٢٦\٨\٢٠١٠

گلەییەک لە ئاشتى هەورامی:

دارا دوو دارى دى ، من نەوتى قاچاغم نەدى!

هیوا رەش   

لەم چەند ڕۆژەى ڕابردوودا - ئاشتى هەورامى - وەزیرى سامانە سروشتییەکانى حکومەتى هەرێمى کوردستان لە ژێر پەردەى ڕوونکردنەوە بۆ پینە و پەڕۆ کردنى داهاتى ئەو هەموو نەوتەى کەس نازانێت چى لێ دێت خەریکى وانە وتنەوە بوو ؟ ! دەکرێت بڵێین داهاتى نەوت پیرۆزى ئاشتى و سەرۆکەکانى دائیرەکەى بێت ، پارەى ئاو و کارەبا قوربانى حزب بێت ! داهاتى وەزارەتى ته‌ندروستیش چشى لێ بێت ، قیروسیاش لە دەسکەوتى پۆلیسى هاتوچۆ ، عەیبە هەر باسى سەرانە و باج و خەراج و گومرک و تاپۆ ناکەم ، شارەوانییەکان داهاتیان بۆ جادە پڕ لە تاسە و کەند و لەند و گەڕەکە بێ خزمەتگوزارییەکان بێت ، فڕۆکەخانەکان فیداى دۆلار گواستنەوە و بنى پێڵاوى گەندەڵەکان بێت ، بەس حکومەتە چاو ( ملەوەن ) ەکەم کە چاوێکیان زەرد و ئەوى تریان سەوزە ، ئاشتى و ئاشتەواییان بۆ بمێنێت و لە چاوى دژە گەندەڵ و شۆڕشوانان بە دوور بێت .

من لە وانەکەى ئاشتى نەگەییشتم ! خۆى وتەنى : (( یان تێناگەین یان نامانەوێ تێبگەین )) ، من هێندە دەزانم و دەفامم ، جگە لەو هەموو داهاتەى ناوخۆى کوردستان ئەو بودجەیەى لە ناوەندەوە دێتە هەرێمەکەمان چۆن و بە چ شێوەیەک و بەسەر کێدا و لە کوێدا دابەش دەکرا ؟ من لە وانەکەى ئاشتى نەگەییشتم ! باسکردنى پاڵاوگەمان بۆچییە و بۆچى لە خۆى ناپرسێت بەرهەمى پاڵاوگە چى لێ دێت و بۆ کوێ دەچێت و چۆن خەرج دەکرێت ؟ من لە ئاشتى دەپرسم دواى ئەو هەموو گەندەڵى و تاڵان و برۆیەى قووتى ماڵ هەژار و منداڵە چاوگەشەکانى میللەتەکەم چەند وەزیرى وەکو خۆى و چەند سەرۆکى وەکو سەرۆکەکانى دەستیان لەکار کێشاوەتەوە ؟ یان ئەوەتا وڵاتەکەمان شامى شەریف و جەننەتولمەئوایە ! من لە ئاشتى دەپرسم داهاتى ئەم وڵاتە سێ شارییەمان چەند ئەوەندەى داهاتى وڵاتە هەژارەکانە و بۆچى تا ئێستا خەڵکى لە ژێر هێڵى هەژارییەوە هەبن ، ئەم هاوکێشەیە چۆن حەل دەکات ؟ تۆ بڵێى وا نەزانێت هەموو کەس وەکو ئەو ژیانێکى پادشاهییان بۆ مەیسەرە ؟

ئاشتى هەورامى ئەمەى هێنایەوە یادم کە ئەڵێن :

ڕۆژێکیان زەلامێک مریشکێک ئەدزێت و لە پەلە پەلا ئەیکاتە باخەڵیەوە و کلکى مریشکەکە هەر بە دەرەوە ئەبێت، خاوەنى مریشکەکە ئەگاتە سەرى و پێى ئەڵى:
ئەوە چى ئەکەیت لێرە ؟
دزەکە ئەڵێت : وەڵا هیچ .
خاوەن مریشکەکە ئەڵێت : ئەى چۆن ؟ کوا مریشکەکەم ؟
دزەکە ئەڵێ : بەخوا نازانم .
خاوەن دزەکە ئەڵێ : سەرم سوڕماوە ، نازانم بڕوا بە خواکەى تۆ بکەم یان کلکى مریشکەکەم ؟

ئێمەش شاشەى تەلەفزیۆنەکان سەریان لێ تێک داوین ، لە لایەکەوە تۆ وانەى پاڵاوگەمان پێ ئەڵێیت و بە قاچاغ بردنى نەوت ڕەت ئەکەیتەوە و ئیدیعاى دەست لە کار کێشانەوە ئەکەیت ، لە لایەکى تریشەوە شەوانە لە شاشەى تەلەفزیۆنەکانەوە شەوانە دەیان تەنکەرى نەوتى قاچاغ و تاڵان کردنى سامانە سرووشتییەکانى نیشتمانەکەم میوانى دیدەمانە ! پێمان ناڵێى بڕوا بە کامتان بهێنین ؟ من هێندە دەتوانم بڕوات پێ بکەم سوێند بخۆى کە : (( تەنکەرە نەوتى قاچاغت بە دوو چاوى خۆت نەدى ! )) ، ئەوسا سەرمان پیرۆزى کڵاوەکانى دەستى جەنابت و چاومان شایستەى خۆڵەکەى مستى تۆ بێت .
 

ماڵپه‌ڕی هیوا ره‌ش