٢٣\٣\٢٠١٢

    دە فیگەر لە نێوان خۆکوشتن و ژیاندا!

ھەژار عوسمان

-١-

ئیشتیھام بە ژیان ناکرێتەوه‌
بە بیرم نایەتەوە کەی بوو
درکم بەوە کرد
سەد ھێندەی توێکڵی لیمۆ تاڵە!!

-٢-
کوشندەیە ئەم وەھمە
عەزابە ئەم جورئەتە
پووچە ژیان
پووچە خۆکوشتن
عەبەسە ئومێد!

-٣-
بێھوودە ئەم عەتری ئومێدە
بە جلەکانمدا دەپرژێنی
بێھوودە لەبیرت کردووە
ئەی دۆست…
بۆنی مردن لە گیرفانەکانتەوە دێ!

-٤-
ئەم خەیاڵەم، ھێواش… ھێواش
بیر لە ساتەوەختی
لە زرمەزرم کەوتنت دەکاتەوە
ئەی دڵ!

-٥-
خۆکوشتن سەگەکانی خۆی
بەرداوەتە قاپی و دیوارەکانم
لێ من، زەھری "ئەو" کوشتن
بۆ سەگەکانی دادەنێم!!

-٦-
جیاوازی چییە؟
تۆ بمکوژی یاخود گوللە
ئەی مەراقم!
جیاوازی چییە؟
تۆ بمکوژی یاخود حەرف
ئەی تەنیاییم!

-٧-
تەمەنێک بەدیار نەھاتنتەوە چاوەڕێ
کزکز دەسوتێ چرای ئومێد
ھێشتاکە خەبەرێ نییە لە "گۆدۆ"!

-٨-
ئازارێک لە سینەمایە
کتومت دەمخاتەوە یادی خۆکوشتنی ئەو کۆترەی
لە حیکایەتێکتدا پرسەت بۆ نەگرت
ئەی شەھرەزاد!

-٩-
سەرت مەنێ بە سەرمەوە
ژیان ھێند رەتاندوومی
دەترسێم رۆژێ تۆش بەرببیتەوە نێو ئەم پەتایە!

-١٠-
مەپرسە…
شیعرم ھیچ نییە،
جگە لە غافڵگیرکردنی خۆکوشتن نەبێ!
 

hajarzabihi@yahoo.com