٢٨\٢\٢٠٢١
دەسەڵات وەک با!
ئەرسەلان مەحمود
ئەم وڵاتە "هەرێمی كوردستان" پڕە لە زیندانی نهێنی و تایبەت، پڕە لە
رووداوی هەڵكوتانەسەر و جوڵەی شاراوەی هێزە دەمامكدار و یەكە
تایبەتەكان، هەروەك چۆن پڕیشە لە خەڵكانی ڕفێندراو و ئەتك پێكراو و
بێسەروشوێنكراو، كەچی ئەگەر تەنها شتێك لە بەرامبەر بەدواداچوونی
خانەوادەی قوربانی و بەقوربانیكراواندا وترابێ و بوترێتەوە، لەم
دەستەواژە زیاتر نەبووە و نییە و تێناپەڕێت "خۆتان لەخستنە ژێر پرسیار
و لێپرسینەوەی چۆن و چیەتی جووڵەی هێز و یەكە تایبەتەكان و ئەم باس و
بابەت و بەدواداچوونانە بەدوور بگرن باشتر دەبێت بۆتان"!!
ئەم بەزم و بالۆرە لێدانە، ئیدی كورت و درێژخایەن، تا ئێوارە یا
بەرەبەیانێك لەڕێگەی یەكێك لەئامێرەكانی پەیوەندییكردنەوە بە خێزان و
خانەوادەی قوربانی و بە قوربانی كراوەكە ڕادەگەیەندرێ: بفەرموون لاشەی
كەسەكەتان لەفڵان شوێن دۆزراوەتەوە یان وا لەپزیشكی دادوەری و
مردووخانەیە وەربگرنەوە بەردەوام دەبێت، كارەساتبار تریش لەوەدایە ئەمە
شتێك نییە دەگمەن و نوێ، بە درێژایی دەیان ساڵەی حكومڕانێتی هەرێم،
بێگومان لە فۆڕم و شێوەو شێوازو سیناریۆی سەیردا خۆی وێنا و دووبارە و
دەبارە و سەدبارە دەكاتەوە، بە جۆرێ ڕۆژ نییە هەواڵێ تەواو تراژیك،
خۆی نەكا بەسەر دێر لە میدیا و تۆڕی کۆمەڵایەتی كوردیدا!!
ئەرێ ئەمە چجۆرە حكومەتێكە ڕۆژ تا ئێوارە بالۆرەی سەروەری یاسا و
سەربەخۆیی دەزگەی دادوەری و (حوكمی ڕەشید) و چاكە خوازی و پارێزەری
سەرو ماڵ و مووڵك و ماف و ئازادییەكان بە گوێی جیهان و خەڵكی خۆیدا
ئەدات، بەڵام لەپشت هەر هەموو ئەمانەوە زیندانی نهێنی و تایبەتی هەبێ
و جۆرە حوكم و حاكمیەتێكی شاراوە جێبەجێ بكات، ئەمە چجۆرە حوكمێكە
كێوماڵی تۆمەتباران بەم جۆرە تەموومژاوییە بكاو ڕێگە بەخێزان و نزیك و
خانەوادەكانیش نەدا تەنانەت بەدواداچوون و پرسینەوە لەسەر چۆن و چییەتی
گرتن و كێشەو دۆسییەی كەسەكانیان بكەن، ئاخر ئەمە چجۆرە دەسەڵاتێكە
هێزی گرتن و ڕفاندن و سزادان و كوشتن و بێسەرو شوێنكردنی خەڵكەكەی خۆی
لە تاریكیدا هەبێ بەڵام بوێری ئەوەی تێدا نەبێت لە ڕووناكیدا تاوانی
تاوانبار كراوەكان، سزای سزادراوان دادپەروەرانە جێبەجێ و ئاشكرا بكاو
ڕابگەیەنێت!!
لە ڕاستیدا و لەم بەشە باشورەی كوردستاندا، مرۆڤی هۆشمەند و خاوەن
ویژدان و زیندوو، جگە لەنیشتمان بێگومان بەشە نیشتمانێك لە خۆیدا لە
توپەت و هەپرون بەهەپرون كراو، دزراو بەسەرخان و ژێرخانییەوە، فرۆشراو
بە ئاسمان و ڕێسمانییەوە، هەست ناكاو ناتوانێ لەوە تێبگات هیچ جۆرە
دەزگە و دامەزراوەیەكی هەبێ نیشتمانی، درۆینەی دەیان ساڵەی یەك ڕیزی
نیشتمانی و یەك گوتاری نیشتمانی و یەك چی و چی نیشتمانی، سەلمێنەری بێ
چەند و چۆنی ئەم ڕاستەقینەیە و بەس.
لە هەرێمی کوردستاندا، بە داخەوە ئەمڕۆ ڕۆژی خەڵکە ئازادیخواز و بژاردە
جیاوازە کۆمەڵایەتی و ڕۆشنبیرییەکەی بە ڕۆژێک گەیشتووە تاریک و توند،
هەر شتێک بکەوێتە دەرەوەی بەرژەوەندیی و گوتاری دەسەڵات لەژێر هەڕەشەو
مەترسیدایە، دەسەڵات جگە لە پەڵپ و بیانووە زۆرو زەوەندەکانی جۆرەها
تەکنیک لەسەرکوت کردن و بێدەنگ کردنی خەڵک ڕاستەوخۆ و ناڕاستەوخۆ، بە
بۆنە و بۆنە، بەکاردەبات، وەک با ئاوڕ لە هیچ بەهایەک ناداتەوە!!
ماڵپهڕی ئهرسهلان مهحمود
|