٢٨\٧\٢٠١٢

 دایک و رۆڵە.

     ماکسیم گۆرکی                                                                                                           و: ئازاد نەجم

دەکرێ سەبارەت بەدایکان تا هەتایە چیرۆکی بێکۆتایی بگێڕینەوە./چەند هەفتەیەک بو هێزەکانی دوژمن شاریان گەمارۆ دابو ، غەرقی نێو ئاسن و پۆڵا بون. شەوانە ئاگریان دەکردەوە. دەتگوت ئاگرەکە ، لەنێو ئەو تاریکیەدا بەچاوانی سوری بێشومارەوە لەشورای شارەکە دەڕوانێ. بڵێسەی حەزکردن بە تاوان و بەدکاری لەو چاوە سورانەدا دەخوێندرانەوە. پریشکی شادیان لێ هەڵدەستا و ئەو نیگا پڕ لەسوکایەتیە ، لەشارێکی گەمارۆدراودا ، بیرکردنەوەی تاریکیی لەگەڵ خۆیدا دەهێنا.

خەڵکی شارەکە ، لەسەر شوراکانەوە دەیانبینی چۆن دوژمن وردە وردە ئەڵقەی گەمارۆکە چڕتر و بەهێزتر دەکات. سێبەرەکانیان بەتەنیشت ئاگرەکانیانەوە نەدەبینران ، حیلەی ئەسپە سندم کراوەکانیان ، دەبیسترا. چرکە چرکی شمشێر و قاقای پێکەنینیان دەگەیشتە بەرگوێیان. دەنگی شادمانیی چڕینی گۆرانیی کەسانێک کە باوەڕ و متمانەی تەواویان بەسەرکەوتن هەبو - دەبیسترا.

دەبێ شتێک هەبێ لە دەنگی پێکەنین و شادی دوژمن ناخۆشتر و هەژێنەر تر بێت؟
دوژمنەکان ، هەرچی ئەو ڕوبار و سەرچاوە ئاویانەی کەدەهاتنە نێو شارەوە ، پڕیان کردبون لەتەرمی کوژراوان.
تەواوی رەزە مێوەکانی دەوروبەری شارەکەیان سوتاند و کێڵگەکانیان وێران کردن و باخچەکانیان لەبنەوە بڕینەوە.
شار ، لەهەمو لایەکەوە کراوە و بێ پاریزگاریی بوو ، زۆربەی ڕۆژەکان تۆپ و (شمخاڵ*) ، چەشنی باران بەسەر شاردا دەبارین. دەستەی سەربازە برسیەکان ، کەبەهۆی شەڕەوە بڕستیان لێبڕابو ، بەڕوخسارێکی شەکەت و ماندوەوە ، بەنێو کۆڵانە باریکەکانی شاردا دەگەڕان. دەنگی ناڵە ناڵی برینداران و وڕێنە و نزا و پاڕانەوەی ژنان و گریانی منداڵان ، لەپەنجەرەکانەوە دەبیسترا. هەمویان بەسرتە و بەترسەوە قسەیان دەکرد و لەکاتی گفتوگۆدا قسەکانیان بەیەکتر دەبڕِی و بەوردی گوێیان دەگرت ، ئایا دوژمن دەستی بەپەلاماردان کردوە؟
بەتایبەتی لەشەوی یەکەمەوە ، ژیان لەنێو شاردا ، تادەهات تاڵتر دەبو.

ئەوکاتانەی کە سایە و تارماییەکان ، لە ناوەڕاستی دۆڵەکانی کێوە دورەکەوە دەهاتنە دەرێ و ئۆردوی دوژمنیان زیاتر و پتەوتر دەکرد و بەرەو شورا نیمچە ڕوخاوەکانی شار دەهاتنە پێش ، نیوە مانگ ، بەئاسمانەوە ، چەشنی قەڵغانێک کە لەمەیدانی شەڕدا کەوتبێ و بەزەبری شمشێرێک دولەت بوبێ ، بەسەر ئاسمانی لوتکەی تیژی چیاکانەوە دەبینرا. لەو بێدەنگی و تاریکیەدا ، دەنگی شیوەن و ناڵە باشتر دەبیسترا.
خەڵکانێک کە بەهۆی ڕەنج و برسێتیەوە بڕستیان لەبەردا نەمابوو و چاوەڕوانی هیچ جۆرە کۆمەک و یارمەتیەکیان نەدەکرد ، ڕۆژ بە ڕۆژ نائومێدتر دەبون و بەترسەوە دەیانڕوانیە گەروی تاریک و ڕەشی دۆڵەکان و لوتکەی تیژ و سەختی چیاکان و ئۆردوی پڕ لەهاتوهاواری سوپای دوژمن.
هەمو ئەمانە ، دیمەنی مەرگیان لەبەرامبەر چاوی ئەواندا وێنا دەکرد. هیچ ئەستێرەیەکی ئومێد لەئاسمانی ئەواندا نەدەدرەوشایەوە.
دەترسان چرا لەنێو ماڵەکانیاندا داگیرسێنن. تاریکیەکی تۆقێنەر ، فەرمانڕەوایی بەسەر شەقام و کۆڵانەکانی شاردا دەکرد.

لەو تاریکیەدا ، ژنێک ، بێدەنگ ، کەسەرتاپای خۆی لەباڵاپۆشێکی ڕەشەوە پێچابو ، چەشنی ماسیەک بەنێو قوڵایی دەریاچەیەکدا مەلە بکات ، بەنیۆ کۆڵانەکانی شاردا تێدەپەڕی.
خەڵکی شار کاتێ ئەویان دەبینی ، لەیەکتریان دەپرسی: ئەوە؟
: خۆیەتی!
پاشان لەنێو کۆڵانەکاندا ون دەبون. بەبێدەنگی و بەسەرداخستنەوە بەتەنیشتیدا تێدەپەڕین. فەرماندەکانی دەستە ئێشکچیەکان و پاسەوانەکانیش ، بەڕقەوە وریایان دەکردەوە: خاتو ماریانا ، چیە! دیسان هاتیەوە نێو کۆڵانان؟ وریای خۆتبە! لەوانەیە بتکوژن! دواتر کەسیش تاوانبارەکەی پێ نادۆزرێتەوە ...
ژنە ، قەدی ڕاست دەکردەوە ، ئارام ڕادەوەستا ، هەتا دەستەی ئێشکچیەکان بەتەنیشتیدا تێدەپەڕین. جەسارەتیان نەدەکرد ، یان حەزیان نەدەکرد دەست لەئاستیدا بەرز بکەنەوە.

پیاوە چەکدارەکان ، خۆیان لێ دور دەگرت و چەشنی کەسێکی مردوو ، حەزیان نەدەکرد لێی نزیک بنەوە.
ئەویش لەو تاریکیەدا دەمایەوە و دیسان جارێکی تر ، تەنیا و ئارام ، دەکەوتەوە ڕێ.
تاریک و لاڵ ، چەشنی تابلۆی بەدبەختی و نەهامەتیەکانی شار ، لەکۆڵانێکەوە دەچوە کۆڵانێکی تر. لەهەر چواردەوریدا دەنگی شیوەن و ناڵە و نزا و پاڕٍانەوە و گفتوگۆی خەمناکی سەربازانێک کە بەتەواوی نائومێد ببون ، چاودێریان دەکرد و دەچوە هەرشوێنێک بەشوێنیەوە بون.
ئەو ژنە کەهەم دایک بو هەم هاوڵاتیەکی ئەو وڵاتە ، خەفەتی لە ڕۆڵەکەی و وڵاتەکەی دەخوارد ، ڕۆڵەیەکی جوان و بزێو ، بەڵام بێبەزەیانە لەڕیزی سوپایەکدا بو کەئابڵوقەی شاریان دابو و دەیانەویست وێرانی بکەن.

تا ماوەیەک لەوەپێش ، دایکە بەشانازیەوە لە کوڕەکەی دەڕوانی ، بە دیاریەکی بەنرخی دەزانی بۆ وڵاتەکەی ، بەهێزی چاکەی دەزانی بۆ کۆمەکی هاوشاریەکانی. ئەو شارە هێلانەیەک بو ، کە هەم خۆی تێیدا چاوی کردبۆوە ، هەم ڕۆڵەکەشی تێدا پەروەردە کردبو. سەدان هەودای ون ، دڵی ئەو دایکەیان بە بەردە کۆنەکانەوە ، کە باپیرانی خانویان پێ دروست کردبو و بناغەی شاریان لەسەر دامەزراندبو و بەو زەویەوەی کە ئێسک و پروسکی باپیران و هاوخوێنەکانیان ، بەئەفسانە و ئامانج و ئومێدەوە ، تێیدا نوستبون ، دەبەستەوە.

ئیستاش ئەو دڵە ، نزیکترین و خۆشەویستترین کەسەکانی خۆی لەدەست چوبو و وەژان هاتبو. ئەو دڵە ، چەشنی تەرازویەک بو ، کاتێ لەنێویدا سۆزی خۆی بۆ ڕۆڵەکەی و ئەو شارەی کەتێیدا ژیاوە ، هەڵدەسەنگاند ، نەیدەزانی تێبگا لەوەی ئاخۆ تای تەرازوەکە بەکام لایاندا لاسەنگە؟
بەم شێوەیە شەوانە بەکۆڵانەکانی شاردا دەگەڕا و کاتێ توشی چەند کەسێک دەبو کە نەیانناسیبا ، دەترسان و ئەو تارماییە ڕەشەیان بە دێوەزمەی مەرگێک دەزانی ، کە ئیدی لەهەموان نزیک ببۆوە. ئەگەر هاتباو ناسیباشیان بەخێرایی لەو دایکە خائینە دور دەکەوتنەوە.
شەوێکیان ، لەنزیک شورای شارەکە ، لەسوچێکی تەریک و تاریکی شاردا ، دایکە لەگەڵ ژنێکی تر بەرەوڕو بۆوە. ئەو ژنە ، بێ جوڵە ، وەک ئەوەی بەشێک بێت لەزەویەکە ، لەبەرامبەر تەرمێکدا چۆکی دادابو ، نیگای خەمناکی بڕیبوە ئەستێرەکان و دەپاڕایەوە.

پاسەوانەکان ، لەسەر شورای شارەوە ، بەچرپە چرپ ، سەرگەرمی قسەکردن بون لەنێو خۆیاندا. دەنگی چەکەکانیان بەدیوارەکە دەکەوت ، دەهاتە بەرگوێ.
دایکە خائینەکە پرسی: مێردتە؟
: نا.
: براتە؟
: کوڕمە. مێردەکەم سێزدە ڕۆژ لەمەوبەر و ئەمڕۆش ئەم کوڕەم کوژرا.
پاشان دایکی کوژراوەکە هەستاو بەڕازی بونەوە ، گوتی: عەزرای پیرۆز بۆخۆی هەمو شتێک دەزانێ و دەبینێ ، زۆر سوپاسی دەکەم.
: لەبەرچی؟
ژنەش وەڵامی دایەوە: ئەو لەشەڕی بەرگریکردن لەنیشتیماندا کوژراوە. دەتوانم بەوپەڕی ئاسودەییەوە بڵێم: ئەو ، ترسی لەدڵی مندا دروست دەکرد ، زۆر گوێی بەشتەکان نەدەدا ، زۆرحەزی لەژیانی شاد و بێ کێشە بو ، دەترسام ئەویش وەک کوڕەکەی (ماریاننا) ، خیانەت لەشارەکەمان بکا و ببێتە دوژمنی خەڵک و خودا ، نەفرەت لەو و لەو منداڵدانەش کە ئەوی هێنایە بون و پەروەردەی کرد!...
ماریاننا ، ڕوخساری خۆی داپۆشی و دورکەوتەوە.
ڕۆژی دواتر ، چوە لای بەرگریکارانی شورای شار و گوتی: بەهۆی ئەوەی کە کوڕەکەم چۆتە نێو باوەشی دوژمن و لەدژی ئێوە شەڕدەکا ، یان بمکوژن ، یان ڕێگام بدەنێ منیش بچمە لای ئەو...
ئەوان وەڵامیان دایەوە: تۆ مرۆڤی و دەبێ نیشتیمانەکەی خۆت خۆشبوێ ، کوڕەکەشت وەک چۆن دوژمنی هەریەک لەئێمەیە ، دوژمنی تۆشە.
: من دایکم! من ئەوم خۆشدەوێ و لەڕوی پەروەردە کردنیەوە ، خۆم بەکەمتەرخەم دەزانم.
دواتر ئێشکچیەکان لەنێو خۆیاندا کەوتنە پرس و ڕاوێژ ، سەرەنجام گەیشتنە ئەنجامێک و گوتیان: شەرەفمان ڕێگەی ئەوەمان ناداتێ بەهۆی خیانەتی کوِرەکەتەوە تۆ بکوژین. ئێمە لەوە دڵنیاین کە تۆ نەبویتە هاندەر و ڕێنشاندەری ئەو بۆ کردەوەیەکی لەوچەشنە و تەنانەت ئاگادریشین کە خەم وخەفەتێکی زۆری پێوە دەخۆی. شار ئەگەر تۆشی تێدا نەبیت ، درێژە بە بەرگری کردنی خۆی دەدات. کوڕەکەت هەرگیز بیر لەتۆ ناکاتەوە ، لەوانەیە ئەو ئەهریمەنە تۆی هەر لەبیرچوبێتەوە! ئەگەر تۆ لەو باوەڕەدای کەشایستەی سزایت! ئەوا ئەو سزایە بەسە. پێمانوایە سزایەکی لەم چەشنە تەنانەت لەسزای مەرگیش قورسترە!
دایکە گوتی: بەڵێ ، ئەمە قورسترین سزایە!

پاشان دەرگاکەیان بۆکردەوە و ژنەش لەشار چوەدەرێ .
ئێشکچیەکان ، ماوەیەکی زۆر لەسەر شوراکەوە ڕوانیانە دایکەکە ، کەچۆن بەسەر زەوی نیشتیمانەکەیدا ، کەبەخوێنی ڕۆڵەکانی تێراو ببو ، دەچوە پێش. بەشێوەیەک هەنگاوی دەنان ، قاچەکانی بە زەحمەت لەزەوی جودا دەبونەوە و هەڵی دێنان. چۆن لەبەردەم تەرمی بەرگریکارانی شاردا ، دادەچەمایەوە. چۆن بەڕقەوە ، بەنوکی قاچی ، شەقی لە چەکە شکاوەکان هەڵدەدا.
دایکان ، ڕقێکی زۆریان لەچەک و و هێرش پەلامار و کوشتوکوشتار دەبێتەوە ، تەنیا چەکێکیان بەلاوە پەسندە کە بۆ بەرگری کردن لەژیان ، بەکاربێت.
دەتگوت ، لەژێر لیباسەکانیەوە گۆزەیەکی پڕ لەئاوی شاردۆتەوە و دەترسێ بڕژێت ، تا زیاتر دور دەکەوتەوە ، بچوکتر دەبۆوە. ئەوانەی کە لەسەر دیوارەکەوە سەیریان دەکرد ، پێیان وابو لەگەڵ تارمایی ئەودا خەم و نائومێدی ، یەخەی بەرداون و لەکۆڵیان بۆتەوە و دورکەوتۆتەوە. دیتیان لەنیوەی ڕێگادا ڕاوەستا ، کڵاو و باڵاپۆشەکەی لەخۆی کردەوە و تا ماوەیەکی زۆر لەشار ڕاما.

بەڵام لەوێش ، لەشکری دوژمن ، ئەویان دیتبو کە بەتاقی تەنیا لەو چۆڵەوانیەدا ڕاوەستاوە ، بۆیە چەند تارماییەکی ڕەشی وەک خۆی ، بەهێواشی و بەوریاییەوە لێی نزیک بونەوە و تێیانخوڕی: تۆ کێی؟ دەچیە کوێ؟
ژنە گوتی: سەرکردەکەتان کوڕی منە.
دوای ئەم قسەیە ، هیچ کام لەسەربازەکان ، شک و گومانیان لەڕاستی قسەکانی نەکرد. شان بەشانی وی ، کەوتنەڕێ ، بەدەم ڕێگاوە کەوتنە پیاهەڵدان و ستایش کردنی لێهاتویی و ئازایەتی کوڕەکەی.
دایکەش بەغرور و لەخۆڕازیبونەوە ، سەری بەرز کرد و گوێی بۆ قسەکانیان شل کرد و سەرسوڕمانی پێوە بەدی نەدەکرا.
دەبو کوڕی وی بەو شێوەیە با!!!

سەرەنجام ، لەبەرامبەر کەسێکدا ڕاوەستا کە مانگێک بەر لەدایک بون ئەوی نەدەناسی ، لەبەرامبەر بونەوەرێکدا ڕاوەستا ، کە هەرگیز هەستی نەدەکرد پارچەیەکی جیا بێت لەجگەری.
ئەو لەبەرامبەریدا ، خۆی لەنێو مەخمەل و ئاوریشماندا ون کردبو ، چەک و کەرەستە جەنگیەکانیشی لەبەردی گرانبەها دروستکرابون ، هەمو شتێک ، وەک ئەوەبو کەدەبوایا ببێ. دایکە ، لەخەونیدا ئەوی بەو دەوڵەمەندی و ناوداریەوە دیتبو.
دەستەکانی دایکی ماچ کرد و گوتی: دایە! تۆ هاتیتە لای من! دڵنیام هەستت بە کۆتایی بڕیارەکەم کردوە! سبەی ، نیازی ئەوەم هەیە دەست بەسەر ئەم شارە نەفرەت لێکراوەدا بگرم!

دایکی بەبیری هێنایەوە: ئەو شارەی تێیدا لەدایک بویت؟
لاوەکە کە سەرمەست و شەیدای وەدەستهێنانی ناو و ناوبانگی زیاتر بو ، بە تین و تاوێکی جەسورانەی گەنجانەوە ، گوتی: من لەدونیادا بۆ دونیا هاتومەتە بون ، بۆئەوەی تێکی هەڵشێوینم ، من تەنیا لەبەر خاتری تۆ دەستم لەم شارە دەپاراست و بەزەیم پێدا دەهاتەوە ، ئەم شارە چەشنی دڕکێک چەقیوەتە قاچمەوە و بۆتە بەربەست لەبەردەم ئەوەی بەزویی بگەمە ناوبانگ و سەرفرازی. بەڵام ئێستا ، لەسبەی زوتر نیە دار و پەردوی ئەم هێلانە سەرکەشە بەسەر یەکدا دەڕوخێنم.
دایکە گوتی: ئەو هێلانەیەی کە تەنانەت بەردەکانیشی ئاشنای سەردەمی منداڵیتن؟
: مادام مرۆڤ نەتوانێ بەردەکان وەقسە بهێنێ ، کەواتە لاڵن. وازم لێبێنە با کێو و چیاکان سەبارەت بەمن دەم هەڵبێننەوە و لەبارەی منەوە بدوێن ، من ئەوەم دەوێ!.

دایکە پرسی: ئەی خەڵکەکە؟
: ئەها! بەڵێ ، من ئەوانم لەبیرە. دایە! ئەوان بۆمن پێویستن ، چونکە کەسانی قارەمان و دلێر ، لەیادەوەری ئەواندا بە نەمری دەمێننەوە!
دایکە گوتی: قارەمان ئەو کەسەیە بەپێچەوانەی مەرگەوە ، ژیان بنیات دەنێ. قارەمان ئەو کەسەیە بەسەر مەرگدا زاڵ دەبێ ...
ئەویش وەڵامی دایەوە: نا! وێرانکەرەکانیش بە ئەندازەی بنیاتنەرەکان ناو و ناوبانگیان هەیە ، بڕوانە تا ئێستا ئێمە نازانین کە شاری ڕۆما (ڕۆمێرلۆس) دروستی کردوە یان کەسێکی تر! بەڵام ناوی (ئالاریخ ) و تەواوی قارەمانەکانی تر کە ئەوشارەیان کاول کرد ، هەمویان بەڕونی زانراون ...
دایکە ، جارێکی تر وەبیری هێنایەوە: هەمان ئەو شارەی کە نەمرە و هەمان ئەو دلێرانەی کە شوێنەواریشیان دیار نیە؟

بەم شێوەیە ، تا بەربەیان ، لەگەڵ دایکیدا قسەی کرد. دایکە بەدەگمەن قسە شێتانەکانی پێ دەبڕی و سەری بەرز و بەعیزەتی ، تا دەهات زیاتر شۆڕ دەبو.
دایک بنیات دەنێ و گیانی خۆی دەبەخشێ ، دایک پاسەوانە و ئێشک دەگرێ ، گفتوگۆی نەشیاو و ناپەسند ، لەبەرامبەر دایکدا ، دەچێتە خانەی دژایەتی کردنەوە.

بەڵام گەنجەکە درکی بەمە نەدەکرد.
دایک هەمیشە دژی مەرگە ، دایک هەمیشە ڕقی لەو دەستانە دەبێتەوە کە مەرگ دەچێنن و پەلامار دەبەنە سەر ماڵی خەڵک. دایک لەوجۆرە کردەوانە هەراسانە. بەڵام کوڕەکەی ، ئەم شتانەی نەدەبیست و نەدەبینی ، تیشک و گڕی سارد وسڕی ناو و ناوبانگ ، چاوەکانی کوێر کردبو.
هەروەها تێنەدەگەیشت لەوەی کاتێ دایکێک ژیانێک دێنێتە بون و دەیپارێزێ ، بۆی هەیە پیلانی بۆ داڕێژێ و مەترسی بۆَ دروست بکا. دڕندەیەکی بەهێز و بێبەزەیی و بێباک بو ...

دایکەکە بەخەفەتباریەوەدانیشتبو ، لەپەردەی کراوەی خێوەتەکەی سەرکردەوە ، شارێکی دەبینی کەتیایدا بۆ یەکەم جار جوڵەی شیرن و چێژبەخشی کۆرپەڵەی لەزگیدا هەستپێکرد و ئازار و ئەشکەنجەی لەدایکبونی ئەم ڕۆڵەیەی چێشت ، کە ئێستا دەیویست بێبەزەییانە ئاگری تێبەردا و بیسوتێنێ.
تیشکی سوری خۆرەتاو ، بەسەر بورج و شورای شارەوە تروسکەی دەدا. شوشەی پەنجەرەکان بریسکەیەکی شومیان هەبو ، دەتگوت تەواوی دانیشتوانی شار بریندارن و ژەکی سوری ژیان ، لەسەدان برینی شارەوە هەڵدەچۆڕێ. کات تێدەپەڕی و شاریش وردە وردە ، تاریک دادەهات. دەتگوت تەرمێکی بەجێماوە ، ئەستێرەکان بەسەریەوە دەرکەوتون و چەشنی چەند مۆمێک بەدیاریەوە دەدرەوشێنەوە.

نیگای دایکە ، تا نێو ئەو خانوە تاریکانە بڕی دەکرد کەخەڵکەکەی دەترسان لەوەی چرای تێدا داگیرسێنن ، نەبادا سەرنجی دوژمن ڕاکێشێ. نیگاکانی تا ئەوسەری شەقامە تاریکەکان بڕی دەکرد کەبۆنی لاشەکان هەوای شاریان ژەهراوی کردبو ، دەنگی ناڕەزایی کپی خەڵکانێک کە چاوەڕوانی مەرگیان دەکرد ، دەبیسترا.
ئەو، هەمو کەسێک و هەمو شتێکی دەبینی.
تەواوی ئەو شتانەی کە بەلای ئەوەوە ئاشنا و ناسیاو بون ، لێی نزیکتر ببونەوە. دەتگوت لەبەرامبەریدان و بێدەنگ چاوەڕوانی بڕیاری ئەون. دایکە وایدەزانی کە دایکی تەواوی خەڵک و دایکی شارەکەی خۆشیەتی.

لەقوللەی کێوە ڕەشەکانەوە ، چەند پەڵە هەورێک ، لەشێوەی چەند ئەسپێکی باڵدار بەرەوە زەوی دەهاتنە خوار و بەرەو شارە ناچارکراو بە نەهامەتیەکە ، دەفڕین. کورٍِەکەشی دەیگوت: ئەگەر شەو بەئەندازەی پێویست تاریک بێت ، لەوانەیە هەر ئەمشەو بەسەر شاردا بدەم ، کاتێَ خۆر لەچاوی مرۆڤ دەدات ، بینینی تروسکەی چەک بۆ چاو ناخۆشە و مرۆڤ ناتوانێ بەباشی شمشێرەکەی بەکاربێنێ. لەهەل و مەرجێکی لەوشێوەیەشدا مرۆڤ ناتوانێ بەباشی ئامانجەکەی بپێکێ. بەدەم ئەم قسانەوە بەوردی سەیری شمشێَرەکەی دەکرد.

دایکە گوتی: وەرە ئێرە ، سەرت بخەرە سەر سینگم و پشو بدە و بیهێنەرەوە بیرت کە بەمنداڵی چەندە بزێو و زیتەڵە بویت و خەڵکی چەندیان خۆش دەویستی!
لاوەکە بەقسەی دایکی کرد و سەری نایە سەر ڕانی دایکی و ڕاکشا و چاوەکانی لێک نان و گوتی: من تەنیا تۆ و ناوبانگم خۆش دەوێ ، تۆشم لەبەر ئەوە خۆشدەوێ کە کەسێکی وەکو منت هێناوەتە ژیانەوە.

دایکی بەسەریدا نوشتایەوە و گوتی: ئەدی ژنان؟
: ژن زۆرن! مرۆڤ زۆر بەخێرایی ، وەک شتێکی شیرن ، زوو لێیان تێر و بێزار دەبێ.
دایکە ، بۆ دوایین جار لێی پرسی: حەزت لەوە نیە بیتە باوک و ڕۆڵەی خۆت لەباوەش بگری؟
: لەبەرچی؟ بۆ ئەوەی بیان کوژن؟ کەسێکی وەک خۆم بیانکوژێ وگرفتاری خەم و نائاسودەییم بکات؟ ئیدی بەدەم خەم و خەفەتەوە پیر ببم و هێز و توانام لەبەر ببرێ و نەتوانم تۆڵەشیان بستێنمەوە!
دایکە ، ئاهێکی هەڵکێشا و گوتی: تۆ وەک بروسکە جوانی! بەڵام هیچ سودێکت نیە.
کوڕە ، زەردەیەکی کرد و وەڵامی دایەوە: بەڵێ! بەوێنەی بروسکە ...
دواتر چەشنی کۆرپەیەکی ساوا ، لەباوەشی دایکیدا خەوی لێکەوت.

دایکە باڵاپۆشێکی ڕەشی ، بەسەر کوڕەکەیدادا و لەنێویدا بزری کرد. خەنجەرە تیژەکەی هەڵێنا و تاهێَزی تێدابو چەقاندیە سینگی ڕۆڵەکەی. کوڕە - بێ ئەوەی جوڵەیەک بکات - یەکسەر گیانی سپارد. ئاخر دایک باش دەزانێ کە دڵی کوڕەکەی لەکوێدا لێدەدا و ترپە ترپیەتی. دواتر لاشەی بێ گیانی کوڕەکەی هاویشتە بەرپێی پاسەوانە حەپەساوەکانی و پاشان ڕوی کردە شارەکە و گوتی: من وەک مرۆڤێک ، ئەوەی لەتوانامدا بو بۆ نیشتیمانەکەم کردم ، بەڵام وەک دایکێک لەگەڵ کورەکەمدا دەمێنمەوە! ئیدی لەو تەمەنەدا نیم جارێکی تر دڵم بەوە خۆشبێت بتوانم کوڕێکی تر بێنمە دونیاوە ، مانەوەشم لەژیاندا سودی بۆ هیچ کەسێک نابێت.

دوای ئەم قسانە ، هەمان ئەو خەنجەرەی کە هێشتا بەخوێنی کوڕەکەی- واتا خوێنی خۆی - سور و گەرم بو ، چەقاندە سەر دڵی خۆی.
کاتێک دڵ ئازاری هەبێت ، دەکرێ زۆر بەئاسانی بکرێتە ئامانج.
______________________________________
سەرچاوە: داستانهای برگزیدە ماکسیم گورکی / ترجمە افسر سدارت - رزا ازرخشی / نشر جامی.

nagmkaya@yahoo.com