په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک

٢٣\٧\٢٠١٥

راگەیاندراوی فیدراسیۆن سەبارەت بە کۆچی گەنجان:

دەسەڵاتدارانی کوردستان بەرپرسیارن لە

دابینکردنی ژیان و ئازادیی تەواو بۆ گەنجانی کوردستان!

 


هەواڵەکانی کۆچی گەنجان لە کوردستانەوە بۆ دەرەوە، جارێکی دیکە مانشێتی دەزگاکانی ڕاگەیاندنی کوردستانی گرتەوەو لەبارەی سەرچاوەو هۆکاری سەرهەڵدانەوەی ئەم دیاردەیەوە، لێکدانەوەو بۆچونی جیاوازیان خستەڕوو. بەتایبەتیش میدیاکانی سەربە دەسەڵات و ڕاگەیاندنە سێبەرەکانیان، بەمەبەستی داپۆشێنی کارنامەی دزێوی دەسەڵات وئەو جیاوازیە چینایەتیەی کە لە نێوان خێزانی فەرمانڕەواو زۆرینەی هاولاتیانی کوردستاندا هەیە، ئەم شەپۆلە لەکۆچی گەنجانیان بە"سستبوونی هەستی نەتەوەیی و نیشتمانی لەنیوگەنجان"دا لێکدایەوە. بەڵام ئایا ئەم جۆرە بۆچون ولێکدانەوانە واقعیەتەکانی کۆمەڵگای ژیردەسەڵاتی حزبە قەومی و ئیسلامیەکان، ئەتوانێ پێچەوانە بکاتەوە؟ بەتایبەتی لە جەرگەی ئالوگۆرە سیاسی وکۆمەڵایەتیەکانی ئەم دواییانەی کوردستان و ناوچەکە و بەدوای بیست و چوار ساڵ لە ئەزمونی دەسەڵاتدارێتی حزبە قەومی و ئیسلامیەکان، کە هەزار و یەک بەلا و موسیبەت و کارەساتی ناهەمواریان کردۆتە بەشی ژیانی زۆرینەی خەڵك!


لەڕاستیدا پەنابردن وئاوارەیی و رووکردنە دەرەوەی گەنجانی کوردستان بەرێگای سەخت و پرمەترسی وسپاردنی ژیان بەکەشتی مەرگ، یەکێکیترە لەو موسیبەتانەی کەدەیان تراجیدیای سامناکی لێکەوتۆتەوە، کەبەرپرسی ڕاستەوخۆی پیش هەرشتێکیتر لەئەستۆی دەسەڵاتی میلیشایی کوردستان وحکومەتی حزبە پێکهێنەرەکانیەتی. ئەوە هەر سیاسەت و کارنامەی ئەم حزبانەو دەسەلاتە هاوبەشەکەیانە کە بێمافی و هەلاواردن و هەژاری و بێکاریان کردۆتە بەشی زۆربەی زۆری هاولاتیانی کوردستان وگەنجانیشیان ناچارکردوە تا بەڵیشاو ڕوولە هاندەران بکەن، ئەمە لە کاتێکدایە کەرۆژ ومانگ وسال نیە خەڵکی کوردستان وجیهان ئاگایان لەدەیان تراژیدیای نەخوازراو نەبێت ودڵیان ڕانەچڵەکی بە خنکاندن و تیاچوونی بەکۆمەڵی دەیان پەنابەر لەدەریاکاندا.


زیاتر لەیەک ساڵی رابردوو کۆمەلگای کوردستان بۆتە مەیدانی کیشمەکیشی سیاسی جیهانی و ناوچەیی ودەولەتانی سەرمایەداری ودەستەوتاقمی ئاینی وقەومی وعەشیرەتی ودڕندەترین هیزی کۆنەپەرستی لەوێنەی داعش وجەنگە خویناویەکەی، کە بۆ بەرژەوەندی خۆیان رووبەروی خەڵکیان کردۆتەوە ولەو نیوەشدا بەهەزاران بریندارو کوژراو بوون وسەدان هەزاریتریش ئاوارەو بێ پەناکراون. ئەم دۆخە قورساییەکی دارایی لەسەر ژیان وگوزەرانی خەڵکی کوردستان داناوە، موچە کەسەرچاوەی گوزەرانی خەڵکیە بۆ بەردەوامی ژیان نادرێت، سەدان پرۆژە ڕاگیراوە وسەدان کۆمپانیاش ئوردویەکی گەورەی کرێکاران و کارمەندانیان بێکارکردوە، ئەمە سەرباری گرانی بازارو هەژاری وژیرپینانی داخوزایەکانی خەڵکی کوردستان بۆ ماف وئازادیەکانیان و زیاد لەمانەش ڕاگرتنی خەڵکی کوردستان لە بازنەی کێشمەکێشی خۆیان و حکومەتی ناوەندی و کێشەی ناوخۆییتر لەسەر پرسی دەستور وسەرۆکایەتی کە ئایندەیەکی ڕۆشن بەم زووانە بەدی ناکرێت بۆ کۆتایهینان بەم کێشانە.. هەموو ئەمانە کە لە بنباڵی دەسەڵات و سیاسەتی حزبەکانی نیو پەرلەمان و حکومەتەوە سەریان دەرهێناوە، گەنجانیان بێ ئومێد کردووەو ترس و دلەڕاوکێشی لەنیودلێ زۆرینەی هاولاتیاندا چاندووە. خۆکوژی گەنجان و تووشبوون بەنەخۆشیە دەرونیەکان بەرئەنجامی هەر ئەم دۆخەیە.


ئەم ئۆردووە گەوەرەیە لە گەنجان بۆ ناچارکراون بەهه‌ڵبژاردنی ژیانی پەنابەری؟


ئاشکرایە کە گوشارێکی کۆمەلایەتی هەمەلایەنەو فراوان له‌سه‌ر ژیانی هاولاتیان لەلایەن چینی دەسەلاتدارانەوە ڕووبەرویی خەڵکی کوردستان کراوەتەوە. ئەمڕۆ به‌ هه‌زاران گەنج ولاوی دەرچووی زانکۆکان هەیە چاویان له‌وه‌ بڕیوه‌ به‌رهه‌می ماندووبوونی چه‌ند ساڵه‌یان ببینن و ده‌ستیان له‌ كارێك گیر ببێت تا ژیانیانی پێ دابین بكه‌ن، ئاو و کارەبا و سوتەمەنی کە سەرەتاترین پێداویستی ژیانی ئەم سەردەمەیە، بووە بە ئاواتێکی دورە دەست، سەرباری هەژاری وبێکاری گەنجان تا زانکۆ تەواو دەکەن بە ئۆمیدی ژیان دامەزراندن بەلام وه‌ك هه‌واڵێک لە دامه‌زراندنیان نییه‌، ئه‌سڵه‌ن باسێك له‌ دابینبوونی بیمەی بیکاری بۆیان ناكرێ، هەروەک گەنجێک دەڵێت "خەرجی کارتی مۆبایلەکانیشمان دەبێت بەقەرز وەربگرین"، لەگەڵ ئەوەی هیچ شۆێنێکی ترفیهی و سەرگەرمی، وەرزشگای خۆرایی نیە کە کاتەکانی ژیانی خۆیانی تیا بەسەر بەرن، هەواڵێک لە کۆرسی ڕاهینان وپیشە بۆ گەنجان نیە ، گەر داوای سەرەتایترین مافی خۆشیان بکەن سەرکوت دەکرێن و ئازادی فەردی و مەدەنیەکانیان پێشیل دەکرێت وماف و حورمەتی کەسایەتیان دەخرێتە ژیر پرسیارەوە، که‌چی له‌ولاشه‌وه‌ ژیانی چینی دەسەلاتدار وبنەماڵەی فەرمانرەوا وبەرپرسان و دەستو پێوەندەکانیان، کوردستانی کردۆتە فیرعەونئاوایەک کەبەتەرووشک لێدەخۆن وبەملاولادا بۆ سەرگەرمی خۆیان سەروەت و سامانی کۆمەڵگا پەخشدەکەنەوە. ئەم چینە کە ده‌ستیان به‌سه‌ر سه‌روه‌ت وسامانی کۆمەڵگادا گرتووه تەنها ٥ سەرکردەی کورد ٢٠٠ ملیار دۆلاریان كه‌ڵه‌كه‌ كردووه‌ جگه‌ له‌ موڵكه‌كانیان، کورەکەی مەسعود بەرزانی کۆشکێکی لەئەمریکا بە١٠ ملیۆن دۆلار کریوەو مانگانە ١٥٠ هەزار دۆلار باجی (زه‌ریبه‌) لێدەدات، بەلام ئامادەش نین کار یان بیمەی بیکاری بۆ گەنجان دەستەبەربکەن. هەروەک گەنجێک دەڵیت "هەموو رۆژ دەبێت خەریکی سركیتی محه‌ویله‌ هەڵدانەوەبین ودەسەلاتدارانیش لەبەردەم هەوای پاک وساف وکارەبای ٢٤سەعاتەدا رۆژ دەکەنەوە"وەیان گەنجێکی تر دەڵیت" لە دورەوه‌ دەبێت تەماشای باڵەخانەو ومۆڵ وریستورانت و هۆتیل و سەفەری ولاتان وشۆینی سەرگەرمی بەرپرسەکان بکەین کە دەیان کیلومەتر لە ئێمەوە دووره‌و ژیانێکی شاهانەیان بۆ خۆیان و منالەکانیان دەستبەر کردوە ".. گه‌نجانێك كه‌ به‌به‌رچاویانه‌وه‌ پاره‌ و سه‌روه‌تی كۆمه‌ڵگا لووش ئه‌درێت و ئه‌مانیش جگه‌ له‌ ژیانێكی مه‌رگئاسا، ته‌نانه‌ت كاتێكیش كه‌ ناڕه‌زایه‌تی ده‌رئه‌بڕن به‌ر گوللـه‌ ئه‌درێن، چ ئومێدێكیان به‌ كۆمه‌ڵگای كوردستان هه‌بێت و چ دڵێكیان پێ خۆش بێت؟ مه‌سه‌له‌یه‌ك كه‌ ئه‌توانێت گه‌نجان و خه‌ڵك به‌ گشتی قه‌ناعه‌ت پێ بكات كه‌ جێی نه‌هێڵن، نه‌هێشتنی ئه‌و جیاكاریه‌یه‌.

لاوانی دڵ پر لە هیوا ، ئەوانەی باوەری قوڵیان بە ئایندەیەکی باشتر هه‌یه‌ پێویسته‌ ئه‌و ڕاستیه‌ بزانن كه‌ هەڵسوکەوتی بەکۆمەڵ و کۆبوونەوە لەدەوری ئاسۆیەکی رۆشن و ئینسانی لەسەرکەوتن نزیکمان دەخاتەوە. ئاسۆیه‌ك كه‌ جیاكاری قوڵ و به‌رچاوی نێوان ئێوه‌ و بنه‌ماڵه‌ و داروده‌سته‌ی به‌رپرسان كۆتایی پێ بهێنێ. گەر چی دیدی هەمووان بۆ ژیان وئارەزووکان وەک یەک نیە بەلام ئازادی و خۆشبەختی و خۆشگوزەرانی و ئاسودەیی چەمکی پیرۆزی کەلتوری هەموومانە. ئومید بە گۆرین بە قازانجی هەموو کۆمەڵگای کوردستان دەتوانێت ئامانجی هەموومان بێت. ڕێگا چاره‌ی واقعی و کارساز بۆ ئه‌و دۆخه‌ بریتیه‌ له‌ گۆرینی دۆخی ئیستای کوردستان و له‌ به‌ینبردنی زه‌مینه‌کانی ئه‌و هۆکارانه‌ی پاڵمان پێوە دەنێت ڕێگای هانده‌ران هه‌ڵبژیرن.. ڕێگای خه‌بات و تێکوشان بۆ ئاڵوگۆری بارودۆخی مه‌وجود بخه‌ینه‌ به‌رده‌م لاوان و کۆمه‌ڵگا..جێهیشتن چاره‌ نیه.‌

فیدراسیۆنی سەراسەری پەنابەرانی عێراقی بروای وایە کۆتایهینان بە دیاردەی پەنابەری لە کوردستاندا بەندە بە ده‌رهێنانی له‌م گیژاوه‌ سیاسیەی ئێستا و ئالوگۆرێکی ریشه‌یی له ‌کوردستان وهاتنەسەرکاری دەولەتێکی سکولاری غەیرەقەمی غەیرە دینی کە مافی هاولاتیبوون بۆ خەڵکی کوردستان بەرەسمی بناسێنیت ،کوردستانێک کە خەڵکەکەی خۆیان بریار لەسەر چارەنوس سیاسی وئایندەی خۆیان بدەن ، داهاتی خەڵکی کوردستان خەرجی خۆشگوزەرانی وئاسودەی کۆمەلگا بکریت وماف و سەرجەم ئازادیەکان لەفراوانترین ئاستدا جێگیر بکرێت. ئه‌مه‌ بکرێت به‌ ریگای گه‌یشتن به‌ ژیانێکی ئازادو خۆشگوزه‌ران.


به‌ڵام هاوكاتیش ئێمه‌ وه‌ک ڕێکخراوێکی ڕادیکال و پێشره‌وو‌ داکۆکیکار له‌ مافه‌کانی په‌نابه‌ران به‌ته‌واوی توانامانه‌وه‌ له‌پشتی گەنجانی کوردستان راده‌وه‌ستین تا بە به‌که‌مترین ده‌رده‌سه‌ری مافی په‌نابه‌ری بەدەستبهێنن .‌ هاوکات بەرگری لە ماف و حورمه‌تی لاوان و خه‌ڵکی کوردستان بە ئەرکی خۆمان دەزانین كه‌ به‌هه‌ر هۆیەکەوە‌ ئه‌مرۆ نایانەوێت له‌ کوردستان بمێننه‌وه‌ ...رێگا نادەین ..ببنه‌ زه‌خیره‌ی ده‌ستی ڕاستی کۆمه‌ڵگا ئه‌حزابی کۆنەپەرست وناسیونالستی.. ڕێگاو رێنوینی گونجاو ده‌خه‌ینه‌ به‌رپێتان لە هەرکوێبن و بۆ کۆی بچن دەرگای نۆێنەرانی فیدراسیۆن و هەڵسوراوانی لەهەرجێگایەکی ئەوروپا هەبن ئاواڵەیە کۆمەکتان بکەین تانەکەونه‌ دەست باندی قاچاخچی و ریسک بە ژیانتانەوە بکەن، لە رینوینی یاسای وهاوکاری جێگربوون وپروسەی پەنابەریتاندا پاڵپشتان دەبین و دڵنیاشین ئێمەش لەم هەولانەمانەدا تەنها نیین، رێزێکی بەرین لە ڕێکخراوی داکۆکیکارو ئینسانی لەگەڵماندا ڕاوەستاون. ماوەتەوه‌ بڵێن لە هەر کوێیەک هەن ژمارەتان چەندە لەدەوری یەک کۆبینەوە ڕێکخراو بین لەسەر کێشەو ڕێگا چارەی کیشەکانمان ڕێکخراو بین ئەوە بکەینە ناوکۆکەی خاڵی هاوبەشمان بۆ بەدەستهێنان و بەهرەمەند بوون لە مافو داخوازیەکانمان ..فیدراسیۆن ئه‌رکی خۆی به‌وه‌ داناوه‌ وه‌لام به‌ کێشه‌ی په‌نابه‌ران بداته‌وه‌ و له‌ پاڵه‌ ده‌ستیان بێت و پشتیوانیان بێت.
 

فیدراسیۆنی سەراسەری پەنابەرانی عێراقی
٢٢\٧\٢٠١٥

________________________________________________
IFIR:PO.BOX1575، ILFORD، IG1 3BZ، LONDON
ifir@hotmail.co.uk, 00447856032991, 07895976547

Fax: 08715288651, www.federationifir.com

 


 

 

په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک