٢٠\٦\٢٠٢٠

دەسەڵاتداری برسی و حوكمی مەترسییدار.

ئەرسەلان مەحمود  

كاتێك حكومەت خۆی بووبێتە كێشەو مەترسی لەسەر شكۆی نیشتمان و ژیانی خەڵكەكەی، خەڵك مافی خۆیەتی بەدوای ئەلتەرناتیفدا بگەڕێت، حكومەتێك نەتوانێ‌ تەنانەت مووچەی مووچەخۆرەكانی خۆی بدات، حكومەتێك مۆڕاڵی دابەزیبێتە ئەو ئاستە نزمەی قەرزە ڕەشەكانی بەمووچەی خەڵك بداتەوە، حكومەتێك توانستە عەقلانیەكانی گەیشتبێتنە پێوەرێك بەناوی چاكسازییەوە دەستبخاتە قوڕگ و قوتی خەڵكییەوە، شكۆی هێندە شكاوبێ‌ نەتوانێ‌ سەروەری خاك بپارێزێ‌ و نەكارێ‌ شتێک بخاتە سەر هەبوونی خەڵك، شوورەیی و شەرمەزارییەكی گەورەیە لە بەرامبەردا دەنگە ئازا و ئازاد و ناڕازییەكان، بە جاشی هەرێمایەتی و ناوەندچیێتی و بێباكییەت تۆمەتبار بكات.

حكومەتی هەرێم، خۆی حكومەتێكی ناپەندی دەستووریی و قەوارەی فیدراڵییە، دەیان ساڵە هەولێر سەری بەدەست ئانكەراوەیە، دەیان ساڵە بەبێ‌ ئاوڕدانەوە لە حكومەتی فیدڕاڵ نەوت و غاز و ئاو و هەوای هەرێم ئاودیوی ئەودیوی سنوور و دور دەكات، كەچی جگە لەوەی لە قەرزداریی زیاتر چییەكی تری بەرهەمنەهێناوە، یارییش بە هەستو نەستی خەڵكەكەی دەكات، ئەوەی گوتبێتی بۆ وادەكەی بۆ ناڕۆی لەگەڵ بەغدا چارەسەری ڕیشەیی كێشەكانت بكەی، لەبری بەهەند وەرگرتنی شكۆی نیشتمان و ژیانی خەڵك، تۆمەتباری دەكات بە جاش و عیراقچی، ئێستا كێیە لە شكۆ و پێگەی هەرێمی داوەو خستوویەتیە ژێر مەترسی و هەڕەشەی لەناوچوونەوە؟ حكومەت خۆیەتی یا ئەو خەڵكە داماوەی لەبرسان و لەترساندا هاواری لێهەڵساوەو داوای ئەوە دەكات ڕاستەوخۆ لە بەغداوە مووچەكانی پێبدرێت؟

باوەڕ ناكەم هەبێ‌ و حەز بكا كای كۆن بەبا بكات یا قەتماغەی زامە كۆنەكان هەڵبداتەوە، بەڵام تا دەسەڵات و ئەم حكومەتە فشەكەرە زامی نوێ‌ بخاتە جەستەو ژیانی خەڵكەكەیەوە، دەبێ‌ پتر چاوەڕوانی ئەوەش بكرێت پێیەكانی بكەونە سەر ئەم بەندو باوە كۆمەڵایەتییە، چونكە كێشەكان لەوە گوزەراون چاوپۆشیان لێبكرێ‌، موعاناتەكە لەسنور تێپەڕیووەو بووە بەپرس و پرسیاری جیددی بەكۆمەڵایەتی بووە، خەڵكی وڵامیان دەوێت، وڵامی قەتعی نەك مەتاتی و ڕۆمانسی، لەبەر ئەوە بێباكی ئەوە نییە خەڵك دەیڵێت، جاشایەتی كاری دەنگە ئازاو ئازادەكان نییە، بێباكی ئەوەیە لەبری بەرگری و بەرەنگار بوونەوە، سەرئەنجامی هەموو جارێ‌ مەیدانەكە چۆڵبكەیت و میللەت هەرزانفرۆش بكەی، جاشایەتی هەرێمایەتی ئەوەیە خنكاندنی بزوتنەوەی سیاسی میللەتەكەت لەڕۆژهەڵاتەوە تا ڕۆژئاوا، لەباشورەوە تا باكور لەبەرژەوەندی دەوڵەتانی ناوچەكە بكەیتە ئامانج و نیشتمانەكەت بكەیتە مۆڵگەی دامەزراوە ئیستغباراتییەكانیان، ناوەندچیێتی ئەوەیە بەناوی پارێزگاری لەسیادەی عیراق، سوپای بەعس بهێنیتەوە سەر پاڕلمانی وڵاتەكەت و ئەتكی بكەیت، ئەوەیە لەبەغدا پۆستە بەركەوتە سیادییەكانی حكومەتی عیراق نەدەیت بەكەس و لەهەولێریش ڕۆمانسییەتی وەتەنیەت بەخەڵك بفرۆشیت... تاد.

ئەم عەقڵیەتە حكومڕانە نەخۆشە، ناتوانێ‌ هەتا سەر بەناوی دژو دوژمنایەتی وەهمگەرایی ڕوت بەردەوامی بداتە هەڵخڕاندنی بوونیە نیشتمانی و جڤاكییەكەی كوردەواری، كێشەی ئەم خەڵكە حزبی و مەزهەبی و قەبیلەگەرایی نییە وەك ئەوەی واوێناو پاساو ئەدرێ‌، حكومەت بۆ خۆتان دەسەڵات بۆخۆتان ئەم خەڵكە ژیانی دەوێت، سەلامەتی سەرو ماڵ و مووڵك و پارێزراوی شكۆی نیشتمانی و نەتەوەكەی دەوێت، تۆ لەبری بەرەنگاری هەڵاتن بكەیتە پیشە، تۆ لەبری بەردەوامی ئاشبەتاڵ بكەیتە دوا وێستگە، بەدەمی خۆت بڵێیت"كاری ئێمە تەواو بوو" كەچی یەخەی خەڵك بەر نەدەیت، بەبەرچاوی دنیاوە ڕایبگەیەنیت"شێتم" هەر بشتەوێ‌ حاكم و حكومڕان خۆت بیت و نەشتوانی ماف و شایستەییەكانی خەڵك دەستەبەر بكەیت و شكۆی نیشتمانەكەت بپارێزی، ئێ‌ خەڵكی كوردستان مافی خۆیەتی بەدوای ئەلتەرناتیفدا بگەڕێ‌ و داوا لەحكومەتی فیدڕاڵ بكات راستەوخۆ لەبەغداوە ماف و مووچەو شایستەییە دارایی و كۆمەڵایەتییەكانی كۆنترۆڵ و دەستەبەر بكرێت، حكومەت ئەگەر ناتوانێ‌ وڵامدەرەوەی وەها حەقیقەتگەلێك بێت باش ناكات ناوی خۆی لەخەڵك بنێت، جاش دیارەو ناوەندچیش هەروەتر.

ماڵپه‌ڕی ئه‌رسه‌لان مه‌حمود