٢٢\٦\٢٠١٠
دەیانەوێ ژینى
ئەسارەت، خۆشحاڵن بە عومرى گومڕاهى...
دەیانەوێ بە دەستى
موددەعى، بکەنە سەر تاجى شاهى.
هیوا رەش
دەستدرێژییەکانى دوژمنانى شۆفینیزمی ( تورک و فارس و عەرەب ) ڕەگێکى لە
مێژینەى هەیە و ڕۆچۆتە نێو ناخ و دەروونى تاکەکانى کۆمەڵگاى نەتەوە
باڵادەست و داگیرکەرەکانى کوردستانەوە و تا دێت شێوازى نوێ و
سەردەمییانە لە دژایەتى گەلى کوردمان بەکار دەبەن و هەر جارەى لە ژێر
پەردەى بیانوویەکى نایاسایى و نائاسایى پاساو بۆ ڕەفتارە
فاشیستانەکەیان دەهێننەوە ، پێش ڕوخانى ڕژێمى سەدامى گۆڕبەگۆڕ هەر
کاتێک هەستیان بە بوژاندنەوەى بزووتنەوە ڕزگاریخوازى گەلى کوردستان
بکردایە هەر سێ لایان شەرەفى ( نیشتمان ) ى خۆیان دەخستە هەڕاجەوە و بە
پەلە وەزیرەکانى دەرەوەى هەر سێ ووڵات کۆبوونەوەیان دەبەست و خاک و ئاو
و شەرەفى خۆیان دەخستە سەر مێزى قومارى لەبار بردنى بزاڤى نەتەوایەتى
گەلەکەمان و ڕێک دەکەوتن لەسەر هەموو جۆرە هەماهەنگییەکى نێوانیان بۆ
زەبر لێدانى کورد ، ڕێککەوتننامەى شوومى جەزائیر نمونەى قێزەون و
بەرجەستەیە بۆ ئەو پلانە نەگریسانەى بە مەبەستى تێکشکانى شۆڕشى کورد بە
چاوساغى ئەمریکا لە نێوان عێراق و ئێراندا ئیمزا کرا ، هەروەها چەندین
سازش و خاک فرۆشتن و هاوکاریى لۆجیستى نێوانیان لەو پێناوەدا ئەنجام
دراوە .
ئەمڕۆکە بە بەرچاوى ئەو هەموو باڵیۆزخانانە لە عێراق و کونسڵگەرییانەى
لە کوردستاندا هەیە ، سەربارى سەدان کۆمپانیا و ڕێکخراوى کۆمەڵگاى
مەدەنى و باس لێوە کردنى لە دەیان کەناڵى ڕاگەیاندنى خوێندن و بیستن و
بینینى جیهانى ، ئەوەتا دڕندە فاشیستەکانى تورکیا و ئێران بێشەرەفانە و
بێشەرمانە وەر دەبنە نێو خاکى کوردستان و بەر بوونەتە وێزەى گەلە
ستەمدیدەکەى ، ئەم ڕەفتارە دزێوانەى هەردوو ڕژێمە شۆفینیستەکانى تورکیا
و ئێران و کوشتنى خەڵکى سڤیل و ئاوارە و دەربەدەر کردنیان وێران کردنى
زێدى باوباپیرانیان دەخوازێ :
1 – حکومەتى هەرێمى کوردستان هەموو فشارەکانى ( دیلۆماسى – سیاسى و
ئابورى ) بە بوێرانە دژ بەو کاروکردەوانە دەرببڕێ و ڕاى گشتى لێ
ئاگادار بکاتەوە و هەڵوێستى ئاشکرا بکات .
2 – حکومەتى هەرێمى کوردستان نابێت ڕێگرى لە ناڕەزایەتییە
جەماوەرییەکان بکات و دەبێت جەماوەر مۆڵ بدات و پشتگیرى بکات بۆ
پرۆتیستۆ کردنى ئەو کوشتارگەیەى لە لایەن ئێران و تورکیاوە ئەنجام
ئەدرێت .
3 – نابێت حکومەتى هەرێمى کوردستان تەواوى ئومێدى لە سەر هانا بردن بۆ
حکومەتى بەغا بنیات بنێت و بەو ئومێدەشەوە خەڵکى کوردستان چەواشە بکات
، چونکە بە دڵنیاییەوە سەگ هەر سەگە جا سپى بێت یان ڕەش و بۆر ،
شۆفینیزمیش هەموو یەکڕەنگ و یەکدەنگن بەرامبەر بە ماف و داخوازییەکانى
خەڵکى کوردستان ، بۆیە پێویستە خۆى خاوەن هەڵوێستى ڕوون بێت و چاوەڕێى
دەمى بەرپرسانى بەغا نەکەن هەروەکو چۆن لە زۆر مەسەلەى داهات بێمنەتانە
تاک لایەنە بڕیاریان داوە با لەمەشیاندا وا بن .
4 – ئەگینا پێویستە حکومەتى هەرێمى کوردستان دەست بەرز بکاتەوە بۆ
خەڵکى کوردستان و چیدى خۆیان بە نوێنەرى خەڵکێک نەزانێت کە ناتوانێ
داکۆکییان لێ بکات و ئاڵاى سپیش بۆ دوژمنان بەرز بکاتەوە تا بێن
هەروەکو چۆن نیشتمانەکەمانیان کردۆتە پێگەى بازرگانى و ئابورى بۆ خۆیان
ئاوهاش بۆیان بکەن بە مۆڵگەیەکى سیخوڕى و جاسوسى و سەربازى بە قەولى
حکومەتى هەرێم ( چەکدار ) ە کوردەکان بکوژن .
5 – ئەگەر حکومەتداریى وا بێت و بە نەرمیى بەرامبەر دوژمنان پارێزراو
بێت نابێت باس لە نوێنەرایەتیى خەڵکى کوردستان بکات .
هەموو ئەو کردەوانەى ڕوو دەدەن پێویستى بە پەرچەکردارى شۆِڕشگێڕانەى
جەماوەریى هەیە و ئەبێت :
1 – جەماوەرى بەشەرەف و خاوەن هەڵوێستى کوردستان لە ئاستى ئەو
تاوانانەى ئەنجام ئەدرێن بێدەنگ نەبن .
2 – پێویستە خۆپیشاندانى جەماوەرى ساز بکرێت بەرامبەر هەموو دەزگا
سیاسى و سەربازى و سیخوڕى و بازرگانى و ئابورییەکانى دوژمنان .
3 – ڕێبازى گاندى لە کڕینى شتومەک و کالا و کەلوپەلى دوژمنان پیادە
بکرێت .
4 – پێویستە هەڕەشەى هەماهەنگى کردنى پێشمەرگە و گەریلاکانى پەشە
داگیرکراوەکانى ترى کوردستان لە لایەن ڕۆڵەکانى باشورى کوردستانەوە
ڕابگەیەنرێت.
5 – فشار بخرێتە سەر دامودەزگا ئەمریکى و نێودەوڵەتییەکانى ناو
کوردستان بۆ هەڵوێست پیشاندان و فشار خستنە سەر دوژمنان .
6 – چى تر لە هەمبەر قڕ کردنى ڕۆڵەکانمان چاوەڕێى دەمى بەرپرسە
نابەرپرسەکان نەکەین و هەڵوێستى جەماوەریى خۆمان هەبێت و گوتارى
مقاوەمەت بە گوێى دۆست و دوژمندا بدەین .
7 – پێویستە ڕێگریى لە کارکردنى کۆمپانیا و هاووردە کردنى کالاکانى
تورکیا و ئێران بگیرێت .
8 – هەموومان پێشمەرگانە ڕەفتار بکەین لە بەرامبەر لەشکرکێشییەکانى
ئێران و تورکیا و کۆمیتەى پشتیوانیى سیاسى و چەکداریى پێکبهێنین بۆ
بەڕەنگار بوونەوەیان .
9 - مردن نەک سەرشۆِڕى و پاراستننى ( ئەزمون ) ەکەى پارتى و یەکێتى
بکەین بە دروشم ، و لەو پێناوەدا هیچ نەبێت هاوکار و چاوساغى ڕۆڵەکانى
گەلەکەمان بین لە باکور و ڕۆژهەڵات .
10 – پێویستە بۆ ئاشتى کۆترى ئاشتى بین و بۆ شۆڕشیش سنور بەزێن بین و
دەستدرێژى بۆ سەر ڕۆڵەکانمان قبوڵ نەکەین ، چونکە بە بوونى ئەوانەوە
ئێمەش هەین و دوژمن چەکەرەمان لێ ئەکەن و بە لەناو چوونى ئەوان
چارەنووسێکى مەترسیدارى هەمەلایەنە دووچارى هەموو لایەکمان ئەبێتەوە .
لەم ڕۆژانەى ڕابردوودا سەرۆکى هەرێم بە سەردانێک لە تورکیا بوو ، لە
دواى ئەوەوە هێرشەکان توندوتیژتر کرانەوە ئەمەش خۆى لە خۆیدا دوو مانا
ئەبەخشێت:
1 – لەوانەیە هەڵوێستى سەرۆکى هەرێم توند و ڕاشکاو بووبێت لە سەر ئەو
بەرنامانەى تورکیا لە ناوچەکە بە گشتى و کوردستان بە تایبەتى دایڕشتبێت
و ئەم کاروکردانە تۆڵەیەک بن لەو هەڵوێستە .
2 - یان ئەوەتا ئەبێت سەرۆکى هەرێم گڵۆپى سەوزى بۆ لەشکرى داگیرکەر
داگیرساندبێت بۆ گڵاو کردنى نیشتمانەکەمان .
بۆیە پێویستە سەرۆکایەتى هەرێم و پەرلەمان و حکومەتى کوردستان قسەیان
هەبێت و ڕاشکاوانە گەلەکەمان لە پلانە نهێنییەکان ئاگادار بکەنەوە نەک
وەکو ئەوەى هۆشیار زێبارى وەزیرى دەرەوەى عێراق ئیدیعاى ئەکات گوایە بۆ
تاقى کردنەوە و هەڵسەنگاندنى توانا سەربازییەکانى عێراق لە پاش
کشانەوەى هێزەکانى ئەمریکا ، تورکیا لەشکرکێشى ئەکاتە ناو خاکى
کوردستان ، چونکە کاتێک تورکیا ئەو هێرشانەى ئەنجام ئەدا سوپاى فاشیستى
عێراق لەوپەڕى بەهێزى و دڕندەیى دا بوو ، و بە پرس و ڕاوێژى حکومەتى
عێراقى ئەهاتە ناو خاکى کوردستان لە بەشە داگیرکراوەکەى عێراقدا ،
ئەمەش دوو خوێندنەوەى بۆ ئەکرێت :
1 – شاردنەوەى ڕووى دزێوى مەرام و مەبەستى تورکیا لە هەوڵدان بۆ قڕ
کردنى ڕۆڵەکانى گەلەکەمان .
2 – بەرچاو ڵێڵ کردنە بۆ وون کردنى کێشەى نەتەوایەتى گەلى کوردمان لە
باکورى کوردستان کە زیاد لە نیوەى سوپاى تورکیا ئۆپەراسیۆن لە دژیان
ئەنجام ئەدات و لەشکرکێشییان ئەکاتە سەر .
لە کاتى نووسینى بابەتەکەدا هەواڵێکى کەناڵى کەى – ئێن – ئێن ى کاتژمێر
11 ى شەو بڵاو کرایەوە کە سەرۆکایەتى هەرێم ئیدانەى هێرشەکانى پ – ک –
ک ئەکات ، بۆ ئەمەیان هیچم نیە زیاتر لەوەى پێیان بڵێم : ئافەرینەى
بارەکەڵڵا هەى سەرۆکایەتى هەرێم ، تۆ بڵێى کار و پیشەتان ڕێگەدان و مۆر
کردن و بانگهێشت کردنى کۆمپانیا بازرگانییەکان بێت بۆ کوردستان تا
پرۆتۆکۆلى ئابورییان لەگەڵدا ئیمزا بکەن و کۆمەڵگاش پڕ لە خێزانى بێکار
و بێداڵدە بێت کە هەر لە هەمان کاتدا و لە هەمان کەناڵدا خێزانێکى
نەدار لە تاو بێدەرامەتى لە خانووەکەیان دەرکرابوون کە نەیانتوانیبوو
کرێ خانوو بۆ خاوەن موڵک دابین بکەن و لە بنارى گۆێژە لەو دەشتە
ڕووتەنەدا بەر خۆرەتاوەدا هەواریان لێ خستبوو ، جا چش لە سەروەرى
نەتەوەیى و نیشتمانى و بەها مرۆییەکانیش ؟؟؟ !!!
نازانین هەڵپەى ڕاکردنى سەرۆکى هەرێم و
حکومەت و نیوەى بەرپرسە باڵاکانى کوردستان قەیرانەکان زیاتر ئەکەنەوە
یان کەمتر ؟ ڕەنگە بۆ ئەمەیان پێمان بڵێن ( العلم عند الله ) .
پێم وایە ناهەقم نیە ئەو سەردێرەم بۆ ناونیشانى بابەتەکەم هەڵبژاردووە
چونکە لەوە جوانترم بۆ بەرپرسانى ووڵاتێکى پڕ سەرۆک و بێناسنامە
نەدۆزییەوە .
ماڵپهڕی
هیوا رهش
|