییکردن لە ماف و ئازادییەکان، بەڵام داد و داگایەکانی (مالیکی و بارزانی) سەرەڕای ئەوەی پڕن لە یاسا و رێسای کۆنەپەرستانە و تا ئێستاش لە ژێر حوکمی نامرۆییانە و ناشارستانییانەی ئایەتی (٤٥)ی سورەتی (مائیدە) بەڕێوە دەچن کە دەڵێ: (نووسیمان و واجبمان کرد کە گیان لە باتی گیان و چاو لە باتی چاو و لووت لە باتی لووت و گوێ لە باتی گوێ و ددان لە باتی ددان، و هەر بڕینێ قیاس و لە جیاتی و تۆڵەی وێنەی خۆی بۆ هەیە،...) بەڵام هێشتا هەر هاوڵاتییان یەکسان نین لەبەردەم یاسا و رێکارە یاساییەکان.. چونکە وەک ئاشکرایە هەر تۆمەتبارێک بە ئاستەم بەرهەڵستکاری ئەوان و حوکمە چەوسێنەرەکانیان بێ ئەوە دەمودەست راپێچی دادگای دەکەن بەڵام ئەگەر تۆمەتبارێک لە خۆیان بێ یان لایەنگریان بێ ئەوە هیچ یاسایەک ناتوانێ راپێچی دادگای بکا و هەر خۆشیان پارێزگاریی لێ دەکەن و سەرەنجام بە پێچەوانەوە تۆمەتێکیش بۆ قوربانییەکە هەڵدەبەستن.. نموونەی لەو بابەتانەش لە عێراق و کوردستان زۆر زۆرن و پێویست بە ئەنگوست بۆ راکێشان ناکا! ئەگەر پێویستیش بکا ئەوە حیزبەکان رووداوەکە لە ململانێی سیاسەتبازانەی نێوان خۆیان بەکاردەهێنن وەک ئەو رووداوەی ئێستای کوشتنی (محەمەد بدێویی) لە بەغدا!