|
١٦\٨\٢٠٢٤
داگیرسانی (٣١)ەمین
چرای تەمەنی ئەمڕۆ
پیرۆزە لەو
خوێنەرانەی خوازیاری ئازادیی و یەکسانیین!
١٩٩٤
-
٢٠٢٤
١٥ی
ئاب
داگیرساندنی
چرای
٣١
ساڵەی تەمەنی ئەمڕۆ.
٣٠ ساڵ لەمەوبەر ''رۆژنامەی ئەمڕۆ'' وەک یەکەمین رۆژنامەی ئازاد و
سەربەخۆ رێک بە پێچەوانەی میدیای قۆرخکار و وابەستەی پارتییەکان و
رێکخراوە سێبەر و دەستەگەرییەکان و رێکخراوە بە ناو یارمەتییبەخش و
سیخووڕییەکانی وڵاتان لە کوردستان.. بێجگە لەوەی لەسەر بنچینەی تێکۆشان
لە پێناو ماف و ئازادییە پێشێلکراوەکانی خەڵکی کوردستان و مرۆڤایەتی بە
گشتیی بەرپرسیاریەتی پەخشکردنی فەرهەنگەکی پێشکەوتنخوازانە و
مرۆڤپەروەرانەی گرتە ئەستۆ.. دەرفەتەکی لەبار و گونجاویشی خستەبەردەم
ئەو نووسەر و رۆژنامەنووس و هونەرمەندانە کە لە نێو میدیای
نائازاد و
باوی ئەو سەردەم جێیان نەدەبۆوە و نەیاندەتوانی ئازادانە گوزارشت لە
خۆیان بکەن و راستییەکان دەرببڕن، ئەوەبوو لە ١٥\٨\١٩٩٤
یەکەمین ژمارەی خۆی پێشکەش بەو خوێنەرانە کرد کە خوازیاری ئازادیی و
یەکسانیی بوون.
هەرچەندە درێژەپێدانی ئەو رەچەشکاندن و بوێرییەی ''ئەمڕۆ'' رووبەڕووی
کۆمەڵە ئاڵنگاریی و سەرکوتگەرییەکی زۆر بۆوە لە لایەن پارتییەکان و
توندڕەوە دینییەکان و دەسەڵاتداران ئەوە سەرەڕای رێگرییەکانی
دابونەریتە باوەکان و نێرسالاریی و فەرهەنگی پاشماوەی دەربەگایەتی و
سەرهەڵدانی سیستەمی تازەی جیهانی سەرمایەداریی و لێبرالیزمە نوێیە
چەوسێنەر و داگیرکارییەکەی.. لێ هەر دەستبەرداری رەوت و ئامانجەکانی
خۆی نەبوو و ئیدی کۆمەڵەک کۆشش و جوولەی دیکەی لە لایەن نووسەران و
رۆژنامەنووسە ئازادییخوازەکان و کەسانی فەرهەنگیی و رامیاریی کە سەر بە
بەرەی گەل بوون بەدوودا هات.. هەر لەو نێوەشدا ئامانجگەلێکی زۆر
وەدیهاتن و تا دێ پانتایی ئازادیی رۆژنامەگەرییش هەر بەرفرەتر و
بەرفرەتر دەبێتەوە.
ئەوەی زۆر گرنگە و دەمانەوێ لێرە بیخەینەڕوو هەرگیز ئەوە نییە کە بێژین
'لەبەرئەوەی ئەو تێکۆشانە رۆژنامەگەریی و فەرهەنگییە بە دەستپێشخەریی
رۆژنامەکەی ئێمە بە ئەنجام گەیشت و جێکەوتە بوو.. ئیدی تاپۆی رەشی
رۆژنامەگەریی ئازاد و سەربەخۆ ها لە گیرفانی ئێمەیە'! هەروەک ئەوەی کە
هەندێک رۆژنامە و ماڵپەڕی چرووک کە لە نێو ململانێی نێوخۆی پارتییەکان
و دەسەڵاتداران و دەستە و گرۆیە بەرژەوەندخوازەکان دروستبوون و
هەموویان لە ماوەی ٥ تا ١٠
ساڵی پاش دەستبەکاربوونی ''ئەمڕۆ'' لە پڕێک و بە توانای مادیی و
پشتگیریی رامیاریی و بازرگانانی میدیا وەک قارچک لە زەوی هەڵتۆقین و
ناوێکی بێ نێوەرۆکیان پەیداکرد.. هەر یەکەو لە لای خۆیانەوە وڕێنە و
بانگەشەی ئەوە دەکەن کە ئەوان یەکەمین رۆژنامە و میدیای ئازاد و
سەربەخۆن! بەڵکە ئەوەیە کە دەمانەوێ لەگەڵ داگیرساندنی (٣١)ەمین چرای
تەمەنی ئەمڕۆ جەخت لەوە بکەینەوە کە ئێستا میدیای کوردی بە جۆرێکی دیکە
لە لایەن حیزبەکان و دەسەڵاتداران و دەستە و گرۆیە بەرژەوەندخوازەکان
قۆرخکراوە.. ئەویش ئەوەیە کە هەم لە رێی توانستی بێ ئەژماری مادیی کە
لە قووتی میللەت دەیقاچێننەوە هەمیشە دەزگەی میدیایی زەبەلاح و
زەبەلاحتر دروستدەکەن و هاوکاتیش هەر لە رێی مادە و یاسایە
پلاستیکییەکانیان گچکەترین دەنگی ئازاد و پانتاییەکانی دەربڕین سەرکوت
و پەراوێز دەخەن.. هەم لە رێی زانست و تەکنیکی سەردەم و پێشکەوتووی
میدیا کە بە پاڵپشتیی لیبرالیزمی نوێی جیهان و لە نێو زەمینەی قەیرانە
گەورە ئابووریی و رامیارییە جیهانییەکەی ئێستا و بە خشتی کۆنەپەرستیی و
هەڵگەڕانەوە لە دەستکەوتە مرۆییەکان بە تایبەت لە پێناو خولیا و سروشتە
سەرکوتگەرییەکی ئەوان دڕێژراون تۆڕە کۆمەڵایەتییەکانی میدیاشیان داگیر
و قۆرخ کردوە، لەبەرهەندێ پێویستە ئێستاش تا ئەو کاتەی میدیا هیچ جۆرە
گوشارێکی ئازادیی دەربڕینی لەسەر نامێنێ و تێکڕای مرۆڤەکان دەتوانن
بەوپەڕی ئازادیی چ وەک تاک چ بە کۆمەڵ تێڕوانینەکانیان و هەبوونی خۆیان
وەک خۆیان دەرببڕن.. درێژە بەو کاروانەی خۆمان بدەین.
هەر گەشاوە بێ چرای تەمەنی ئەمڕۆ و هەر دەنگێکی ئازاد و یەکسان!
ئەمڕۆ - ١٥ی ئابی
٢٠٢٤
emrro@emrro.com
www.emrro.com
|
