١٤\١١\٢٠١٣

داوای ئازادکردنی دەستبەسەرکراوانی خۆپیشاندانەکەی هەولێر دەکەین.

دوای ئەوەی کاتژمێر ..:١٤ ڕۆژی هەینی ٢٠١٣/١١/٨ بە مەبەستی شەرمەزارکردنی سیاسەتی لەسێدارەدان کە ڕژێمی کۆماری ئیسلامی ئێران لەدژی زیندانیانی سیاسی کورد پەیڕەوی دەکا ، ڕێپێوانێکی جەماوەری لەپاڕکی شانەدەر بەبەشداری سەدان کەس ئەنجامدرا ، دوای تەواوبوونی ڕێپێوانەکە لە پاڕکی شانەدەر ، لە ڕاگەیاندنەکان هەواڵی بەردبارانکردنی قونسولگەری ئێران لەشاری هەولێر بڵاوکرایەوە ، بەو هۆیەوە (٨) کەس لە لایەن پۆلیسی هەولێر دەستبەسەرکران کە ناوەکانیان بەمشێوەیە : مستەفا شێخە، رامان پیرۆتی، چیا مەلاک، پیشەوا عەلی پوور، عەلی ئیسماعیل نەژاد، محەمەد فەرهاد زادە، ئامانجی سەڵەواتی ‌و فازڵ محەمەدی.

لەسێدارەدانی زیندانیانی سیاسی بەگشتی و زیندانیانی سیاسی کورد بەتایبەتی لەلایەن کۆماری ئیسلامی ئێرانەوە ، دەبێتە هۆی کاردانەوە و جوڵاندنی شەقامی کوردی ، ویژدانی کوردان لەهەرچواربەشی کوردستان و لەهەندەران دەهەژێنێ، کوردان تووڕە دەکات، لەو چوارچێوەیەدا کاری نەخوازراو وەکو ئەنجام ڕوودەدات لەوانەش هێرشکردنە سەر قونسولگەری و باڵوێزخانە، هەرچەندە لەڕووی یاسایی بەردبارانکردنی قوسوڵگەری و باڵوێزخانە لەهەموو جیهان بەسەرپێچی نایاسایی هەژماردەکرێت ، بەڵام ئەو سەرپێچیکردنە گەورەتر نیە لەتاوانی جێبەجێکردنی لەسێدارەدانی زیندانیانی سیاسی کە ڕژێمی ئێران (٣٤) ساڵە ئەنجامی دەدا.

فیدراسیۆنی زیندانیانی سیاسی کوردستان و ڕێکخراوی نەهەێشتنی ئەشکەنجە و لەسێدارەدان (ئۆڕتە)، داوا لەلایەنی پەیوەندیدار لەحکومەتی هەرێمی کوردستان دەکات ئەو هەشت کەسەی کە لە سەرەوە ئاماژە بەناوەکانیانکراوە ئازاد بکات و لەهەمانکاتدا داوا لەسەرجەم ڕێکخراوە مەدەنیەکان دەکات لەکوردستان و لەهەندەران لەکاتی ئەنجامدانی چالاکی مەدەنی سەرپێچی یاسایی نەکەن.

فیدراسیۆنی زیندانیانی سیاسی کوردستان
رێکخراوی ئۆڕتە
١٢\١١\٢٠١٣